AKP ភ្នំពេញ ថ្ងៃទី១២ ខែឧសភា ឆ្នាំ២០២៦ -- លោក បាឡាស់ អ៊ុចវ៉ាវី (Balazs Ujvari) តំណាងគណៈកម្មការអឺរ៉ុប (EC) បាននិយាយនៅក្នុងសន្និសីទសារព័ត៌មានមួយនៅទីក្រុងព្រុចសែលថា គណៈកម្មការអឺរ៉ុបមានបំណងបែងចែកថវិកាចំនួន ៩,១ប៊ីលានអឺរ៉ូដល់ទីក្រុងគៀវនៅក្នុងខែមិថុនា ពីកម្មវិធីហិរញ្ញប្បទានដែលមានថវិកាសរុបចំនួន ៩០ប៊ីលានអឺរ៉ូ។

លោកបាននិយាយថា «ក្នុងចំណោមថវិកានេះ ថវិកាចំនួន ៥,៩ប៊ីលានអឺរ៉ូនឹងត្រូវប្រើប្រាស់សម្រាប់តម្រូវការយោធា និងថវិកាចំនួន ៣,២ប៊ីលានអឺរ៉ូសម្រាប់ជំនួយម៉ាក្រូហិរញ្ញវត្ថុ»។ ថវិកាយោធាដំបូងនឹងត្រូវប្រើប្រាស់សម្រាប់ការទិញយន្តហោះគ្មានមនុស្សបើកសម្រាប់អ៊ុយក្រែន ដោយគណៈកម្មការអឺរ៉ុបកំពុងធ្វើការទៅលើកម្មវិធីផ្គត់ផ្គង់ជាបន្តបន្ទាប់រួចហើយដែរ៕

ដោយ៖ យា ចិន្ដាខន្ដី (ប្រភព៖ តាសស៍)