AKP ភ្នំពេញ ថ្ងៃទី១២ ខែឧសភា ឆ្នាំ២០២៦ -- អ្នកចរចាពាណិជ្ជកម្មជាន់ខ្ពស់មកពីប្រទេសចិន និងសហរដ្ឋអាមេរិក នឹងធ្វើកិច្ចពិគ្រោះយោបល់ផ្នែកសេដ្ឋកិច្ច និងពាណិជ្ជកម្មនៅថ្ងៃពុធ នៅប្រទេសកូរ៉េខាងត្បូង មុនពេលដំណើរទស្សនកិច្ចដែលត្រូវបានរំពឹងទុករបស់ប្រធានាធិបតីសហរដ្ឋអាមេរិកលោក ដូណាល់ ត្រាំ ទៅកាន់ប្រទេសចិន។

ក្រសួងពាណិជ្ជកម្មចិន បាននិយាយថា ឧបនាយករដ្ឋមន្ត្រីចិន លោកហេ លីហ្វេង នឹងដឹកនាំគណៈប្រតិភូមួយទៅកាន់ទីក្រុងសេអ៊ូលនៅថ្ងៃអង្គារនេះ និងថ្ងៃពុធ សម្រាប់កិច្ចពិភាក្សា។

រដ្ឋមន្ត្រីក្រសួងរតនាគារអាម៉េរិក លោក ស្កុត ប៊ែសសិន នឹងតំណាងឱ្យភាគីអាម៉េរិក។

លោក ប៊ែសសិន បាននិយាយកាលពីថ្ងៃអាទិត្យថា លោកនឹងធ្វើដំណើរទៅកាន់ប្រទេសជប៉ុន និងកូរ៉េខាងត្បូង ចាប់ពីថ្ងៃចន្ទ មុនពេលកិច្ចប្រជុំកំពូលដែលត្រូវបានរំពឹងទុករបស់លោក ត្រាំ ជាមួយប្រធានាធិបតីចិន លោក ស៊ី ជីនពីង នៅទីក្រុងប៉េកាំង។

លោកគ្រោងនឹងជួបជាមួយនាយករដ្ឋមន្ត្រីជប៉ុន លោកស្រី សាណាអេតាកាអ៊ីឈី នៅថ្ងៃអង្គារនេះ រួមជាមួយរដ្ឋមន្ត្រីក្រសួងហិរញ្ញវត្ថុ លោក សាតស៊ូគី កាតាយ៉ាម៉ា និងតំណាងរដ្ឋាភិបាល និងវិស័យឯកជនផ្សេងៗទៀតសម្រាប់កិច្ចពិភាក្សាអំពីទំនាក់ទំនងសេដ្ឋកិច្ចអាម៉េរិក-ជប៉ុន។

លោក ប៊ែសសិន បាននិយាយថា បន្ទាប់មក លោកនឹងធ្វើដំណើរទៅកាន់ទីក្រុងសេអ៊ូល នៅថ្ងៃពុធ សម្រាប់ចូលរួមកិច្ចពិភាក្សាជាមួយលោកហេ។

លោកបាននិយាយថា «សន្តិសុខសេដ្ឋកិច្ច គឺជាសន្តិសុខជាតិ»។

កិច្ចប្រជុំដែលបានគ្រោងទុកចុងក្រោយបំផុតនេះ ធ្វើឡើងបន្ទាប់ពីកិច្ចពិគ្រោះយោបល់ផ្នែកសេដ្ឋកិច្ច និងពាណិជ្ជកម្មអាម៉េរិក-ចិន ជុំទីប្រាំមួយដែលបានធ្វើឡើងនៅទីក្រុងប៉ារីស កាលពីខែមីនា៕

ដោយ៖ យា ចិន្ដាខន្ដី (ប្រភព៖ AA-AKP)