AKP ភ្នំពេញ ថ្ងៃទី០៨ ខែឧសភា ឆ្នាំ២០២៦ -- ប្រទេសអ៊ីរ៉ង់ និងសហរដ្ឋអាមេរិក បានឈានដល់កិច្ចព្រមព្រៀងមួយ ដើម្បីបន្ធូរបន្ថយការបិទផ្លូវកងទ័ពជើងទឹករបស់អ៊ីរ៉ង់ ជាថ្នូរនឹងការបន្តការដឹកជញ្ជូនទំនិញឡើងវិញបន្តិចម្តងៗនៅក្នុងច្រកសមុទ្រហ័រមុស។ នេះបើយោងតាមការចុះផ្សាយរបស់ប៉ុស្តិ៍ទូរទស្សន៍ Al Arabiya របស់អារ៉ាប៊ីសាអូឌីត ដោយដកស្រង់ប្រភពព័ត៌មានប៉ាគីស្ថាន។

ប្រភពព័ត៌មានបានប្រាប់ប៉ុស្តិ៍ទូរទស្សន៍នោះថា «កិច្ចព្រមព្រៀងមួយត្រូវបានឈានដល់ទាក់ទងនឹងការបន្ធូរបន្ថយការបិទផ្លូវជាថ្នូរនឹងការបើកច្រកសមុទ្រហ័រមិសបន្តិចម្តងៗ» ដោយបន្ថែមថា ទំនាក់ទំនងយ៉ាងស៊ីជម្រៅកំពុងដំណើរការលើបញ្ហានេះ ហើយថា «ការទម្លាយបញ្ហានាវាដែលត្រូវបានរារាំងនៅក្នុងច្រកសមុទ្រត្រូវបានគេរំពឹងទុកក្នុងរយៈពេលប៉ុន្មានម៉ោងខាងមុខនេះ»។

ដោយនិយាយដូច្នេះ ប្រភពព័ត៌មានរបស់ Al Arabiya បានកត់សម្គាល់ថា «បច្ចុប្បន្ន មិនមានកិច្ចព្រមព្រៀងណាមួយលើកិច្ចប្រជុំដោយផ្ទាល់រវាងអ៊ីរ៉ង់ និងសហរដ្ឋអាមេរិកទេ» ដោយទំនាក់ទំនងនៅតែបន្តតាមរយៈអន្តរការី។ ប្រភពព័ត៌មានបានបន្ថែមថា ប្រធានាធិបតីសហរដ្ឋអាមេរិក លោក ដូណាល់ ត្រាំ ក៏បានស្នើសុំឱ្យភាគីអ៊ីរ៉ង់ឆ្លើយតបឱ្យបានលឿនបំផុតចំពោះសំណើកាត់បន្ថយភាពតានតឹងរបស់ទីក្រុងវ៉ាស៊ីនតោន។ ដំណើរការនៃកិច្ចចរចាកំពុងប្រព្រឹត្តទៅដោយរលូន ដោយប៉ុស្តិ៍ទូរទស្សន៍នោះបាននិយាយថា «អ៊ីរ៉ង់អាចបង្ហាញការឆ្លើយតបរបស់ខ្លួនទៅកាន់អ្នកសម្របសម្រួលប៉ាគីស្ថានក្នុងពេលឆាប់ៗនេះ»៕

ដោយ៖ យា ចិន្ដាខន្ដី (ប្រភព៖ តាសស៍)