AKP ភ្នំពេញ ថ្ងៃទី០៦ ខែឧសភា ឆ្នាំ២០២៦ -- កងទ័ពអ៊ីស្រាអែលបាននិយាយកាលពីថ្ងៃអង្គារថា ខ្លួនបានសម្លាប់ជនជាតិលីបង់ពីរនាក់ដែលកំពុងជិះម៉ូតូនៅភាគខាងត្បូងប្រទេសលីបង់ ដែលជាការរំលោភបំពានថ្មីមួយទៀតលើបទឈប់បាញ់ដែលកំពុងបន្ត។

អ្នកនាំពាក្យកងទ័ព លោក អាវីឆាយ អាដ្រាអ៊ី (Avichay Adraee) បាននិយាយថា កងកម្លាំងមកពីកងពលទី១៤៦ បានកំណត់គោលដៅលើបុគ្គលទាំងពីរនាក់នេះដោយយន្តហោះគ្មានមនុស្សបើកប្រដាប់អាវុធ ខណៈដែលពួកគេកំពុងធ្វើដំណើរដោយម៉ូតូនៅភាគខាងត្បូងប្រទេសលីបង់។

លោកអះអាងថា អ្នកទាំងពីរនាក់នេះជាសមាជិកក្រុមឧទ្ទាមហេសបូឡោះ ដែលត្រូវបានគេចោទប្រកាន់ថាបានចូលទៅជិតកងកម្លាំងអ៊ីស្រាអែល ដែលកំពុងប្រតិបត្តិការនៅក្នុងតំបន់នោះ។

កងទ័ពបានចេញផ្សាយវីដេអូដែលបង្ហាញពីយន្តហោះគ្មានមនុស្សបើកដេញតាមម៉ូតូនោះមុនពេលវាយប្រហារវា។

មិនមានការអត្ថាធិប្បាយរបស់ក្រុមហេសបូឡោះចំពោះការរាយការណ៍នេះទេ។

ដោយឡែកមួយទៀត លោក អាដ្រាអ៊ី បាននិយាយថា មីស៊ីលប្រឆាំងរថក្រោះដែលបាញ់ដោយក្រុមហេសបូឡោះ បានធ្លាក់នៅជិតកងកម្លាំងអ៊ីស្រាអែលនៅភាគខាងត្បូងប្រទេសលីបង់ ប៉ុន្តែមិនមានអ្នករងរបួសត្រូវបានរាយការណ៍ទេ។

បើទោះបីជាមានបទឈប់បាញ់ដែលបានប្រកាសនៅថ្ងៃទី១៧ ខែមេសា និងបានបន្តរហូតដល់ថ្ងៃទី១៧ ខែឧសភាក៏ដោយ ក៏កងទ័ពអ៊ីស្រាអែលនៅតែបន្តវាយប្រហារជារៀងរាល់ថ្ងៃនៅក្នុងប្រទេសលីបង់ និងបំផ្លាញផ្ទះសម្បែងយ៉ាងច្រើននៅក្នុងភូមិរាប់សិប។

ក្រសួងសុខាភិបាលលីបង់បាននិយាយកាលពីដើមសប្តាហ៍នេះថា មនុស្ស ១៧នាក់បានស្លាប់ក្នុងរយៈពេល ២៤ម៉ោងកន្លងមក ដែលនាំឱ្យចំនួនអ្នកស្លាប់ដោយសារការវាយប្រហាររបស់អ៊ីស្រាអែលចាប់តាំងពីថ្ងៃទី០២ ខែមីនា ឡើងដល់ ២.៦៩៦នាក់ ដោយមានអ្នករងរបួស ៨.២៦៤នាក់៕

ដោយ៖ យា ចិន្ដាខន្ដី (ប្រភព៖ AA-AKP)