AKP ភ្នំពេញ ថ្ងៃទី០៦ ខែឧសភា ឆ្នាំ២០២៦ -- រដ្ឋមន្ត្រីក្រសួងឧស្សាហកម្ម លោក គីម ជុងក្វាន់ (Kim Jung-kwan) បានធ្វើដំណើរទៅកាន់ប្រទេសកាណាដាកាលពីថ្ងៃអង្គារ ដើម្បីជួយសម្ព័ន្ធក្រុមហ៊ុនកូរ៉េខាងត្បូងឈ្នះគម្រោងប្រមាណ ៦០ទ្រីលានវ៉ុន (៤០,៦ប៊ីលានដុល្លារអាម៉េរិក) ដើម្បីសាងសង់នាវាមុជទឹកដើរដោយថាមពលធម្មតាថ្មីចំនួន ១២គ្រឿង។

យោងតាមក្រសួងបានឱ្យដឹងថា លោក គីម គ្រោងនឹងជួបជាមួយសមភាគីកាណាដារបស់លោកគឺ លោកស្រី មេឡានី ចូលី (Melanie Joly) និងរដ្ឋមន្ត្រីក្រសួងថាមពល និងធនធានធម្មជាតិកាណាដា លោក ទីម ហូដសុន (Tim Hodgson) នៅទីក្រុងអូតាវ៉ា ដើម្បីពិភាក្សាអំពីគម្រោងនាវាមុជទឹក និងស្វែងរកការគាំទ្ររបស់ពួកគេចំពោះការដេញថ្លៃសម្ព័ន្ធក្រុមហ៊ុនកូរ៉េខាងត្បូង។

សម្ព័ន្ធក្រុមហ៊ុនកូរ៉េខាងត្បូង ដែលរួមមានក្រុមហ៊ុន Hanwha Ocean Co. និងក្រុមហ៊ុន HD Hyundai Heavy Industries Co. កំពុងប្រកួតប្រជែងជាមួយក្រុមហ៊ុន Thyssenkrupp Marine Systems របស់អាល្លឺម៉ង់ ដោយអ្នកម៉ៅការចុងក្រោយត្រូវបានគេរំពឹងថានឹងត្រូវបានជ្រើសរើសនៅក្នុងខែមិថុនា។

បន្ទាប់មក លោក គីម នឹងធ្វើដំណើរទៅកាន់ទីក្រុងវ៉ាស៊ីនតោននៅថ្ងៃពុធ ដើម្បីជួបជាមួយរដ្ឋមន្ត្រីក្រសួងពាណិជ្ជកម្មសហរដ្ឋអាមេរិក លោក ហូវ៉ាដ លូតនីក (Howard Lutnick) និងមន្ត្រីរដ្ឋាភិបាលផ្សេងទៀត ដើម្បីពិភាក្សាអំពីគម្រោងវិនិយោគរបស់កូរ៉េខាងត្បូងនៅសហរដ្ឋអាមេរិក។

កាលពីខែមីនា រដ្ឋសភាជាតិបានអនុម័តសេចក្តីព្រាងច្បាប់ពិសេសមួយស្តីពីការសន្យាវិនិយោគចំនួន ៣៥០ប៊ីលានដុល្លារអាម៉េរិករបស់ទីក្រុងសេអ៊ូលចំពោះសហរដ្ឋអាមេរិក ដែលនៅក្រោមច្បាប់នេះ ប្រទេសកូរ៉េខាងត្បូងនឹងបង្កើតសាជីវកម្មថ្មីមួយដែលគ្រប់គ្រងដោយរដ្ឋដើម្បីអនុវត្តន៍កញ្ចប់វិនិយោគ។

ទីក្រុងសេអ៊ូលបានធ្វើការប្តេជ្ញាចិត្តវិនិយោគក្រោមកិច្ចព្រមព្រៀងពាណិជ្ជកម្មកាលពីឆ្នាំមុន ជាថ្នូរនឹងការដែលទីក្រុងវ៉ាស៊ីនតោនបន្ថយពន្ធ «ទៅវិញទៅមក» របស់ខ្លួនលើប្រទេសកូរ៉េខាងត្បូង៕

ដោយ៖ មូល មិនា (ប្រភព៖ យ៉ុនហាប់)