AKP ភ្នំពេញ ថ្ងៃទី៣០ ខែមេសា ឆ្នាំ២០២៦ -- ប្រទេសចិនស្វាគមន៍ក្រុមហ៊ុនបរទេសកាន់តែច្រើន រួមទាំងក្រុមហ៊ុន Jardine Matheson ដើម្បីពង្រឹងកិច្ចសហប្រតិបត្តិការជាមួយប្រទេសចិន និងសម្រេចបាននូវផលប្រយោជន៍ទៅវិញទៅមក និងលទ្ធផលឈ្នះ-ឈ្នះ ។នេះបើយោងតាមការលើកឡើងរបស់ឧបនាយករដ្ឋមន្ត្រីចិន លោក ហេ លីហ្វេង (He Lifeng) ។

លោក ហេ ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន (CPC) បានធ្វើការកត់សម្គាល់នេះក្នុងអំឡុងពេលជួបជាមួយលោក បេន កេស្វីក (Ben Keswick)ប្រធានប្រតិបត្តិនៃក្រុមហ៊ុន Jardine Matheson នៅទីក្រុងប៉េកាំង។

លោកឧបនាយករដ្ឋមន្ត្រីបានមានប្រសាសន៍ថា ក្នុងអំឡុងពេលផែនការប្រាំឆ្នាំលើកទី១៥ (២០២៦-២០៣០) ប្រទេសចិននឹងពង្រីកការបើកចំហរដែលមានស្តង់ដារខ្ពស់ និងលើកកម្ពស់ការអភិវឌ្ឍដែលមានគុណភាពខ្ពស់ ដោយហេតុនេះបង្កើតឱកាសទីផ្សារកាន់តែទូលំទូលាយសម្រាប់សហគ្រាសបរទេស។

លោកបានកត់សម្គាល់ថា សហគ្រាសបរទេសកាន់តែច្រើន រួមទាំងក្រុមហ៊ុន Jardine Matheson ត្រូវបានស្វាគមន៍ក្នុងការពង្រឹងកិច្ចសហប្រតិបត្តិការជាមួយប្រទេសចិន ចូលរួមក្នុងការអភិវឌ្ឍតំបន់ឈូងសមុទ្រក្វាងទុង-ហុងកុង-ម៉ាកាវ និងសម្រេចបាននូវផលប្រយោជន៍ទៅវិញទៅមក និងលទ្ធផលឈ្នះ-ឈ្នះ។

លោក កេស្វីក បានមានប្រសាសន៍ថា ក្រុមហ៊ុន Jardine Matheson មានទំនុកចិត្តលើទស្សនវិស័យអភិវឌ្ឍន៍របស់ប្រទេសចិនហើយនឹងបន្តពង្រឹងវត្តមានរបស់ខ្លួននៅក្នុងទីផ្សារចិន បង្កើនការវិនិយោគជាលំដាប់នៅក្នុងប្រទេសចិន និងចូលរួមចំណែកដល់ការអភិវឌ្ឍប្រកបដោយចីរភាព និងសុខភាពល្អនៃទំនាក់ទំនងសេដ្ឋកិច្ច និងពាណិជ្ជកម្មរវាងចក្រភពអង់គ្លេស និងប្រទេសចិន៕

ដោយ៖ មូល មិនា (ប្រភព៖ ភីបផលដេលី)