EN 
FR 
AR
CNបណ្តាមេដឹកនាំឈូងសមុទ្របដិសេធថ្លៃសេវាចំពោះនាវាដែលឆ្លងកាត់ចក្រសមុទ្រហ័រមុស និងអំពាវនាវឱ្យមានការធ្វើនាវាចរណ៍ដោយឥតគិតថ្លៃ
AKP ភ្នំពេញ ថ្ងៃទី២៩ ខែមេសា ឆ្នាំ២០២៦ -- អគ្គលេខាធិការនៃប្លុកឈូងសមុទ្របាននិយាយកាលពីថ្ងៃអង្គារថា មេដឹកនាំនៃក្រុមប្រឹក្សាសហប្រតិបត្តិការឈូងសមុទ្រ (GCC) បានបដិសេធការយកថ្លៃណាមួយទៅលើនាវាដែលឆ្លងកាត់ច្រកសមុទ្រហ័រមុស ហើយបានអំពាវនាវឱ្យមានការធ្វើនាវាចរណ៍ដោយសុវត្ថិភាព និងសេរីនៅក្នុងផ្លូវទឹក។
លោក ចាសេម ម៉ូហាម៉េដ អាល់ប៊ូដៃវី (Jasem Mohamed Albudaiwi) បាននិយាយថា នៅក្នុងកិច្ចប្រជុំពិគ្រោះយោបល់មួយនៅទីក្រុងចេដដាហ៍របស់ប្រទេសអារ៉ាប៊ីសាអូឌីត បណ្តាមេដឹកនាំឈូងសមុទ្របានបដិសេធចំពោះការបិទច្រកសមុទ្ររបស់អ៊ីរ៉ង់ ដោយពិពណ៌នាថាសកម្មភាពនេះជារឿង «ខុសច្បាប់»។
លោក អាល់ប៊ូដៃវី បានបន្ថែមថា បណ្តាមេដឹកនាំទាំងនោះក៏បានបញ្ជាឱ្យមានជំហានរហ័សសម្រាប់ការសាងសង់បំពង់បង្ហូរប្រេង និងឧស្ម័នរួមគ្នារួមជាមួយប្រព័ន្ធព្រមានជាមុនដើម្បីទប់ទល់នឹងមីស៊ីលបាលីស្ទិក។
ច្រកសមុទ្រហ័រមុស គឺជាចំណុចមួយក្នុងចំណោមចំណុចថាមពលដ៏សំខាន់បំផុតរបស់ពិភពលោក ដោយប្រហែលមួយភាគប្រាំនៃការផ្គត់ផ្គង់ប្រេងសកលលោកឆ្លងកាត់ច្រកសមុទ្រនេះជារៀងរាល់ថ្ងៃមុនពេលចាប់ផ្តើមសង្គ្រាមរវាងអ៊ីរ៉ង់ សហរដ្ឋអាមេរិក និងអ៊ីស្រាអែល។
ផ្លូវទឹកនេះបានប្រឈមមុខនឹងការរំខានចាប់តាំងពីដើមខែមីនាមកបន្ទាប់ពីការផ្ទុះឡើងនៃសង្គ្រាម។ ជម្លោះបច្ចុប្បន្នត្រូវបានផ្អាកក្រោមបទឈប់បាញ់ ខណៈដែលកិច្ចខិតខំប្រឹងប្រែងផ្នែកការទូតកំពុងបន្តដើម្បីឈានដល់កិច្ចព្រមព្រៀងយូរអង្វែង៕
ដោយ៖ យា ចិន្ដាខន្ដី (ប្រភព៖ AA-AKP)
