AKP ភ្នំពេញ ថ្ងៃទី២៩ ខែមេសា ឆ្នាំ២០២៦ -- ក្នុងអំឡុងពេលវេទិកាសៀងហៃឆ្នាំ២០២៦ អតីតនាយករដ្ឋមន្ត្រីអ៊ីតាលី លោក អេនរីកូ ឡេតតា (Enrico Letta) បានអំពាវនាវឱ្យមានគំរូនៃការគ្រប់គ្រងរួមគ្នាជាសកលឡើងវិញ ដោយសង្កត់ធ្ងន់ថា ប្រទេសចិន និងអឺរ៉ុបត្រូវតែសហការគ្នាដើម្បីរក្សាសណ្តាប់ធ្នាប់អន្តរជាតិដែលមានមូលដ្ឋានលើច្បាប់។ លោក ឡេតតាបានព្រមានថា ពិភពលោកបច្ចុប្បន្នកំពុងប្រឈមមុខនឹងការរញ្ជួយផ្នែកភូមិសាស្ត្រនយោបាយ ដែលបង្កឡើងដោយឯកតោភាគីនិយម និងជម្លោះក្នុងតំបន់។ លោកបានអះអាងថា ការផ្លាស់ប្តូរពីច្បាប់ព្រៃឆ្ពោះទៅរកប្រព័ន្ធពហុភាគី គឺមានសារៈសំខាន់ណាស់ក្នុងការការពារប្រទេសតូចៗ និងធានាស្ថិរភាពពិភពលោក។

ចំណុចកណ្តាលនៃកិច្ចសហប្រតិបត្តិការនេះ គឺការប្តេជ្ញាចិត្តរួមគ្នាចំពោះប្រព័ន្ធដែលផ្តោតលើអង្គការសហប្រជាជាតិជាដំណោះស្រាយចម្បងសម្រាប់បញ្ហាប្រឈមនានាក្នុងវិស័យពាណិជ្ជកម្ម បច្ចេកវិទ្យា និងភូមិសាស្ត្រនយោបាយ។ លោក ឡេតតា បានបញ្ជាក់ពីតម្រូវការបន្ទាន់សម្រាប់សកម្មភាពរួមគ្នាលើកិច្ចព្រមព្រៀងទីក្រុងប៉ារីស និងការប្រែប្រួលអាកាសធាតុ ដោយលោកបានកត់សម្គាល់ថា ខណៈដែលសហរដ្ឋអាមេរិកភាគច្រើនមិនអើពើនឹងបញ្ហាទាំងនេះ ប្រទេសចិន និងអឺរ៉ុបអាចដឹកនាំតាមរយៈថាមពលកកើតឡើងវិញ និងបច្ចេកវិទ្យាថ្មីៗ។ លោកបានចង្អុលបង្ហាញជាពិសេសទៅលើបញ្ញាសិប្បនិម្មិត (AI) ដែលជាកត្តាជំរុញដ៏សំខាន់សម្រាប់ការនវានុវត្តន៍នាពេលអនាគត និងការតភ្ជាប់ថាមពល។

ក្រៅពីនយោបាយកម្រិតខ្ពស់ លោក ឡេតត បានគូសបញ្ជាក់ពីសារៈសំខាន់នៃការផ្លាស់ប្តូរវប្បធម៌ និងអប់រំ ដោយលើកឡើងពីភាពជាដៃគូដ៏រឹងមាំរវាងសាកលវិទ្យាល័យអ៊ីតាលី និងចិន។ លោកបានសរសើរចំពោះកិច្ចខិតខំប្រឹងប្រែងរបស់ប្រទេសចិនក្នុងការបង្រួមគម្លាតអភិវឌ្ឍន៍ និងផ្តល់ឱកាសអប់រំស្មើភាពគ្នា ដោយបានបង្ហាញថា គំនិតផ្តួចផ្តើមទាំងនេះបម្រើជាគំរូសកលលោកសម្រាប់ដោះស្រាយវិសមភាព។ នៅទីបំផុត លោកបានដាក់រចនាសម្ព័ន្ធទំនាក់ទំនងចិន-អឺរ៉ុបជាសសរស្តម្ភចាំបាច់សម្រាប់ទប់ស្កាត់វិបត្តិសេដ្ឋកិច្ចពិភពលោក និងលើកកម្ពស់សហគមន៍អន្តរជាតិដែលមានបរិយាប័ន្ន និងមានស្ថិរភាពជាងមុន៕

ដោយ៖ យា ចិន្ដាខន្ដី (ប្រភព៖ ឆាយណាដេលី)