AKP បន្ទាយមានជ័យ ថ្ងៃទី២៩ ខែមេសា ឆ្នាំ២០២៦--ដើម្បីរួមចំណែកលើកកម្ពស់វិស័យអប់រំ និងផ្ដល់ឱកាសសិក្សាឱ្យកាន់តែប្រសើរឡើងសម្រាប់កុមារនៅតាមតំបន់ដាច់ស្រយាល នាព្រឹកថ្ងៃទី២៩ ខែមេសា ឆ្នាំ២០២៦នេះ លោក ឃ្លោក នួយអភិបាលរងខេត្តបន្ទាយមានជ័យ តំណាងឯកឧត្តម អ៊ុ រាត្រី អភិបាលនៃគណៈអភិបាលខេត្ត បានអញ្ជើញជាអធិបតីក្នុងពិធីទទួលសម្ភារសិក្សា និងបរិក្ខារកុមារពីអង្គការទស្សនៈពិភពលោក (World Vision)។ ពិធីនេះត្រូវបានរៀបចំឡើងនៅទីតាំងជម្រកបណ្តោះអាសន្ន (ផ្ទះអតីតយុទ្ធជន) ស្ថិតក្នុងភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។
ថ្លែងក្នុងឱកាសនោះ លោក ឃ្លោក នួយ បានពាំនាំនូវប្រសាសន៍សាកសួរសុខទុក្ខពីសំណាក់ឯកឧត្តមអភិបាលខេត្ត និងបានសម្ដែងនូវសេចក្ដីសោមនស្សរីករាយយ៉ាងក្រៃលែង ចំពោះកាយវិការសប្បុរសធម៌របស់អង្គការទស្សនៈពិភពលោក។ លោកអភិបាលរងខេត្តបានសង្កត់ធ្ងន់ថា ជំនួយទាំងនេះមិនត្រឹមតែជាសម្ភាររូបវន្តប៉ុណ្ណោះទេ ប៉ុន្តែគឺជាការវិនិយោគលើធនធានមនុស្ស និងជាការផ្ដល់ក្ដីសង្ឃឹមដល់កុមារដែលជាកូនចៅពលរដ្ឋភៀសសឹកកំពុងរស់នៅក្នុងតំបន់ជម្រកបណ្តោះអាសន្ននេះ។    
លោកបានមានប្រសាសន៍បន្តទៀតថា «ក្នុងនាមរដ្ឋបាលខេត្ត ខ្ញុំសូមថ្លែងអំណរគុណយ៉ាងជ្រាលជ្រៅចំពោះអង្គការទស្សនៈពិភពលោក ដែលតែងតែនៅក្បែរ និងរួមសុខ រួមទុក្ខជាមួយរាជរដ្ឋាភិបាលកម្ពុជា ជាពិសេសក្នុងសកម្មភាពមនុស្សធម៌ និងការអភិវឌ្ឍន៍សហគមន៍។ សម្ភារសិក្សា និងឧបករណ៍ក្មេងលេងទាំងនេះ នឹងក្លាយជាកម្លាំងចលករយ៉ាងសំខាន់ក្នុងការទាក់ទាញកុមារឱ្យមកសាលារៀន បង្កើនភាពរីករាយក្នុងការសិក្សា និងជួយសម្រាលបន្ទុកខ្វះខាតរបស់មាតាបិតាសិស្សនៅក្នុងតំបន់នេះ ដើម្បីឈានទៅរកអនាគតដ៏ភ្លឺស្វាងសម្រាប់ពួកគេ»។    
គួរបញ្ជាក់ផងដែរថា សម្ភារដែលអង្គការទស្សនៈពិភពលោកបាននាំយកមកប្រគល់ជូនរដ្ឋបាលខេត្ត ដើម្បីបម្រើឱ្យតម្រូវការសិក្សារបស់កុមារនាពេលនេះ រួមមានទោងរអិល ចំនួន ០២ឈុត (ខ្នាត កម្ពស់ ១,២ម x ប្រវែង ២ម x ទទឹង ០,៥ម កម្រាស់ ១,២លី)។ទោងវិលកៅអី ៥ ចំនួន ០២ឈុត (រង្វង់ ១,៥ម កម្ពស់ ១ម)។តុជ័រក្រាស់សម្រាប់កុមារចំនួន ១១០តុ។កៅអីផ្អែកតូច (VN) ចំនួន ១៩០កៅអី។កង្ហារពិដាន (CSS-1200) ចំនួន ៣៤ឈុត។       
តាមរយៈការផ្ដល់ជូននេះ លោកអភិបាលរងខេត្តក៏បានផ្ដាំផ្ញើដល់អាជ្ញាធរមូលដ្ឋាន លោកគ្រូ អ្នកគ្រូ និងមាតាបិតាសិស្សទាំងអស់ សូមជួយថែរក្សាសម្ភារទាំងនេះឱ្យបានល្អ ដើម្បីប្រើប្រាស់បានយូរអង្វែងសម្រាប់ជាប្រយោជន៍ដល់កុមារជំនាន់ក្រោយៗទៀត។ ជាមួយគ្នានេះ លោកក៏បានលើកទឹកចិត្តដល់ក្មួយៗសិស្សានុសិស្សឱ្យខិតខំរៀនសូត្រឱ្យក្លាយជាកូនល្អ សិស្សល្អ និងជាទំពាំងស្នងឫស្សីដ៏រឹងមាំសម្រាប់អភិវឌ្ឍប្រទេសជាតិទៅថ្ងៃអនាគត៕

ដោយ ឈុន សារ៉ាត