AKP ភ្នំពេញ ថ្ងៃទី២៩ ខែមេសា ឆ្នាំ២០២៦ -- មហាសន្និបាតលើកទី២១ នៃសហព័ន្ធអ្នកសារព័ត៌មានអាស៊ាន (CAJ-21) បានធ្វើពិធីបើកនៅទីក្រុងគូឡាឡាំពួររបស់ប្រទេសម៉ាឡេស៊ី កាលពីពេលថ្មីៗនេះ ដោយបានបង្ហាញពីតួនាទីកាន់តែខ្លាំងឡើងនៃបញ្ញាសិប្បនិម្មិត (AI) ក្នុងការផ្លាស់ប្តូររូបរាងសារព័ត៌មាន ខណៈដែលបានបញ្ជាក់សារជាថ្មីនូវសារៈសំខាន់យូរអង្វែងនៃតម្លៃមនុស្ស។

ព្រឹត្តិការណ៍ដែលរៀបចំឡើងដោយសហភាពអ្នកសារព័ត៌មានជាតិម៉ាឡេស៊ី (NUJM) ដែលកាន់តំណែងជាប្រធាន CAJ សម្រាប់ឆ្នាំ២០២៦នេះ បានប្រមូលផ្តុំអង្គការអ្នកសារព័ត៌មានមកពីរដ្ឋជាសមាជិក CAJ រួមមានប្រទេសឥណ្ឌូណេស៊ី ថៃ ហ្វីលីពីន សិង្ហបុរី វៀតណាម ឡាវ និងកម្ពុជា រួមជាមួយដៃគូសន្ទនាមកពីប្រទេសចិន និងសាធារណរដ្ឋកូរ៉េ។

ថ្លែងនៅក្នុងវគ្គបើក អនុរដ្ឋមន្ត្រីក្រសួងទំនាក់ទំនងម៉ាឡេស៊ី លោកស្រីតេអូ នីជីង (Teo Nie Ching) បានលើកឡើងពីប្រធានបទ «អនាគតនៃ AI និងផលប៉ះពាល់របស់វាទៅលើសារព័ត៌មាន» ទាំងទាន់ពេលវេលា និងសំខាន់ ដោយកត់សម្គាល់ថា AI កំពុងផ្លាស់ប្តូរយ៉ាងឆាប់រហ័សពីរបៀបដែលព័ត៌មានត្រូវបានផលិត ចែកចាយ និងប្រើប្រាស់។

លោកស្រីបានទទួលស្គាល់ថា AI ផ្តល់នូវអត្ថប្រយោជន៍ច្បាស់លាស់ដូចជាការកែលម្អប្រសិទ្ធភាពបន្ទប់ព័ត៌មាន ការពង្រឹងការវិភាគទិន្នន័យ និងការបង្កើនភាពងាយស្រួលចូលប្រើប្រាស់ខ្លឹមសារ ប៉ុន្តែទោះជាយ៉ាងណាក៏ដោយ លោកស្រីបានព្រមានអំពីហានិភ័យកើនឡើងជាពិសេសការប្រើប្រាស់ AI ខុសក្នុងការផលិតខ្លឹមសារបំភាន់ ឬក្លែងបន្លំ។ដោយដកស្រង់ទិន្នន័យជាតិ លោកស្រី តេអូ បានចង្អុលបង្ហាញពីការកើនឡើងយ៉ាងខ្លាំងនៃការបង្ហោះទាក់ទងនឹងការបោកប្រាស់តាមអ៊ីនធឺណិតរួមទាំងការបង្ហោះដែលប្រើប្រាស់ AI ដើម្បីក្លែងបន្លំបុគ្គលសាធារណៈ និងស្ថាប័ននានា ដែលបង្កើនការព្រួយបារម្ភយ៉ាងខ្លាំងអំពីភាពត្រឹមត្រូវនៃព័ត៌មាន និងទំនុកចិត្តពីសាធារណជន។

លោកស្រីបានសង្កត់ធ្ងន់ថា «គោលជំហររបស់យើង គឺច្បាស់លាស់៖សារព័ត៌មានត្រូវតែនៅតែជាមនុស្សនៅក្នុងស្នូលរបស់វា។ AI គួរតែបម្រើជាឧបករណ៍ដើម្បីគាំទ្រអ្នកសារព័ត៌មាន មិនមែនជំនួសការវិនិច្ឆ័យក្រមសីលធម៌ និងការទទួលខុសត្រូវរបស់មនុស្សនោះទេ»៕

ដោយ៖ យា ចិន្ដាខន្ដី (ប្រភព៖ VNA)