AKP ភ្នំពេញ ថ្ងៃទី២៧ ខែមេសា ឆ្នាំ២០២៦--ក្រុមការពារម្ចាស់ជើងឯកលីគនារីកម្ពុជា ភ្នំពេញក្រោនបានវិលត្រឡប់មកការពារម្ចាស់ជើងឯក នៅរដូវកាលថ្មី ២០២៦ ក្នុងសប្តាហ៍ទី១ បានយកឈ្នះក្រុមនារីមន្ទីរអប់រំ យុវជន និងកីឡាខេត្តកំពង់ឆ្នាំងដោយលទ្ធផលរហូតដល់ ៣០-១ ដែលជាលទ្ធផលមួយកម្រនឹងកើតមានឡើង។

នេះជាលទ្ធផលនៃសប្តាហ៍ទី១ ដែលទើបនឹងដំណើរការនៅរដូវកាលថ្មី ២០២៦ កាលពីថ្ងៃសៅរ៍-អាទិត្យ ថ្ងៃទី២៥-២៦ ខែមេសា ឆ្នាំ២០២៦ ចុងសប្តាហ៍នេះ។ ចំពោះ៣ប្រកួតផ្សេងទៀត ក្នុងជំនួបសប្តាហ៍ទី១នេះ គឺក្រុមជើងឯករង ឆ្នាំចាស់ វិសាខា បានយកឈ្នះក្រុមអិកស៍អូ យូណាយធីត ៤-០, ណាហ្គាវើលដ៍ ស្មើ ១-១ ជាមួយក្រុមសៀមរាប ខណៈព្រះខ័នរាជស្វាយរៀងបានយកឈ្នះក្រុមបឹងកេត ដោយលទ្ធផល ៦-៣។

ការប្រកួតបាល់ទាត់ជម្រើសជើងឯកខេមបូឌនាលីគនារី ឆ្នាំ២០២៦ មានបេក្ខភាព ៨ក្រុមចូលរួម រួមមានក្រុមការពារជើងឯក ភ្នំពេញក្រោន ក្រុមជើងឯករងឆ្នាំចាស់ វិសាខា ព្រះខ័នរាជស្វាយរៀង ណាហ្គាវើលដ៏ បឹងកេត សៀមរាបអេហ្វស៊ី មន្ទីរអប់រំ យុវជន និងកីឡាខេត្តកំពង់ឆ្នាំង និងក្រុម អិកស៍អូ យូណាយធីត។ យោងតាមកម្មវិធីប្រកួតរដូវកាលថ្មី នៃលីគកំពូលនារីនៅកម្ពុជានេះដែរ នឹងប្រើរូបមន្ដប្រកួតថ្មី ដោយក្រុមទាំង៨ត្រូវជួបគ្នាសន្សំពិន្ទុចំនួន២ជុំ ហើយក្រោយបញ្ចប់ការប្រកួតទាំងពីរជុំ គឺ៤ក្រុមលើកកំពូលតារាង (Top 4) នឹងត្រូវប្រកួតខ្វែងគ្នា ដោយក្រុមឈរលេខ១ ប៉ះក្រុមឈរលេខ៤ និងក្រុមឈរលេខ២ ត្រូវជួបក្រុមឈរលេខ៣ ដើម្បីស្វែងរកក្រុមឈ្នះៗឡើងទៅប្រកួតវគ្គផ្ដាច់ព្រ័ត្រ ដណ្ដើមជើងឯក៕

ដោយ ហេង ណាលីន (រូបភាព៖ លីគនារីកម្ពុជា-FFC)