AKP ភ្នំពេញ ថ្ងៃទី២៤ ខែមេសា ឆ្នាំ២០២៦ -- គម្រោងតភ្ជាប់ថាមពលកម្លាំង ៥០០គីឡូវ៉ុលរវាងចិន-ឡាវ បានចាប់ផ្តើមប្រតិបត្តិការជាផ្លូវការកាលពីដើមសប្តាហ៍នេះ ដែលជាព្រឹត្តិការណ៍ប្រវត្តិសាស្ត្រមួយ ខណៈដែលថាមពលកកើតឡើងវិញនៅបរទេសបានចូលទៅក្នុងទីផ្សារថាមពលរបស់ប្រទេសចិនជាលើកដំបូង។ គម្រោងនេះបានផ្គត់ផ្គង់ថាមពលពន្លឺព្រះអាទិត្យកម្លាំង៤,៨១លានគីឡូវ៉ាត់ម៉ោងដោយជោគជ័យពីភាគខាងជើងប្រទេសឡាវទៅកាន់ខេត្តយូណាន។ ខ្សែបញ្ជូនប្រវែង ១៧៧,៥គីឡូម៉ែត្រនេះ តំណាងឱ្យការទម្លាយរចនាសម្ព័ន្ធដ៏សំខាន់មួយ ដោយផ្លាស់ប្តូរពីការនាំចូលថាមពលវារីអគ្គិសនីវ៉ុលទាបបែបប្រពៃណី ទៅជាប្រព័ន្ធដែលមានសមត្ថភាពខ្ពស់ក្នុងការគ្រប់គ្រងថាមពលកកើតឡើងវិញ។

ដំណើរការដោយក្រុមហ៊ុនថាមពលនុយក្លេអ៊ែរទូទៅចិន (CGN) អគ្គិសនីនេះមានប្រភពមកពីរោងចក្រថាមពលពន្លឺព្រះអាទិត្យទ្រង់ទ្រាយធំដំបូងគេរបស់ប្រទេសឡាវ។ មិនដូចការផ្ទេរថាមពលក្នុងស្រុកពីមុនទេឆ្អឹងខ្នងនៃការតភ្ជាប់ថាមពលកម្លាំង ៥០០គីឡូវ៉ុលនេះអនុញ្ញាតឱ្យថាមពលពន្លឺព្រះអាទិត្យត្រូវបានរួមបញ្ចូលទៅក្នុងប្រព័ន្ធពាណិជ្ជកម្មដែលមានទីផ្សាររបស់ប្រទេសចិន។ ខណៈដែលថាមពលបច្ចុប្បន្នទៅដល់ខេត្តយូណានផែនការកំពុងដំណើរការរួចហើយដើម្បីពង្រីកការផ្គត់ផ្គង់ថាមពលបៃតងនេះទៅកាន់មជ្ឈមណ្ឌលដែលមានតម្រូវការខ្ពស់ដូចជាតំបន់ឈូងសមុទ្រក្វាងទុង-ហុងកុង-ម៉ាកាវ ដោយរំពឹងថានឹងមានការផ្គត់ផ្គង់ថាមពលពន្លឺព្រះអាទិត្យចំនួន ១,១ពាន់លានគីឡូវ៉ាត់ម៉ោងនៅក្នុងឆ្នាំនេះ។

គម្រោង «ផ្លូវសូត្រថាមពល» នេះ បម្រើជាគំរូសម្រាប់ការធ្វើសមាហរណកម្មថាមពលក្នុងតំបន់នៅក្នុងតំបន់ឡានឆាង-មេគង្គ។ តាមរយៈការប្រើប្រាស់ខ្សែបណ្តាញវ៉ុលខ្ពស់ដើម្បីកាត់បន្ថយការខាតបង់ការបញ្ជូន គម្រោងនេះធ្វើឱ្យការនាំចូលថាមពលខ្យល់ និងថាមពលពន្លឺព្រះអាទិត្យពីតំបន់ដាច់ស្រយាលអាចសម្រេចបានផ្នែកសេដ្ឋកិច្ច។ នាពេលខាងមុខក្រុមហ៊ុនបណ្តាញថាមពលចិនខាងត្បូង មានគោលបំណងធ្វើឱ្យប្រតិបត្តិការឆ្លងកាត់ព្រំដែនទាំងនេះមានលក្ខណៈធម្មតា ដោយលើកកម្ពស់ទីផ្សារថាមពលដែលមានស្តង់ដារ និងមានលក្ខណៈស្ថាប័ន ដែលគាំទ្រដល់ការផ្លាស់ប្តូរបៃតងនៅទូទាំងតំបន់អាស៊ីអាគ្នេយ៍៕

ដោយ៖ យា ចិន្ដាខន្ដី (ប្រភព៖ ឆាយណាដេលី)