AKP ភ្នំពេញ ថ្ងៃទី២៣ ខែមេសា ឆ្នាំ២០២៦--នៅមជ្ឈមណ្ឌលអភិវឌ្ឍន៍សេដ្ឋកិច្ច និងសហគ្រិនភាពស្ត្រី(WEE-DC) លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី អនុប្រធានគណៈកម្មការជាតិរៀបចំកិច្ចប្រជុំកំពូលហ្វ្រង់កូហ្វូនី លើកទី២០ ឆ្នាំ២០២៦ និងជាប្រធានអនុគណៈកម្មការទី៥៖ ព្រឹត្តិការណ៍អមកិច្ចប្រជុំកំពូល បានដឹកនាំកិច្ចប្រជុំដើម្បីពិនិត្យលើវឌ្ឍនភាពនៃការត្រៀមរៀបចំព្រឹត្តិការណ៍អមចំនួនពីរ គឺ  ព្រឹត្តិការណ៍អម «ភូមិហ្វ្រង់កូហ្វូន (Village Francophone)» ដែលផ្តោតលើការប្រាស្រ័យទាក់ទងរវាងមនុស្សនិងមនុស្ស (People to People Connectivity) ក៏ដូចលើកស្ទួយនិងផ្សព្វផ្សាយវប្បធម៌ និងទេសចរណ៍ និងព្រឹត្តិការណ៍អម «ហ្វ្រង់កូតិច(FrancoTech)» ដែលបង្ហាញលើបច្ចេកវិទ្យាឌីជីថល នវានុវត្តន៍ និងការពង្រឹងកិច្ចសហប្រតិបត្តិការសេដ្ឋកិច្ច រវាងបណ្តាប្រទេសហ្រ្វង់កូហ្វូនី កាលពីថ្ងៃទី២២ ខែមេសា ឆ្នាំ២០២៦ ។ 

កិច្ចប្រជុំនេះមានសមាសភាពចូលរួមមកពីតំណាងក្រសួង-ស្ថាប័ន និងវិស័យឯកជន មានជាអាទិ៍៖ ទីស្តីការគណៈរដ្ឋមន្រ្តី ក្រសួងទេសចរណ៍ ក្រសួងប្រៃសណីយ៍ និងទូរគមនាគមន៍ ក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ រដ្ឋលេខាធិការដ្ឋានអាកាសចរណ៍ស៊ីវិល និងក្រុមហ៊ុន Confluence។ 

ក្នុងនោះ តំណាងក្រសួងទេសចរណ៍ ដែលទទួលខុសត្រូវដឹកនាំរៀបចំព្រឹត្តិការណ៍អម«ភូមិហ្វ្រង់កូហ្វូន» បានធ្វើបទបង្ហាញលើវឌ្ឍនភាពសំខាន់ៗដែលសម្រេចបាន រួមមាន៖ ការចុះពិនិត្យទីតាំងដែលត្រូវរៀបចំព្រឹត្តិការណ៍, ការរៀបចំពង្រាងគំនូសប្លង់, ការរៀបចំស្តង់Pavilion និងការរៀបចំឯកសារ Technical Guide ស្តីពីព្រឹត្តិការណ៍ទាំងមូល និងកិច្ចការផ្សេងៗទៀត ។ល។ 

ជាមួយគ្នានោះ តំណាងក្រសួងប្រៃសណីយ៍ និងទូរគមនាគមន៍ ដែលទទួលខុសត្រូវដឹកនាំរៀបចំព្រឹត្តិការណ៍អម«ហ្រ្វង់កូតិច» ក៏បានលើកពីវឌ្ឍនភាពសំខាន់ៗ មានដូចជា៖ បានសម្រេចលើទីកន្លែង និងកាលបរិច្ឆេទសម្រាប់ព្រឹត្តិការណ៍ និងប្រជុំពិភាក្សាជាមួយស្ថាប័ន និងដៃគូពាក់ព័ន្ធដែលមានបំណងដាក់បញ្ចូលសកម្មភាពរបស់ខ្លួនក្នុងព្រឹត្តិការណ៍ ក៏ដូចការកៀរគរធនធានគាំទ្រផងដែរ។  

ជាលទ្ធផល លោកជំទាវកិតិ្តបណ្ឌិតរដ្ឋមន្រ្តី ក្នុងនាមជាប្រធានអនុគណៈកម្មការទី៥៖ ព្រឹត្តិការណ៍អម បានថ្លែងអំណរគុណដល់ក្រុមការងាររៀបចំព្រឹត្តិការណ៍អមទាំងពីរ ដែលបានខិតខំប្រឹងប្រែងជំរុញ និងពន្លឿនការងាររបស់ខ្លួន ស្របតាមភារកិច្ចដែលបានប្រគល់ជូន។ ទន្ទឹមនេះ លោកជំទាវកិត្តិបណ្ឌិតប្រធានអង្គប្រជុំ ក៏បានស្នើដោយទទូចដល់ក្រុមការងារ បន្តជំរុញនិងពន្លឿនការងារដែលនៅសេសសល់ឱ្យបានទាន់ពេលវេលា ស្របតាមការស្នើសុំរបស់លេខាធិការដ្ឋានរៀបចំកិច្ចប្រជុំកំពូលហ្រ្វង់កូហ្វូនី លើកទី២០ ឆ្នាំ២០២៦។ 

ជាងនេះទៀត ផ្អែកលើភាពមានកម្រិតនៃថវិកា លោកជំទាវកិត្តិបណ្ឌិតរដ្ឋមន្រ្តី បានលើកទឹកចិត្តឱ្យក្រុមការងារផ្តោតលើសកម្មភាពដែលជាអាទិភាពបំផុត និងខិតខំស្វែងរកការគាំទ្រទាំងបច្ចេកទេស និងធនធានហិរញ្ញវត្ថុពីដៃគូ និងវិស័យឯកជន ដើម្បីធ្វើយ៉ាងណាឱ្យការរៀបចំព្រឹត្តិការណ៍អម ទទួលបានជោគជ័យ និងសម្រេចលទ្ធផលតាមការរំពឹងទុក៕

ដោយ ទូច វលក័្ខណ (ប្រភព៖ ក្រសួងកិច្ចការនារី)