AKP ភ្នំពេញ ថ្ងៃទី២២ ខែមេសា ឆ្នាំ២០២៦--និស្សិតមីយ៉ាន់ម៉ាចំនួន២១រូបបានថ្លែងអំណរគុណដល់រាជរដ្ឋាភិបាលកម្ពុជា ដែលបានផ្ដល់ឱកាសដល់ពួកគេបានបន្តការសិក្សា និងបញ្ចប់ដោយជោគជ័យនូវជំនាញវិស្វកម្មឧបករណ៍អវយវៈសិប្បនិម្មិត និងរណប នៅមហាវិទ្យាល័យវិស្វកម្មឧបករណ៍អវយវៈសិប្បនិម្មិត និងរណបកម្ពុជា។ 

សូមជម្រាបថា និស្សិតទាំងនេះត្រូវបានផ្ទេរមកពីប្រទេសមីយ៉ាន់ម៉ា ក្រោមការគាំទ្រពីមូលនិធិជប៉ុន និងអង្គការ Exceed Worldwide ដោយមានការទទួលស្គាល់ក្រេឌីតសិក្សាយ៉ាងពេញលេញពីក្រសួងអប់រំ យុវជន និងកីឡាតាំងពីឆ្នាំ២០២២កន្លងមកនេះ។ បច្ចុប្បន្នក្រុមនិស្សិតបានបញ្ចប់ការសិក្សាជាស្ថាពរ ហើយគ្រោងនឹងធ្វើដំណើរត្រឡប់ទៅប្រទេសមីយ៉ាន់ម៉ាវិញនាពេលខាងមុខនេះ។ 

ក្នុងជំនួបសម្តែងការគួរសមជាមួយឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីរសៀលថ្ងៃទី២១ ខែមេសា ឆ្នាំ២០២៦ និស្សិតមីយ៉ាន់ម៉ាទាំង ២១រូប រួមទាំងតំណាងអង្គការ Exceed Worldwide បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ដែលបានផ្ដល់ការគាំទ្រនាពេលកន្លងមក និងបានលើកឡើងថា ក្នុងអំឡុងពេលសិក្សានៅកម្ពុជានិស្សិតម្នាក់ៗបានចូលរួមចំណែកយ៉ាងសកម្មក្នុងការជួយសង្គ្រោះ និងផ្ដល់សេវាស្ដារលទ្ធភាពពលកម្មដល់ប្រជាជនកម្ពុជាជាច្រើនរូបរួចមកហើយ ហើយបន្ទាប់ពីបញ្ចប់បេសកកម្មនេះពួកគេនឹងនាំយកចំណេះដឹង និងជំនាញបច្ចេកទេសទាំងនេះត្រឡប់ទៅបម្រើប្រជាជននៅប្រទេសមីយ៉ាន់ម៉ាវិញ។

ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងអបអរសាទរដល់និស្សិត និងគ្រូឧទ្ទេសទាំងអស់ដែលបានបញ្ចប់ការសិក្សា និងការចុះអនុវត្តការងារផ្ទាល់នៅកម្ពុជាដោយជោគជ័យ ព្រមទាំងបានលើកឡើងពីគុណតម្លៃនៃការសិក្សាជំនាញឯកទេសផ្នែកឧបករណ៍អវយវៈសិប្បនិម្មិតនេះថា គឺជាការផ្ដល់ "ជីវិតទីពីរ" ដល់ជនមានពិការភាព ព្រោះកម្ពុជាធ្លាប់មានបទពិសោធរងគ្រោះដោយសារគ្រាប់មីន និងសង្គ្រាមនាពេលអតីតកាល ដែលធ្វើឱ្យប្រជាជនបាត់បង់សមត្ថភាពការងារ និងការរស់នៅ។

ឯកឧត្តមបានគូសបញ្ជាក់ថា ការបំពាក់អវយវៈសិប្បនិម្មិតមិនត្រឹមតែជួយឱ្យពួកគេអាចប្រកបរបរចិញ្ចឹមជីវិតបានឡើងវិញប៉ុណ្ណោះទេ តែថែមទាំងផ្ដល់នូវក្ដីសង្ឃឹម និងលទ្ធភាពក្នុងការរស់នៅដោយឯករាជ្យម្ចាស់ការក្នុងសង្គមថែមទៀតផង។  ក្នុងន័យនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណដល់អង្គការ Exceed Worldwide សម្រាប់ការបណ្ដុះបណ្ដាលធនធានមនុស្សដ៏មានសារៈសំខាន់នេះ ដែលនឹងក្លាយជាកម្លាំងចលករជួយដល់ប្រជាជនមីយ៉ាន់ម៉ា ជាពិសេសក្នុងបរិបទដ៏លំបាកនាពេលបច្ចុប្បន្ន៕

ដោយ៖ ចាន់ សុភឿន (ប្រភព៖ ក្រសួងអប់រំ)