AKP សៀមរាប ថ្ងៃទី២០ ខែមេសា ឆ្នាំ២០២៦--លោកជំទាវ ស៊ិន ណម ប្រធានសមាគមនារីកម្ពុជា ដើមី្បសន្តិភាព និងអភិវឌ្ឍន៍ សាខាខេត្តសៀមរាប និងសហការី នៅព្រឹកថ្ងៃទី ២០ ខែមេសា ឆ្នាំ២០២៦នេះបានប្រគល់ស្បៀងអាហារជូនដល់កងពលតូចដឹកជញ្ជូនលេខ៩០ (ចល័ត) នៅមុំបី ។ពិធីនេះត្រូវបានរៀបចំធ្វើឡើងនៅសាលាខេត្តសៀមរាប។ 

លោកជំទាវ ស៊ិន ណម បានលើកឡើងថា ក្រោមការយកចិត្តទុកដាក់ខ្ពស់ពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សមាគមនារីកម្ពុជា ដើមី្បសន្តិភាព និងអភិវឌ្ឍន៍ តែងតែយកចិត្តទុកដាក់ និងព្រួយបារម្ភពីសុខទុក្ខរបស់បងប្អូនវីរៈកងទ័ពជួរមុខ គ្រប់កាលៈទេសៈ ក្នុងពេលដែលប្រទេសជិតខាងបានចូលឈ្លានពានទឹកដីកម្ពុជា នៅតាមព្រំដែន។ 

លោកជំទាវ ក៏បានពាំនាំនូវមនោសញ្ចេតនា និងទឹកចិត្តអាណិតស្រឡាញ់ពីរដ្ឋបាលខេត្ត មន្ត្រីរាជការ កងកម្លាំង និងប្រជាពលរដ្ឋខេត្តសៀមរាប  ជូនដល់វីរៈកងទ័ពដែលកំពុងឈរជើងការពារបូរណភាពទឹកដី ។ លោកជំទាវបានបញ្ជាក់ថា ក្នុងនាមសមាគមនារីកម្ពុជា ដើមី្បសន្តិភាព និង អភិវឌ្ឍន៍ សាខាខេត្តសៀមរាប និង ប្រជាពលរដ្ឋនៅសមរភូមិក្រោយបានខិតខំប្រឹងប្រែងក្នុងការកៀរគរសប្បុរសជនជាតិ អន្តរជាតិ បានឧបត្ថម្ភជាស្បៀងអាហារ និងសម្ភារៈ ដើម្បីគាំទ្រដល់កងទ័ពនៅជួរមុខ ដែលបង្ហាញពីសាមគ្គីភាពជាតិដ៏រឹងមាំ ក្នុងស្មារតីមហាគ្រួសារខ្មែរ ខ្មែរជួយខ្មែរ ។ 

លោកជំទាវ ក៏បានធ្វើការបួងសួង សុំឱ្យទេវតាឆ្នាំថ្មីនេះ តាមជួយថែរក្សាការពារដល់កូនៗ វីរៈកងទ័ព និងវីរៈនគរបាលជាតិ ដែលកំពង់ឈរជើងការពារបូរណភាព ព្រំសីមា ឱ្យមានកម្លាំង ពលំ សេចក្តីសុខគ្រប់វិនាទី ឈ្នះអស់មាសត្រូវ និង ទទួលបានជោគជ័យ លើសត្រូវឈ្លានពានទឹកដី នៅគ្រប់សមរភូមិ ៕

ដោយ ឃុត សៅ