AKP​ កំពង់ធំ ថ្ងៃទី១៨ ខែមេសា ឆ្នាំ២០២៦ ---ឧត្តមសេនីយ៍ទោ សោម ស៊ុន មេ បញ្ជាការ តំបន់ប្រតិបត្តិការសឹករងកំពង់ធំ បានដឹកនាំសហការីទៅជួបសំណេះសំណាលសាកសួរសុខទុក្ខ ឧបត្ថម្ភស្បៀងអាហារ គ្រឿងឧបភោគ បរិភោគ ភេសជ្ជៈនិងប្រេងឥន្ធនៈជូនកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកំពុងបំពេញ ភារកិច្ច ក្នុងការការពារ ទប់ស្កាត់ និងបង្ក្រាបបទល្មើសនេសាទ នៅក្នុងភូមិសាស្ត្រ ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ នាព្រឹកថ្ងៃទៅ១៨ខែមេសាឆ្នាំ២០២៦។

លោកអនុសេនីយ៍ឯក ហែម ថន ប្រធានក្រុមទីបញ្ជាការស្រាលប្រចាំការនៅឃុំផាត់សណ្ដាយ ស្រុកកំពង់ស្វាយបានឡើយរាយការណ៍ដោយបញ្ជាក់ថាក្នុងរយៈពេលមុនបុណ្យចូលឆ្នាំ ក្នុងពេលបុណ្យចូលឆ្នាំ និងក្រោយបុណ្យចូលឆ្នាំថ្មីប្រពៃណីជាតិខ្មែរកងកម្លាំងនៅក្នុងទីបញ្ជាការស្រាល បានខិតខំបំពេញ ភារកិច្ចយ៉ាងសកម្មក្នុងការការពារតំបន់អភិរក្សពូជត្រី នៅក្នុងឃុំផាត់សណ្ដាយ ទាំងយប់ទាំងថ្ងៃ ដោយគ្មានបានឈប់សម្រាកឡើយ ។ ហើយ​នៅក្នុងពិធីបុណ្យចូលឆ្នាំថ្មីកន្លងទៅនេះ ក៏នៅមានជនខិលខូចមួយចំនួនតូច នៅតែលួចបំពានដាក់ឧបករណ៍​នេសាទ​ នៅ ក្នុងតំបន់ឡូអភិរក្សពូជត្រី តែត្រូវបានកម្លាំងយើងបង្ក្រាបបាន និងរឹបអូសឧបករណ៍នេសាទល្មើសច្បាប់មួយចំនួនយកមករក្សាទុកនៅទីស្នាក់ការសមត្ថកិច្ចជំនាញផងដែរ។ 

លោកអនុសេនីយ៍ឯក ហែមថនបានបញ្ជាក់ថា ជាទូទៅយើងការពារបានតំបន់ឡូអភិរក្ស ដែលមាននៅក្នុងឃុំផាត់សណ្ដាយ  ហើយបច្ចុប្បន្ននេះ នៅក្នុងឡូអភិរក្សទាំងនោះពូជត្រីបានសំបូរយ៉ាងច្រើនជាងបណ្ដាលឆ្នាំមុនៗ​។

 ជាមួយនោះដែរ អនុសេនីយ៍​ឯក​ហែម​ ថន​ក៏បានលើកឡើងអំពីបញ្ហាប្រឈមមួយចំនួនហើយបានសំណូមពរដល់មេបញ្ជាការ តំបន់ប្រតិបត្តិការសឹករងកំពង់ធំ ជួយដោះស្រាយផងដែរ ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះកងកម្លាំងទាំងអស់ ដែលបានខិតខំប្រឹងប្រែងបំពេញភារកិច្ចប្រកបដោយស្មារតីទទួលខុសត្រូវខ្ពស់ នឹងមិនគិតពីថ្ងៃឈប់សម្រាក ពិសេសក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលកន្លងទៅនេះ ដែលជាឱកាសរបស់ជនខិលខូច ក្នុងការលួចប្រព្រឹត្តបទ ល្មើសនេសាទខុសច្បាប់ តែកងកម្លាំងយើងបានទប់ស្កាត់ និងបង្ក្រាបបានទាល់ពេលវេលា។ 

ឧត្តមសេនីយ៍ទោ សោម ស៊ុន បានប្រគល់ភារកិច្ចជូនកងកម្លាំង នៃបញ្ជា ការដ្ឋានតំបន់ប្រតិបត្តិការសឹករងកំពង់ធំ ដែលប្រចាំការនៅទីបញ្ជាការស្រាល បង្ក្រាបបទល្មើសនេសាទខុសច្បាប់ នៅក្នុងឃុំផាត់សណ្ដាយ ត្រូវបន្តយកចិត្តទុកដាក់ នៅភារកិច្ចសំខាន់ៗមួយចំនួនគឺ៖ទី១.ត្រូវសាមគ្គីសហការគ្នាល្អ ជាមួយកម្លាំងចម្រុះ និងបណ្ដាស្ថាប័នពាក់ព័ន្ធ ក្នុងការបំពេញភារកិច្ចឱ្យទទួលបានជោគជ័យតាមបទបញ្ជារបស់សម្ដេចប្រមុខរាជរដ្ឋាភិបាលនៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ។ទី២.ត្រូវរួមគ្នាផ្សព្វផ្សាយ អប់រំប្រជាពលរដ្ឋឱ្យគាត់បានយល់ជ្រួតជ្រាបអំពីច្បាប់ស្ដីពីជលផលថ្មីនិងណែនាំជូនគាត់ក្នុងការការពារតំបន់អភិរក្សពូជត្រី ដើម្បីទុកឱ្យផលត្រីពងកូនសំបូរឡើងវិញ សម្រាប់បម្រើសេចក្ដីត្រូវការរបស់ប្រជាពលរដ្ឋនៅទូទាំងប្រទេ ស។ទី៣.ដាច់ខាត ត្រូវបន្តការពារឱ្យបានតំបន់អភិរក្សពូជត្រី នឹងត្រូវរួមគ្នាបន្តបង្ក្រាបឧបករណ៍នេសាទល្មើសច្បាប់នៅក្នុងតំបន់លំហបឹងទន្លេសាប និងទី៤.មិនត្រូវគប់គិតជាមួយជនល្មើស ក្នុងការទទួលផលប្រយោជន៍ពីបទល្មើសនេសាទខុសច្បាប់ជាដាច់ខាត។

 ក្នុងករណីរកឃើញយោធិនណាម្នាក់ មានការពាក់ព័ន្ធក្នុងករណីនេះត្រូវទទួលវិន័យយ៉ាងម៉ឺងម៉ាត់របស់កងយោធពលខេមរភូមិន្ទនិងច្បាប់របស់រដ្ឋដោយគ្មានការលើកលែងឡើយ។

នៅក្នុងឱកាសនោះឧត្តមសេនីយ៍ទោ សោម ស៊ុន បាននាំយកនៅស្បៀងអាហារ គ្រឿងឧបភោគបរិភោគ ភេសជ្ជៈ និងប្រេងឥន្ធនៈ ដែលជាអំណោយរបស់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានក្រុមការងាររបស់រាជរដ្ឋាភិបាលចុះមូលដ្ឋានខេត្តកំពង់ធំ ឧបត្ថម្ភជូនកងកម្លាំងដើម្បីបន្តសកម្មភាពដោយគ្មានការដកថយឡើយ៕

ដោយ៖ ស៊ុម វណ្ណា