AKP ភ្នំពេញ ថ្ងៃទី១៧ ខែមេសា ឆ្នាំ២០២៦ -- ក្រសួងការបរទេសប៉ាគីស្ថានបាននិយាយកាលពីថ្ងៃព្រហស្បតិ៍ថា សហរដ្ឋអាមេរិក និងអ៊ីរ៉ង់នៅតែមានឆន្ទៈក្នុងការចូលរួម ខណៈដែលការសន្ទនានៅតែបន្ត ដោយជំរុញឱ្យមានការសង្ស័យអំពីកិច្ចចរចាជុំទីពីរដែលអាចកើតមាននៅទីក្រុងអ៊ីស្លាម៉ាបាដ។

អ្នកនាំពាក្យក្រសួង លោក តាហៀ អេនដ្រាប៊ី (Tahir Andrabi) បាននិយាយថា ព័ត៌មានលម្អិតអំពីគណៈប្រតិភូសហរដ្ឋអាមេរិក និងអ៊ីរ៉ង់ដែលមានសក្តានុពល គឺជាបញ្ហាផ្ទៃក្នុងរបស់ភាគីពាក់ព័ន្ធ។ នេះបើយោងតាមការផ្សាយរបស់ទូរទស្សន៍ក្នុងស្រុក Geo TV។

ថ្លែងនៅក្នុងសន្និសីទសារព័ត៌មានមួយនៅទីក្រុងអ៊ីស្លាម៉ាបាដ លោកអេនដ្រាប៊ី បាននិយាយថា កម្មវិធីនុយក្លេអ៊ែររបស់អ៊ីរ៉ង់ គឺជាបញ្ហាមួយក្នុងចំណោមបញ្ហាដែលត្រូវបានពិភាក្សានៅក្នុងកិច្ចចរចាដែលកំពុងដំណើរការ។

ការអត្ថាធិប្បាយទាំងនេះកើតឡើង ខណៈដែលប៉ាគីស្ថានបង្កើនកិច្ចខិតខំប្រឹងប្រែងសម្របសម្រួល បន្ទាប់ពីកិច្ចចរចារវាងសហរដ្ឋអាមេរិក និងអ៊ីរ៉ង់រយៈពេល ១៦ម៉ោងកាលពីចុងសប្តាហ៍ ដែលបានបញ្ចប់ដោយគ្មានកិច្ចព្រមព្រៀង។

នាយករដ្ឋមន្ត្រីប៉ាគីស្ថាន លោក ស្សេបាស់ ស្សារីហ្វ (Shehbaz Sharif) កំពុងបំពេញទស្សនកិច្ចក្នុងតំបន់ ដែលរួមមានប្រទេសអារ៉ាប៊ីសាអូឌីត កាតា និងតួកគី ខណៈដែលមេបញ្ជាការកងទ័ពប៉ាគីស្ថាន លោកឧត្តមសេនីយ៍ អាស៊ីម មូនៀរ (Asim Munir) កំពុងបំពេញទស្សនកិច្ចនៅអ៊ីរ៉ង់ ដើម្បីពិភាក្សាជាមួយមេដឹកនាំអ៊ីរ៉ង់។

ប៉ាគីស្ថានបានរៀបចំកិច្ចចរចាទាំងនេះ បន្ទាប់ពីបានសម្របសម្រួលបទឈប់បាញ់រយៈពេល ១៤ថ្ងៃរវាងសហរដ្ឋអាមេរិក និងអ៊ីរ៉ង់ កាលពីថ្ងៃទី០៨ខែមេសា។

លោក អេនដ្រាប៊ី ក៏បានថ្កោលទោសចំពោះការវាយប្រហាររបស់អ៊ីស្រាអែលនៅលីបង់ផងដែរ ដោយលោកបាននិយាយថា ស្ថានភាពនៅទីនោះ គឺជាផ្នែកមួយនៃកិច្ចចរចាទូលំទូលាយ និងដំណើរការសន្តិភាពក្នុងតំបន់។

លោក អេនដ្រាប៊ី បាននិយាយថា «ការបន្ធូរបន្ថយភាពតានតឹងនឹងជួយបង្កើតបរិយាកាសអំណោយផលសម្រាប់កិច្ចសន្ទនា"៕

ដោយ៖ យា ចិន្ដាខន្ដី (ប្រភព៖ AA-AKP)