AKP ភ្នំពេញ ថ្ងៃទី១៧ ខែមេសា ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បាននិយាយថា អ៊ីស្រាអែល និងលីបង់ បានព្រមព្រៀងគ្នាចាប់ផ្តើមបទឈប់បាញ់រយៈពេល ១០ថ្ងៃ ដោយចាប់ផ្តើមពីម៉ោង ៥:០០នាទីល្ងាច (ម៉ោងស្តង់ដារភាគខាងកើត) (២១:០០GMT) កាលពីថ្ងៃព្រហស្បតិ៍ បន្ទាប់ពីកិច្ចចរចាថ្មីៗនៅទីក្រុងវ៉ាស៊ីនតោន។

លោក ត្រាំ បាននិយាយនៅក្នុងសេចក្តីថ្លែងការណ៍មួយថា «ខ្ញុំទើបតែមានការសន្ទនាដ៏ល្អជាមួយប្រធានាធិបតីដ៏គួរឱ្យគោរព លោក ចូសេហ្វ អាអួន (Joseph Aoun) នៃប្រទេសលីបង់ និងលោកនាយករដ្ឋមន្ត្រី ប៊ីប៊ីណេតាន់យ៉ាហ៊ូ (Bibi Netanyahu) នៃប្រទេសអ៊ីស្រាអែល» ដោយលោកបានបន្ថែមថា មេដឹកនាំទាំងពីរបានព្រមព្រៀងគ្នាចាប់ផ្តើមបទឈប់បាញ់ជាផ្លូវការ ក្នុងកិច្ចខិតខំប្រឹងប្រែងដើម្បីសម្រេចបានសន្តិភាពរវាងប្រទេសរបស់ពួកគេ។

ការប្រកាសនេះធ្វើឡើងបន្ទាប់ពីកិច្ចចរចាដែលសម្របសម្រួលដោយសហរដ្ឋអាមេរិករវាងគណៈប្រតិភូលីបង់ និងអ៊ីស្រាអែល ដែលបានធ្វើឡើងកាលពីថ្ងៃអង្គារ នៅក្រសួងការបរទេសក្នុងទីក្រុងវ៉ាស៊ីនតោនឌីស៊ី។ ក្រុមហេសបូឡារបស់លីបង់មិនត្រូវបានតំណាងនៅក្នុងកិច្ចប្រជុំនោះទេ ហើយបានបដិសេធចំពោះកិច្ចការនេះ។

លោកបានបន្ថែមថា លោកបានណែនាំដល់អនុប្រធានាធិបតីសហរដ្ឋអាមេរិក លោក ជេឌី វែនស៍ (JD Vance) រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីអូ (Marco Rubio) និងប្រធានអគ្គសេនាធិការចម្រុះ លោក ឌែន ខេន (Dan Caine) ឱ្យធ្វើការជាមួយភាគីទាំងពីរឆ្ពោះទៅរកសន្តិភាពយូរអង្វែង។

លោក ត្រាំ បាននិយាយថា «វាជាកិត្តិយសរបស់ខ្ញុំក្នុងការដោះស្រាយសង្គ្រាមចំនួន៩ នៅទូទាំងពិភពលោក ហើយនេះនឹងជាលើកទី១០ របស់ខ្ញុំ»។

នៅក្នុងសេចក្តីថ្លែងការណ៍ទីពីរនៅលើបណ្តាញសង្គម Truth Social របស់លោក លោក ត្រាំ បាននិយាយថា លោកនឹងធ្វើជាម្ចាស់ផ្ទះទទួលលោក អាអួន និងលោក ណេតាន់យ៉ាហ៊ូ ទៅកាន់សេតវិមានសម្រាប់កិច្ចពិភាក្សាដ៏មានអត្ថន័យជាលើកដំបូងរវាងអ៊ីស្រាអែល និងលីបង់ចាប់តាំងពីឆ្នាំ១៩៨៣ មក។

លោកបាននិយាយថា «ភាគីទាំងពីរចង់ឃើញសន្តិភាព ហើយខ្ញុំជឿថារឿងនោះនឹងកើតឡើងយ៉ាងឆាប់រហ័ស»៕

ដោយ៖ យា ចិន្ដាខន្ដី (ប្រភព៖ AA-AKP)