AKP ភ្នំពេញ ថ្ងៃទី១៦ ខែមេសា ឆ្នាំ២០២៦ -- ទីក្រុងវ៉ាស៊ីនតោនមិនទាន់បាន «យល់ព្រមជាផ្លូវការ» ដើម្បីប​ន្តបទឈប់បាញ់ជាមួយអ៊ីរ៉ង់នៅឡើយទេប៉ុន្តែកិច្ចខិតខំប្រឹងប្រែងផ្នែកការទូតដើម្បីឈានដល់កិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់នៅតែបន្ត។ នេះបើយោងតាមមន្ត្រីជាន់ខ្ពស់អាម៉េរិកម្នាក់បាននិយាយកាលពីថ្ងៃពុធ។

មន្ត្រីរូបនេះបានប្រាប់សារព័ត៌មានអាណាដូលូថា «សហរដ្ឋអាមេរិកមិនទាន់បានយល់ព្រមជាផ្លូវការចំពោះការបន្តបទឈប់បាញ់នៅឡើយទេ។មានការបន្តចូលរួមរវាងសហរដ្ឋអាមេរិក និងអ៊ីរ៉ង់ដើម្បីឈានដល់កិច្ចព្រមព្រៀងមួយ»។

កិច្ចចរចាត្រូវបានធ្វើឡើងនៅរដ្ឋធានីអ៊ីស្លាម៉ាបាដរបស់ប្រទេសប៉ាគីស្ថានកាលពីចុងសប្តាហ៍មុន ដើម្បីព្យាយាមបញ្ចប់សង្គ្រាមអាម៉េរិក-អ៊ីស្រាអែលទៅលើអ៊ីរ៉ង់ជាអចិន្ត្រៃយ៍ ដែលបានចាប់ផ្តើមនៅថ្ងៃទី២៨ខែកុម្ភៈ ប៉ុន្តែមិនមានកិច្ចព្រមព្រៀងណាមួយត្រូវបានសម្រេចក្នុងអំឡុងពេលចរចានោះទេ។

កិច្ចចរចាទាំងនោះត្រូវបានធ្វើឡើងបន្ទាប់ពីប្រទេសប៉ាគីស្ថានទទួលបានបទឈប់បាញ់រយៈពេលពីរសប្តាហ៍កាលពីថ្ងៃទី០៨ ខែមេសា។ កិច្ចព្រមព្រៀងនោះត្រូវបានកំណត់ឱ្យផុតកំណត់នៅសប្តាហ៍ក្រោយ។

មន្ត្រីអាម៉េរិកពីររូបបានប្រាប់គេហទំព័រសារព័ត៌មាន Axios ថាទីក្រុងវ៉ាស៊ីនតោន និងទីក្រុងតេអេរ៉ង់ បានខិតជិតដល់ការឈានដល់កិច្ចព្រមព្រៀងមួយដើម្បីបញ្ចប់សង្គ្រាមជាអចិន្ត្រៃយ៍កាលពីថ្ងៃអង្គារ ដោយខិតជិតដល់ក្របខ័ណ្ឌមួយនៃការព្រមព្រៀងគ្នាក្រោមការសម្របសម្រួលពីប្រទេសប៉ាគីស្ថាន អេហ្ស៊ីប និងតួកគី។

គណៈប្រតិភូប៉ាគីស្ថានដឹកនាំដោយសេនាប្រមុខ អាស៊ិម មូនៀ (AsimMunir) បានទៅដល់ទីក្រុងតេអេរ៉ង់កាលពីថ្ងៃពុធ ដើម្បីព្យាយាមបង្រួមភាពខុសគ្នាដែលនៅសេសសល់។ មន្ត្រីប៉ាគីស្ថានម្នាក់បានប្រាប់សារព័ត៌មានAxios ថា «ចូរយើងរង់ចាំមើលថា តើយើងអាចទទួលបានកិច្ចព្រមព្រៀងឬអត់។ យើងមានសង្ឃឹម ហើយយើងព្យាយាមជំរុញជាមួយភាគីទាំងពីរ»។

លោក មូនៀ និងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) មានចំណងមិត្តភាពដ៏កក់ក្តៅ ហើយលោក ត្រាំបានកោតសរសើរម្តងហើយម្តងទៀតចំពោះកិច្ចខិតខំប្រឹងប្រែងរបស់លោកមូនៀ។

ដោយ៖ យា ចិន្ដាខន្ដី (ប្រភព៖ AA-AKP)