AKP ភ្នំពេញ ថ្ងៃទី១៦ ខែមេសា ឆ្នាំ២០២៦

សម្រាប់ថ្ងៃទី៣ ឬថ្ងៃឆ្លងនៃពិធីបុណ្យចូលឆ្នាំថ្មីប្រពៃណីជាតិខ្មែរ ហៅថា «វារៈឡើងស័ក» គឺជាថ្ងៃបញ្ចប់ពិធីសង្ក្រាន្តទាំង៣ថ្ងៃ ។ នៅថ្ងៃនេះ ពលរដ្ឋខ្មែរតែងនាំគ្នាទៅវត្តអារាមដើម្បីរាប់បាត្រ ពូនភ្នំខ្សាច់ ស្តាប់ធម៌ទេសនា និងជាពិសេសធ្វើពិធី «ស្រង់ព្រះ» ដើម្បីសុំខមាទោស និងទទួលពរជ័យសិរីសួស្ដីឆ្នាំថ្មី។ 

នៅក្នុងថ្ងៃស្រង់ព្រះនេះដែរ ពុទ្ធបរិស័ទទាំងជិតឆ្ងាយតែងតែមកវត្តនៅក្នុងថ្ងៃនោះ ដើម្បីធ្វើពិធីស្រង់ព្រះដោយមានទឹកអប់ ទឹកលាយជាមួយផ្កាភ្ញី ដើម្បីស្រោចស្រពដល់ព្រះបដិមា ព្រះសង្ឃ ចាស់ព្រឹទ្ធាចារ្យ។ ជាមួយនឹងពិធីនេះដែរ ពលរដ្ឋខ្មែរ ក៏តែងមានជំនឿតៗគ្នាយូរមកហើយថា ស្រង់ព្រះទាំងព្រះបដិមាថ្ម និងព្រះរស់ អ្នកមានគុណ សុទ្ធតែទទួលបានមកវិញនូវសិរីសួស្តី ត្រជាក់ត្រជុំគ្រប់ក្រុមគ្រួសារ កាច់ផ្តាច់កម្មអកុសល ហើយសាងនូវកុសលថ្មីមកជំនួសវិញ។

ក្នុងពិធីស្រង់ព្រះទាំងព្រះបដិមាថ្ម ឬសូម្បីតែស្រង់ព្រះរស់ ដែលមានការងូតទឹកជូនដល់ឪពុកម្តាយ តាយាយ ឬអ្នកមានគុណ សុទ្ធសឹង តែទទួលបានមកវិញនូវសេចក្ដីសុខ ចម្រើន ត្រជាក់ត្រជុំ។ ចំពោះការរៀបចំពិធីនេះ ទឹក តំណាងដោយភាពត្រជាក់ ខណៈពេលការស្រោចស្រពលើរាងកាយជនណាម្នាក់ហើយ នឹងបានត្រជាក់។ ទាំងអ្នកស្រោចស្រពឱ្យគេ និងគេស្រោចឱ្យសុទ្ធតែស្រស់ស្រាយនូវសទ្ធាជ្រះថ្លា កើតជាសិរីសួស្តី និងមានកុសលផលបុណ្យទាំងជាតិនេះនិងជាតិខាងមុខ។ 

ទាក់ទិនក្នុងរឿងនេះព្រះតេជគុណរះសុមេធិវង្ស បណ្ឌិត សុខ ប៊ុនធឿន ព្រះចៅអធិការវត្តនទ្ទមុនី ស្ថិតនៅសង្កាត់ស្ទឹងមានជ័យ ខណ្ឌមានជ័យ ក្នុងរាជធានីភ្នំពេញ បានមានសង្ឃដីការបញ្ជាក់ប្រាប់AKPឱ្យដឹងថា ពិធីស្រង់ព្រះតាមជំនឿសាសនានេះគេច្រើនធ្វើឡើងនៅថ្ងៃទី៣ ដែលត្រូវនឹងថ្ងៃឡើងស័ក ថ្ងៃចុងក្រោយ នៃពិធីបុណ្យចូលឆ្នាំថ្មីប្រពៃណីខ្មែរ។ ព្រះអង្គបានឱ្យដឹងទៀតថា ពុទ្ធបរិស័ទទាំងជិតឆ្ងាយតែងតែមកវត្តអារាមនៅក្នុងថ្ងៃនោះ ដើម្បីធ្វើពិធីស្រង់ព្រះដោយមានទឹកលាយជាមួយ ផ្កាភ្ញី ទឹកអប់ ដើម្បីស្រោចស្រពដល់ព្រះបដិមាតាមទីវត្តអារាម។ក្រៅពីការរៀបចំពិធីស្រង់ព្រះបដិមាករគេក៏មានស្រង់ព្រះរស់ដោយក្នុងនេះងូតទឹកជូនដល់តាយាយ ឪពុកម្តាយ ឬចាស់ទុំក្នុងភូមិខ្លួនរស់នៅ ។ ព្រះអង្គបានសង្កត់ធ្ងន់ថា៖ «ចំពោះ ការនាំគ្នារៀបចំពិធីនេះគឺក្នុងគោលបំណង សងគុណចំពោះ មាតាបិតា ឬចាស់ទុំដែលបានផ្តល់កំណើត និងធ្លាប់ចិញ្ចឹមបីបាច់។ ក្រៅអំពីការស្រង់ទឹកដល់ឪពុកម្តាយ ជីដូនជីតា ឬចាស់ទុំក្នុងស្រុកភូមិហើយគេក៏អាចធ្វើការស្រង់ទឹកដល់គ្នាទៅវិញទៅមកដែលបញ្ជាក់នូវក្នុងការគោរព រាប់អានគ្នាដែរ។»

ព្រះតេជគុណរះសុមេធិវង្ស បណ្ឌិត សុខ ប៊ុនធឿន មានសង្ឃដីការបន្ថែមថា ពិធីស្រង់ព្រះនេះគឺមានអត្ថន័យជ្រៅជ្រះរបស់ខ្មែរយើង។នៅសម័យព្រះពុទ្ធក៏មានពិធីស្រង់ព្រះនេះដែរ។ទំនៀមទំលាប់នេះអនុវត្តរហូតមកដល់បច្ចុប្បន្ន។

ទាក់ទិនទៅនឹងពិធីស្រង់ព្រះនេះដែរ ឯកឧត្ដម ឧទ្ទេសាចារ្យ សាន សម្ផស្ស អនុរដ្ឋលេខាធិការ នៃក្រសួងធម្មការ និងសាសនា បានឱ្យដឹងថា ការស្រង់ព្រះមានតាំងតែពីការស្រង់ ព្រះពុទ្ធរូប ស្រង់ព្រះសង្ឃ ស្រង់ព្រះរស់គឺស្រង់ មាតាបិតា ស្រង់ទឹកជីដូនជីតា ស្រង់គ្រូឧជ្ឈាយ៍អាចារ្យ  គឺបានបុណ្យច្រើនណាស់ក្នុងនេះអាចកើតជាទេវតា បានកើតជាស្តេចចក្រពត្តិ និងពិសេសមានរូបសម្រស់ស្អាត មានទ្រព្យច្រើនសុខភាពល្អជាដើម។

ឯកឧត្តម លើកឡើងដោយបញ្ជាក់ថា ចំពោះអត្ថន័យទឹកវិញដែលគេយកមកប្រើស្រង់នេះគឺមានន័យទៅដល់ការលាងជម្រះធុលី ឱ្យចេញអស់ពីរាងកាយ ហើយបានបង្កើតមកវិញនូវភាពជ្រះថ្លា និងសិរីសួស្តី។

ក្នុងរយៈពេល៣៦៥ថ្ងៃ ពិធីចូលឆ្នាំមានត្រឹមតែ៣ថ្ងៃទេ និងចំរដូវដែលមានអាកាសធាតុក្ដៅ (ខែចេត្រ) ដែលអត្ថន័យនៃពិធីនេះ មិនខុសអីពីការសម្តែងដឹងគុណដល់អ្នកមានគុណទេ ពីព្រោះព្រះបដិមាសំដៅលើព្រះពុទ្ធ ដែលជាព្រះសម្តែងធម៌ទេសនាប្រោសមនុស្សសត្វអស់កាលដ៏យូរ ដូច្នេះពុទ្ធបរិស័ទមកសម្តែងគុណដោយធ្វើពិធីស្រង់ព្រះ លាងស្រោចដោយទឹកអប់ផ្កាភ្ញីជម្រះធូលីឱ្យត្រជាក់។ ចំណែកឯមាតាបិតា ឬចាស់ព្រឹទ្ធាចារ្យ ឬអ្នកមានគុណ កូនចៅមកស្រោចទឹក ឬងូតទឹកដុសក្អែលឱ្យក៏ដើម្បីបង្ហាញពីការដឹងគុណ និងឱ្យបានត្រជាក់ ពីឆ្នាំចាស់ផ្លាស់ឆ្នាំថ្មី ទាំងអស់គ្នា។

សូមបញ្ជាក់ផងដែរថា ក្នុងពិធីបុណ្យចូលឆ្នាំថ្មីប្រពៃណីជាតិឆ្នាំនេះត្រូវនឹងថ្ងៃអង្គារ ១២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២៦ មហាសង្ក្រាន្ត វេលាម៉ោង ១០ និង ៤៨នាទីព្រឹក ជាថ្ងៃចូលឆ្នាំថ្មី ឆ្នាំមមី អដ្ឋស័ក, ថ្ងៃពុធ ១៣រោច ខែចេត្រ ត្រូវនឹងថ្ងៃទី១៥ ខែមេសា ឆ្នាំ២០២៦ ជាវារៈវ័នបត, ថ្ងៃព្រហស្បតិ៍ ១៤រោច ខែចេត្រ ត្រូវនឹងថ្ងៃទី១៦ ខែមេសា ឆ្នាំ២០២៦ ជាវារៈឡើងស័ក គម្រប់សង្ក្រាន្ត ៣ថ្ងៃ ចប់ដោយបរិបូណ៌ ចូលឆ្នាំមមី អដ្ឋស័កតែម្តង៕

ដោយ៖ មករា និង រិទ្ធី