AKP កែប ថ្ងៃទី១៥ ខែមេសា ឆ្នាំ២០២៦-- បរិយាកាសសប្បាយរីករាយ បានកើតមានឡើងនៅតំបន់ឆ្នេរអង្កោល ខេត្តកែប ខណៈដែលឯកឧត្តមបណ្ឌិត សោម ពិសិដ្ឋ អភិបាលខេត្តកែប និងលោកជំទាវ រួមទាំងមន្រ្តីរាជការនៃរដ្ឋបាលស្រុកដំណាក់ចង្អើរ កងកម្លាំងគ្រប់ប្រភេទ បានអញ្ជើញចូលរួមលេងល្បែងប្រជាប្រិយខ្មែរ ជាមួយបងប្អូនប្រជាពលរដ្ឋ និងភ្ញៀវទេសចរ ក្នុងឱកាសអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរនាឆ្នាំនេះ។

កម្មវិធីនេះ បានរៀបចំឡើងដោយមានល្បែងប្រជាប្រិយជាច្រើន ដូចជា ទាញព្រ័ត្រ វាយក្អម ដណ្តើមស្លឹកឈើ  ជាដើម ក៏មានដែរនូវការរាំលេងកម្សាន្តសប្បាយ ដែលនេះបានបង្កើតភាពសប្បាយរីករាយ និងរឹតបន្តឹងសាមគ្គីភាពរវាងប្រជាពលរដ្ឋ ភ្ញៀវទេសចរ និងមន្រ្តីរាជការ ក្នុងនាមខ្មែរតែមួយ។ 

ឯកឧត្តមអភិបាលខេត្ត បានបង្ហាញនូវភាពស្និទ្ធស្នាល ដោយចូលរួមលេងជាមួយប្រជាពលរដ្ឋយ៉ាងកក់ក្តៅ និងលើកទឹកចិត្តឱ្យបន្តថែរក្សាប្រពៃណីវប្បធម៌ខ្មែរ ដ៏ល្អផូរផង់។

ព្រឹត្តិការណ៍នេះ មិនត្រឹមតែបង្កើតភាពសប្បាយរីករាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរប៉ុណ្ណោះទេ ប៉ុន្តែថែមទាំងជួយទាក់ទាញភ្ញៀវទេសចរ ឱ្យចូលមកលេង និងកម្សាន្តនៅខេត្តកែបកាន់តែច្រើន និងជំរុញវិស័យទេសចរណ៍ក្នុងមូលដ្ឋានឱ្យកាន់តែមានភាពរស់រវើកផងដែរ។

ដោយ ង៉ុង សាន់