AKP ភ្នំពេញ ថ្ងៃទី១៣ ខែមេសា ឆ្នាំ២០២៦ -- ប្រធានាធិបតីឥណ្ឌូណេស៊ីលោក ប្រាបូវ៉ូ ស៊ូប៊ីយ៉ាន់តូ (Prabowo Subianto) បានប្រកាសថា ប្រទេសឥណ្ឌូណេស៊ីមានគោលបំណងបញ្ឈប់ការនាំចូលប្រេងឥន្ធនៈទាំងអស់ក្នុងរយៈពេលពីរទៅបីឆ្នាំខាងមុខ ខណៈដែលប្រទេសនេះកំពុងពង្រឹងកិច្ចខិតខំប្រឹងប្រែងដើម្បីពង្រឹងភាពគ្រប់គ្រាន់ផ្នែកថាមពលជាតិ។

លោកបាននិយាយថា គោលដៅបែបនេះនឹងត្រូវបានសម្រេចតាមរយៈកម្មវិធីអគ្គិសនីភាវូបនីយកម្ម ១០០ជីហ្គាវ៉ាត់ ដែលត្រូវបានគេរំពឹងថានឹងបញ្ចប់ក្នុងរយៈពេលពីរឆ្នាំខាងមុខ។

កម្មវិធីនេះរួមមានការបិទរោងចក្រថាមពលដើរដោយប្រេងម៉ាស៊ូតចំនួន១៣ ដែលគ្រប់គ្រងដោយក្រុមហ៊ុន PT PLN ដែលបច្ចុប្បន្នប្រើប្រាស់ប្រេងឥន្ធនៈយ៉ាងច្រើន។ ការបិទរោងចក្រថាមពលដើរដោយប្រេងម៉ាស៊ូតទាំងនោះត្រូវបានគេរំពឹងថានឹងសន្សំសំចៃប្រេងម៉ាស៊ូតរហូតដល់២០០.០០០បារ៉ែលក្នុងមួយថ្ងៃ។

បច្ចុប្បន្ន ប្រទេសឥណ្ឌូណេស៊ីនាំចូលប្រេងឥន្ធនៈចំនួន ១លានបារ៉ែលជារៀងរាល់ថ្ងៃ ដូច្នេះ ការកាត់បន្ថយការប្រើប្រាស់ប្រេងម៉ាស៊ូតនឹងកាត់បន្ថយការពឹងផ្អែកនាំចូលបាន ២០%។

បន្ថែមពីលើការកែច្នៃរោងចក្រថាមពលដើរដោយអគ្គិសនី រដ្ឋាភិបាលឥណ្ឌូណេស៊ីកំពុងលើកកម្ពស់យានយន្តអគ្គិសនី និងការប្រើប្រាស់ប្រភពថាមពលកកើតឡើងវិញផ្សេងទៀត។ ដំណោះស្រាយរួមមាន ការកែច្នៃប្រេងដូង និងប្រេងចម្អិនអាហារដែលប្រើរួចទៅជាប្រេងឥន្ធនៈអាកាសចរណ៍ ដើម្បីកាត់បន្ថយការពឹងផ្អែកលើប្រេងឥន្ធនៈហ្វូស៊ីល។

លោកប្រធានាធិបតី ប្រាបូវ៉ូ បានសង្កត់ធ្ងន់ថា ការវិនិយោគដ៏ច្រើនសន្ធឹកសន្ធាប់នឹងត្រូវបានបែងចែកទៅឱ្យការអភិវឌ្ឍមជ្ឈមណ្ឌលកែច្នៃ ឬរោងចក្រចម្រាញ់ប្រេង ដើម្បីគាំទ្រដល់ការផ្លាស់ប្តូរនេះ។

លោកបានសម្ពោធរោងចក្រផលិតយានយន្តនៅ Magelang ដែលជាផ្នែកមួយនៃកិច្ចខិតខំប្រឹងប្រែងដើម្បីលើកទឹកចិត្តដល់ការផលិត និងឧស្សាហូបនីយកម្មនៃបច្ចេកវិទ្យាក្នុងស្រុក។

តាមរយៈការបង្កើនសមត្ថភាពផលិតដល់ ១.០០០គ្រឿងក្នុងមួយឆ្នាំរដ្ឋាភិបាលកំពុងខិតខំពង្រឹងប្រព័ន្ធអេកូឡូស៊ីយានយន្តជាតិ ខណៈដែលបង្កើនស្តង់ដារកម្រិតសមាសធាតុក្នុងស្រុក (TKDN) បន្តិចម្តងៗរហូតដល់៨០%។

រោងចក្រនេះត្រូវបានចាត់ទុកថាជាឧបករណ៍យុទ្ធសាស្ត្រមួយក្នុងការគាំទ្រដល់ការផ្លាស់ប្តូរថាមពលរបស់ប្រទេសឥណ្ឌូណេស៊ីពីការពឹងផ្អែកលើឥន្ធនៈហ្វូស៊ីលទៅជាថាមពលស្អាត៕

ដោយ៖ យា ចិន្ដាខន្ដី (ប្រភព៖ VNA)