AKP ភ្នំពេញ ថ្ងៃទី១៣ ខែមេសា ឆ្នាំ២០២៦ -- ទីភ្នាក់ងារសារព័ត៌មានជាតិលីបង់បានរាយការណ៍ថា នាយករដ្ឋមន្ត្រីលីបង់ លោក ណាវ៉ាហ្វ សាឡាម (Nawaf Salam) បាននិយាយកាលពីថ្ងៃអាទិត្យថា ប្រទេសលីបង់កំពុងខិតខំប្រឹងប្រែងដើម្បីបញ្ឈប់សង្គ្រាមដែលកំពុងបន្ត ហើយលោកបានសង្កត់ធ្ងន់លើតម្រូវការក្នុងការការពារឯកភាពជាតិ និងកសាងរដ្ឋឡើងវិញ។

លោក សាឡាម បានធ្វើការកត់សម្គាល់នេះ ខណៈពេលកំពុងរំលឹកខួបនៃការផ្ទុះឡើងនៃសង្គ្រាមស៊ីវិលលីបង់នៅថ្ងៃទី១៣ ខែមេសា ឆ្នាំ១៩៧៥។

លោកបាននិយាយថា គោលបំណងមិនត្រឹមតែដើម្បីការពារការវិលត្រឡប់ទៅរកសង្គ្រាមស៊ីវិលប៉ុណ្ណោះទេ ប៉ុន្តែថែមទាំងដើម្បីកសាងរដ្ឋដ៏យុត្តិធម៌ រឹងមាំ និងរួបរួមសម្រាប់ទាំងអស់គ្នាផងដែរ។ លោកបានបញ្ជាក់ពីសារៈសំខាន់នៃការអនុវត្តកិច្ចព្រមព្រៀង Taif យ៉ាងពេញលេញ ដោយលោកអំពាវនាវឱ្យកែតម្រូវការអនុវត្តខុសណាមួយដែលរំលោភលើអក្សរ និងស្មារតីរបស់វា។

កិច្ចព្រមព្រៀង Taif ដែលត្រូវបានចរចានៅប្រទេសអារ៉ាប៊ីសាអូឌីតក្នុងឆ្នាំ១៩៨៩ និងត្រូវបានអនុម័តនៅពេលក្រោយនៃឆ្នាំនោះ បានបញ្ចប់សង្គ្រាមស៊ីវិលរយៈពេល ១៥ឆ្នាំនៅក្នុងប្រទេសលីបង់ និងបានបញ្ជាក់ឡើងវិញនូវសិទ្ធិអំណាចរបស់រដ្ឋាភិបាលលីបង់នៅភាគខាងត្បូង។

ក្រុមហេសបូឡាហ៍បានចូលរួមក្នុងជម្លោះរវាងសហរដ្ឋអាមេរិក-អ៊ីស្រាអែល-អ៊ីរ៉ង់នៅថ្ងៃទី២ ខែមីនា ដោយបាញ់រ៉ុក្កែតពីភាគខាងត្បូងប្រទេសលីបង់ឆ្ពោះទៅកាន់ប្រទេសអ៊ីស្រាអែលជាលើកដំបូងចាប់តាំងពីបទឈប់បាញ់នៅថ្ងៃទី២៧ ខែវិច្ឆិកា ឆ្នាំ២០២៤ ដែលជំរុញឱ្យអ៊ីស្រាអែលអនុវត្តន៍យុទ្ធនាការយោធាកាន់តែខ្លាំងឡើងដែលផ្តោតលើតំបន់ជាច្រើននៅទូទាំងប្រទេស។

ប្រទេសអ៊ីរ៉ង់ និងសហរដ្ឋអាមេរិកបានយល់ព្រមលើបទឈប់បាញ់នៅថ្ងៃពុធ។ អ៊ីស្រាអែលបាននិយាយថា ខ្លួននឹងគោរពតាមបទឈប់បាញ់ ប៉ុន្តែបានអះអាងថា កិច្ចព្រមព្រៀងនេះមិនអនុវត្តចំពោះប្រទេសលីបង់ទេ។ ការអះអាងនោះត្រូវបានបដិសេធដោយអ៊ីរ៉ង់ និងអ្នកសម្របសម្រួលប៉ាគីស្ថាន។

យោងតាមសេចក្តីថ្លែងការណ៍របស់មជ្ឈមណ្ឌលប្រតិបត្តិការសង្គ្រោះបន្ទាន់សុខភាពសាធារណៈរបស់ប្រទេសលីបង់កាលពីថ្ងៃអាទិត្យ បានឱ្យដឹងថា ការវាយប្រហាររបស់អ៊ីស្រាអែលលើប្រទេសលីបង់ចាប់តាំងពីថ្ងៃទី២ខែមីនា បានសម្លាប់មនុស្សចំនួន ២.០៥៥នាក់ និងរបួស ៦.៥៨៨នាក់៕

ដោយ៖ មូល មិនា (ប្រភព៖ ស៊ីនហួ)