AKP ភ្នំពេញ ថ្ងៃទី១០ ខែមេសា ឆ្នាំ២០២៦ -- ទីភ្នាក់ងារអនុវត្តច្បាប់សមុទ្រម៉ាឡេស៊ី (MMEA) បានបញ្ជាក់សារជាថ្មីនូវការប្តេជ្ញាចិត្តរបស់ខ្លួនក្នុងការពង្រឹង និងបង្កើនប្រតិបត្តិការអនុវត្តច្បាប់នៅក្នុងដែនទឹកជាតិ ដើម្បីបង្ក្រាបការរត់ពន្ធ និងការផ្ទេរប្រេងខុសច្បាប់ រួមទាំងការផ្គត់ផ្គង់ប្រេងឥន្ធនៈដោយគ្មានការអនុញ្ញាតដល់នាវា។

លោក ម៉ូដ រ៉ូសលី អាប់ឌុលឡា (Mohd Rosli Abdullah) អគ្គនាយកកងទ័ពជើងទឹកនៃទីភ្នាក់ងារ MMEA បាននិយាយថា ទីភ្នាក់ងារនេះត្រៀមខ្លួនរួចជាស្រេចដើម្បីដឹកនាំកិច្ចខិតខំប្រឹងប្រែងផ្នែកសមុទ្រ ដើម្បីទប់ស្កាត់ការលេចធ្លាយ និងការរត់ពន្ធប្រេងម៉ាស៊ូតដែលមានការឧបត្ថម្ភធន។

កាលពីឆ្នាំមុន ទីភ្នាក់ងារ MMEA បានរឹបអូសប្រេងឥន្ធនៈដែលមានតម្លៃជិត ៦,៥លានរីងហ្គីត (ប្រហែល ១,៦លានដុល្លារអាម៉េរិក) ដែលក្នុងនោះមានប្រេងម៉ាស៊ូតចំនួន ១៣.២៩០លីត្រ និងប្រេងសាំងចំនួន ២៤៧.៣៣៣លីត្រ។

បច្ចុប្បន្ន ទីភ្នាក់ងារនេះកំពុងបង្កើនសកម្មភាពឃ្លាំមើលជាយុទ្ធសាស្ត្ររបស់ខ្លួន ដោយប្រើប្រាស់បច្ចេកវិទ្យាផ្កាយរណបក្នុងតំបន់ ការល្បាត និងការប្រមូលព័ត៌មានស៊ើបការណ៍សម្ងាត់នៅចំណុចក្តៅសំខាន់ៗ ដើម្បីទប់ស្កាត់ការរត់ពន្ធប្រេងឥន្ធនៈ និងការពារដែនទឹកជាតិ។ ទីភ្នាក់ងារ MMEA បានព្រមានថា ខ្លួននឹងមិនអត់ឱនចំពោះការរំលោភបំពានណាមួយនៃការឧបត្ថម្ភធនរបស់រដ្ឋាភិបាល និងមិនលើកលែងចំពោះការដោះស្រាយការរំលោភច្បាប់ឡើយ។

ទន្ទឹមនឹងនេះ ឧបនាយករដ្ឋមន្ត្រីម៉ាឡេស៊ី លោកស្រី ហ្វាឌីឡា យូសូហ្វ (Fadillah Yusof) បាននិយាយថា គណៈកម្មាធិការសម្របសម្រួលអន្តរស្ថាប័នកម្រិតខ្ពស់ ស្តីពីការប្រយុទ្ធប្រឆាំងនឹងការលេចធ្លាយ និងការរត់ពន្ធ ដែលលោកជាប្រធាន នឹងចាត់វិធានការយ៉ាងម៉ឺងម៉ាត់ រួមទាំងការផ្អាក និងដកហូតការអនុម័តប័ណ្ណបើកបរសម្រាប់ភាគីណាមួយដែលត្រូវបានរកឃើញថាកំពុងរំលោភបំពានការឧបត្ថម្ភធនប្រេងម៉ាស៊ូតក្រោមគម្រោងគ្រប់គ្រងប្រេងម៉ាស៊ូតឧបត្ថម្ភធន (SKDS)។

លោកស្រី ហ្វាឌីឡា ដែលជារដ្ឋមន្ត្រីក្រសួងថាមពល និងការផ្លាស់ប្តូរទឹកផងដែរនោះ បាននិយាយថា គណៈកម្មាធិការបានយល់ព្រមតែងតាំងភ្នាក់ងារនាំមុខសម្រាប់វិស័យសំខាន់ៗចំនួនបី ដើម្បីដោះស្រាយបញ្ហាលេចធ្លាយ ដែលរួមមានវិស័យដីធ្លីដែលត្រួតពិនិត្យដោយក្រសួងពាណិជ្ជកម្មក្នុងស្រុក និងថ្លៃដើមរស់នៅ (KPDN) វិស័យព្រំដែន ដោយប៉ូលិសរាជម៉ាឡេស៊ី (PDRM) និងវិស័យសមុទ្រ ដោយទីភ្នាក់ងារ MMEA៕

ដោយ៖ យា ចិន្ដាខន្ដី (ប្រភព៖ VNA)