AKP សៀមរាប ថ្ងៃទី៦ ខែមេសា ឆ្នាំ២០២៦--លោកឧត្តមសេនីយ៍ទោ ហួត សុធី ស្នងការនៃស្នងការរដ្ឋាននគរបាលខេត្តសៀមរាប និងព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក និងជាទីប្រឹក្សាពុទ្ធកសមាគមកម្ពុជារដ្ឋ នៅរសៀលថ្ងៃទី៥ ខែមេសា ឆ្នាំ២០២៦ បានផ្តល់ស្បៀងអាហារជាលើកទឹកចិត្តក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ជូនដល់ប្រជាការពារភូមិចំនួនប្រមាណជាង៤០០នាក់។

ព្រះគ្រូវិចិត្រវង្សា ហែម គឹមសាន  បានមានថេរដីកាថា ការជួបសំណេះសំណាលសួរសុខទុក្ខ និងផ្តល់ជាស្បៀងអាហារដើម្បីជួយសម្រួលជីវភាពរបស់បងប្អូនប្រជាការពារភូមិ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលនេះគឺជាសកម្មភាពសប្បុរសធម៌ និងជាការលើកទឹកចិត្តដ៏សំខាន់ ដើម្បីទទួលស្គាល់ការលះបង់កម្លាំងកាយចិត្តក្នុងការរក្សាសន្តិសុខសណ្តាប់ធ្នាប់មូលដ្ឋានហើយនិងដើម្បីសម្តែងនូវការដឹងគុណ ដែលបានខិតខំចំណាយកម្លាំងកាយកម្លាំងចិត្តការពារសន្តិសុខ សណ្តាប់ធ្នាប់ជូនភូមិ-ឃុំ សង្កាត់។

ព្រះគ្រូវិចិត្រវង្សាបានមានថេរដីកាបន្តថា កម្លាំងប្រជាការពារពិតជាដើរតួនាទីសំខាន់មួយ សម្រាប់សុខសុវត្ថិភាពពលរដ្ឋលើសពីនេះ កងប្រជាការពារ គឺជាអ្នកធ្វើការដោយគ្មានប្រាក់ខែឡើយ ហើយក្នុងរយៈពេលកន្លងមកតែងតែសង្កេតឃើញពីភាពសកម្មរបស់បងប្អូនប្រជាការពារភូមិទាំងអស់ ទោះបីក្នុងកាលៈទេសៈណាក៏ដោយ បងប្អូនមិនដែលរុញរានឹងការល្បាត ការការពារសុវត្ថិភាពជូនពលរដ្ឋនោះឡើយ ហើយបងប្អូនគឺជា "ភ្នែក និងច្រមុះ" ដ៏សំខាន់បំផុតរបស់អាជ្ញាធរ។ បើគ្មានការចូលរួមពីបងប្អូនទេសន្តិសុខនៅក្នុងមូលដ្ឋានក៏មិនអាចរឹងមាំបានល្អដូចសព្វថ្ងៃនេះដែរ។

លោកឧត្តមសេនីយ៍ទោ ហួត សុធី បានថ្លែងកោតសរសើរដោយស្មោះចំពោះស្មារតីលះបង់របស់បងប្អូនប្រជាការពារ ដែលជាកម្លាំងជំនួយយ៉ាងសកម្ម និងជិតស្និទ្ធបំផុតជាមួយនគរបាលប៉ុស្តិ៍រដ្ឋបាលក្នុងការរក្សាសន្តិសុខតាមខ្នងផ្ទះប្រជាពលរដ្ឋ ហើយសន្តិសុខ និងភាពសុខសាន្តដែលយើងមានសព្វថ្ងៃ មិនអាចខ្វះបាននូវការចូលរួមចំណែកដោយស្ម័គ្រចិត្តនិងការយាមកាមយ៉ាងសកម្មរបស់បងប្អូននៅតាមមូលដ្ឋាននោះឡើយ។ 

លោកឧត្តមសេនីយ៍ទោ ក៏បានណែនាំ និងរំលឹកបងប្អូនអ្នកភូមិ ឱ្យមានការប្រុងប្រយ័ត្នខ្ពស់ចំពោះភ្លើងទៀន ធូប ចង្ក្រាន និងចរន្តអគ្គិសនី ដើម្បីចៀសវាងគ្រោះអគ្គិភ័យដែលអាចកើតឡើងជាយថាហេតុ។ សូមជួយសហការជាមួយកម្លាំងនគរបាលប៉ុស្តិ៍ ដើម្បីសម្រួលចរាចរណ៍នៅតាមដងផ្លូវក្នុងភូមិ និងនៅតាមច្រកចូលវត្តអារាម ដើម្បីបង្ការការកកស្ទះ និងគ្រោះថ្នាក់ចរាចរណ៍។ ត្រូវតាមដាន និងរាយការណ៍ជាបន្ទាន់ជូននគរបាលយុត្តិធម៌ ប្រសិនបើមានការលួចលាក់លេងល្បែងស៊ីសងខុសច្បាប់ដែលបង្កឱ្យមានភាពអសន្តិសុខក្នុងសហគមន៍។   ក្នុងការអនុវត្តភារកិច្ច បងប្អូនត្រូវប្រកាន់ខ្ជាប់នូវក្រមសីលធម៌ រក្សាភាពអត់ធ្មត់ និងប្រើប្រាស់សម្ដីសមរម្យជាមួយប្រជាពលរដ្ឋ។ក្នុងករណីមានបទល្មើស ឬហេតុការណ៍មិនប្រក្រតីណាមួយកើតឡើង ត្រូវរាយការណ៍មកប៉ុស្តិ៍រដ្ឋបាល ឬអធិការដ្ឋានឱ្យបានឆាប់បំផុតតាមរយៈប្រព័ន្ធទំនាក់ទំនងដែលមាន៕

ដោយ ឃុត សៅ