AKP ព្រះសីហនុ ថ្ងៃទី៥ ខែមេសា ឆ្នាំ២០២៦​ -- រសៀលថ្ងៃអាទិត្យទី៥ ខែមេសា ឆ្នាំ២០២៦ រដ្ឋបាលខេត្តព្រះសីហនុ បានរៀបចំពិធីសាសនាសូត្រមន្ត ចម្រើនព្រះបរិត្ត ដើម្បីទទួលសិរីសួស្ដី ជ័យមង្គលក្នុងឱកាសពិធីបុណ្យចូលឆ្នាំថ្មីប្រពៃណីជាតិ ដែលនឹងប្រព្រឹត្តទៅនៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ខាងមុខ ពិធីសូត្រមន្តនេះ មានការចូលរួមពីឯកឧត្តម វង្ស​ ផាណាត ប្រធានក្រុមប្រឹក្សាខេត្តនិងលោកជំទាវ ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុនិងលោកជំទាវ ព្រមទាំងមន្ត្រីរាជការ មន្ទីរ អង្គភាព និងកងកម្លាំងប្រដាប់អាវុធ។

ឯកឧត្តមម៉ាង ស៊ីណេត អភិបាលខេត្តព្រះសីហនុ បានឪ្យដឹងថា ដើម្បីអបអរសាទរ​​ពិធីបុណ្យចូលឆ្នាំថ្មី ប្រពៃណីជាតិដែលនឹងឈានចូលមកដល់នាពេលខាងមុខនេះ​ រដ្ឋបាលខេត្តព្រះសីហនុបានរៀបចំពិធីសូត្រមន្ត ចម្រើន​ព្រះបរិត្ត ដើម្បីបណ្ដេញឧបទ្រពចង្រៃ និងប្រសិទ្ធពរជ័យ សិរីសួស្ដី ជ័យមង្គល ជូនដល់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងបងប្អូនប្រជាពលរដ្ឋនៅទូទាំងខេត្តព្រះ សីហនុ ។​​  

ក្នុងឱកាសដ៏វិសេសវិសាលនេះ ថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធបានសម្ដែងនូវសេចក្តីសប្បាយរីករាយ និងបានបួងសួងដល់ព្រះរតនត្រ័យ ជាពិសេសទេវតាឆ្នាំថ្មី ដែលនឹងចុះមកថែរក្សា សូមតាមជួយបីបាច់ថែរក្សាដល់ថ្នាក់ដឹកនាំ វីរៈកងទ័ព មន្ត្រីរាជការ ប្រជាពលរដ្ឋគ្រប់រូបនៅក្នុងខេត្តព្រះសីហនុ និងបងប្អូនប្រជាពលរដ្ឋដែលមកលេងកម្សាន្តក្នុងខេត្តព្រះសីហនុ ឪ្យមានសុខភាពល្អ កម្លាំងកាយខ្លាំងក្លាប្រកបដោយសុវត្ថិភាពគ្រប់គ្នា ក្នុងការធ្វើដំណើរកម្សាន្តគ្រប់ ទីកន្លែង។ 

ពិធីបុណ្យចូលឆ្នាំថ្មី ប្រពៃណីជាតិខ្មែរ រដ្ឋបាលខេត្តព្រះសីហនុបានរៀបចំធ្វើឡើងតាមទំនៀមទំលាប់ប្រពៃណីជាតិខ្មែរ​ ដោយស្មារតីសាមគ្គីភាព មិត្តភាព កិច្ច សហប្រតិបត្ដិការគ្នាកាន់តែរឹងមាំ​​​ ក្នុងស្មារតីខ្មែរ ជួយខ្មែរ ៕ 

ដោយ ងូ សុមុនី