AKP កំពង់ធំ ថ្ងៃទី០៥ ខែមេសាឆ្នាំ២០២៦​ -- ឯកឧត្តម អេង ទូច រដ្ឋលេខាធិការទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងស្ទឹងសែន និងក្រុមការងាររាជរដ្ឋាភិបាលចុះមូលដ្ឋានក្រុង លោក ឡុង គឺសឹង អភិបាល នៃគណៈអភិបាលក្រុងស្ទឹងសែន ព្រមទាំងក្រុមការងាររដ្ឋបាលក្រុងស្ទឹងសែនបានអញ្ជើញចែកអំណោយជូនប្រជាពលរដ្ឋក្រីក្រកំរិត១ចំនួន៤០០គ្រួសារមកពីសង្កាត់ស្រយ៉ូវ សង្កាត់ដំរីជាន់ខ្លា និងសង្កាត់កំពង់រទេះ ក្រុងស្ទឹងសែន ខេត្តកំពង់ធំក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាព្រឹកថ្ងៃទី០៥ ខែមេសា ឆ្នាំ២០២៦ នៅបរិវេណវត្តសែនសេរី (វត្តក្តីសែន)សង្កាត់ស្រយ៉ូវក្រុងស្ទឹងសែន ។

លោក ឡុង គឺសឹងអភិបាល នៃគណៈអភិបាលក្រុងស្ទឹងសែន បានលើកឡើងពីកិច្ចខិតខំប្រឹងប្រែងដោះស្រាយនូវទុក្ខលំបាកនិងបញ្ហាប្រឈមក្នុងជីវភាពរស់នៅរបស់បងប្អូនប្រជាពលរដ្ឋ ជនងាយរងគ្រោះ មានចាស់ជរា ស្រ្តីមេម៉ាយ ជាពិសេសគ្រួសារក្រីក្រ១ នាពេលនេះ ដែលមានចំនួន៤០០គ្រួសារ ដើម្បីឱ្យពួកគាត់បានដោះស្រាយជីវភាពបានមួយមួយរយ:នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ។

ក្នុងឱកាសនោះឯកឧត្តម អេង ទូចបានពាំនាំនូវការផ្ដាំផ្ញើសួរសុខទុក្ខដល់បងប្អូនទាំងអស់របស់ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ គឺត្រូវបង្កើនទំនាក់ទំនងជិតស្និទ្ធរវាងអាជ្ញាធរ និងប្រជាពលរដ្ឋ យល់ដឹងពីបញ្ហាពិតប្រាកដនៅមូលដ្ឋាន។ ផ្តល់ជំនួយឬដោះស្រាយបញ្ហាបានទាន់ពេលវេលា លើកទឹកចិត្ត និងផ្តល់កម្លាំងចិត្តដល់ប្រជាពលរដ្ឋជូនពួកគាត់ឱ្យបានលឿនបំផុត។

ឯកឧត្តម អេង ទូច រដ្ឋលេខាធិការទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងស្ទឹងសែន បានផ្ដាំផ្ញើដល់ប្រជាពលរដ្ឋឱ្យរក្សាសុខភាពឱ្យបានល្អ ពិសេសរក្សាអនាម័យបីប្រការ(ហូបស្អាត ផឹកស្អាត និងរស់នៅស្អាត) ព្រោះរដូវនេះជារដូវក្តៅ។ អាជ្ញាធរមូលដ្ឋានមានការយល់ដឹងអំពីជីវភាពរស់នៅ និងបញ្ហាប្រឈមរបស់ប្រជាពលរដ្ឋ ព្រមទាំងលើកទឹកចិត្តឱ្យមានភាពរួបរួមនិងសាមគ្គីភាពក្នុងសង្គម។ ផ្តល់កម្លាំងចិត្ត ការលើកទឹកចិត្តនិងការធ្វើឱ្យប្រជាពលរដ្ឋមានទំនុកចិត្តលើការដឹកនាំ។ ជួយបង្កើនការយល់ចិត្តគ្នា និងបង្កើតសង្គមមួយដែលមានការយកចិត្តទុកដាក់ និងការចែករំលែកគ្នាទៅវិញទៅមក។ 

សូមបញ្ជាក់ថា ប្រជាពលរដ្ឋដែលមានជីវភាពខ្វះខាតគ្រួសារក្រីក្រ១ចំនួន៤០០គ្រួសារ ក្នុង១គ្រួសារទទួលបាននូវអង្គរ២៥គីឡូក្រាម ទឹកត្រី០១យួរ និងថវិកាចំនួន៥ម៉ឺនរៀល ដែលជាការឧបត្ថម្ភគាំទ្រផ្ទាល់របស់ ឯកឧត្តម អេង ទូច រដ្ឋលេខាធិការទីស្តីការគណៈ រដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងស្ទឹងសែន៕

ដោយ ស៊ុម វណ្ណា