AKP បន្ទាយមានជ័យ ថ្ងៃទី0៥ ខែមេសា ឆ្នាំ២០២៦ -- ក្នុងស្មារតីសាមគ្គីភាព និងការយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋដែលរងផលប៉ះពាល់ដោយសារជម្លោះព្រំដែន លោក ឃ្លោក នួយ អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ ឯកឧត្តម អ៊ុ រាត្រី អភិបាលខេត្ត បានអញ្ជើញជាអធិបតីក្នុងកម្មវិធីមនុស្សធម៌ដ៏ធំមួយ ក្រោមប្រធានបទ «ចូលឆ្នាំថ្មីកូកាកូឡា ដើរផ្សារមិនអស់លុយ»។ កម្មវិធីនេះ បាននាំមកនូវក្តីសង្ឃឹម និងការឧបត្ថម្ភស្បៀងអាហារ ដល់គ្រួសារជនភៀសសឹកចំនួន ១ ៦៦៦ គ្រួសារនៅព្រឹកថ្ងៃទី០៥ ខែមេសា ឆ្នាំ២០២៦នេះ ស្ថិតនៅលានដំឡូង ស សេងថៃ ភូមិចក់ពួក ឃុំស្លក្រាម ស្រុកស្វាយចេក។

យុទ្ធនាការមនុស្សធម៌នេះ កើតឡើងតាមរយៈការសម្របសម្រួលរបស់អង្គការដៃគូសហការ និងដោយមានការឧបត្ថម្ភពីក្រុមហ៊ុន កូកាកូឡា ខេមបូឌា និងក្រុមហ៊ុន អេហ្វ អាយ ឡាក់គី ប្រាយវេត លីមីតធីត។ នេះគឺជាការឆ្លើយតបយ៉ាងទាន់ពេលវេលា ចំពោះតម្រូវការចាំបាច់របស់បងប្អូនប្រជាពលរដ្ឋ ដែលកំពុងស្នាក់នៅបណ្ដោះអាសន្ន ក្នុងផ្ទះអតីតយុទ្ធជន បន្ទាប់ពីបានភៀសខ្លួនចេញពីតំបន់មានជម្លោះ។  

ថ្លែងក្នុងឱកាសនោះ លោក ឃ្លោក នួយ បានពាំនាំនូវប្រសាសន៍សួរសុខទុក្ខពីសំណាក់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលជានិច្ចកាលតែងតែគិតគូរពីសុវត្ថិភាព និងជីវភាពរបស់ពលរដ្ឋនៅតាមខ្សែបន្ទាត់ព្រំដែន។ លោកអភិបាលរងខេត្តបានបញ្ជាក់ថា រាជរដ្ឋាភិបាល រួមជាមួយរដ្ឋបាលខេត្ត មិនទុកឱ្យបងប្អូនណាម្នាក់នៅឯកោដោយគ្មានការជួយជ្រោមជ្រែងនោះឡើយ បើទោះបីជាស្ថានភាពបច្ចុប្បន្នបងប្អូនមិនទាន់អាចត្រឡប់ទៅកាន់ភូមិឋានវិញបានក៏ដោយ។ លោកអភិបាលរងខេត្ដក៏បានរម្លឹកដោយការសោកស្តាយចំពោះសកម្មភាពរំលោភបំពានពីសំណាក់ភាគីថៃ នាពេលកន្លងមក ដែលបានប្រើប្រាស់ទូកុងតឺន័រ និងការព័ទ្ធលួសបន្លាទន្ទ្រានចូលមកដីខ្មែរ ដែលបង្ខំឱ្យបងប្អូនពលរដ្ឋម្ចាស់ដី ត្រូវចាកចេញពីលំនៅឋានមកស្នាក់នៅក្នុងមណ្ឌលសុវត្ថិភាពបណ្ដោះអាសន្ន។
លោកអភិបាលរងខេត្ដបានសង្កត់ធ្ងន់ថា៖ «ទោះបីជាការរស់នៅបណ្តោះអាសន្ននេះមានការលំបាក តែរាជរដ្ឋាភិបាល និងអាជ្ញាធរខេត្ត បានខិតខំរៀបចំជម្រក បណ្តាញទឹក ភ្លើង និងសុខុមាលភាពជូនបងប្អូនឱ្យអស់ពីលទ្ធភាព»។

ជាមួយគ្នានេះដែរ លោកអភិបាលរងខេត្ត ក៏បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុន កូកា-កូឡា ក្រុមហ៊ុនឡាក់គី និងអង្គការដៃគូសហការ ដែលបានរៀបចំកម្មវិធី «ដើរផ្សារមិនអស់លុយ» នេះឡើង។ កម្មវិធីនេះមិនត្រឹមតែផ្ដល់នូវសម្ភារៈប្រើប្រាស់ និងស្បៀងអាហារប៉ុណ្ណោះទេ ប៉ុន្តែវាគឺជាការលើកទឹកចិត្តដ៏ធំធេងដល់គ្រួសារភៀសសឹក ឱ្យមានកម្លាំងចិត្តបន្តតស៊ូក្នុងឱកាសបុណ្យចូលឆ្នាំថ្មីប្រពៃណីជាតិដែលខិតជិតមកដល់។
លោក ឃ្លោក នួយ បានអំពាវនាវដល់បងប្អូនប្រជាពលរដ្ឋទាំងអស់ ឱ្យរក្សាភាពអត់ធ្មត់ និងជឿជាក់លើការដោះស្រាយតាមផ្លូវច្បាប់ និងការទូតរបស់រាជរដ្ឋាភិបាល ដើម្បីឈានទៅរកការបោះបង្គោលព្រំដែនឱ្យបានច្បាស់លាស់ និងការវិលត្រឡប់ទៅរស់នៅដោយសុខសាន្តលើទឹកដីដូនតារបស់ខ្លួនវិញនាពេលឆាប់ៗខាងមុខនេះ៕

ដោយ៖ ឈុន សារ៉ាត