AKP កំពង់ធំ ថ្ងៃទី០៥ ខែមេសាឆ្នាំ២០២៦ -- ឯកឧត្តម ថោង ខុន ទេសរដ្ឋមន្រ្តីទទួលបន្ទុកបេសកកម្មពិសេសតំណាងឯកឧត្តម វង្សី វិស្សុតឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីនិងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ កាលពីព្រឹកថ្ងៃទី០៤ ខែមេសា ឆ្នាំ២០២៦បានអញ្ជើញជាអធិបតីក្នុងពិធីបុណ្យពុទ្ធាភិសេកនិងសម្ពោធសមិទ្ធផលនានានៅវត្តគុហនគរស្ថិតក្នុងឃុំពង្រ ស្រុកតាំងគោកខេត្តកំពង់ធំ ដោយមានការនិមន្តនិងអញ្ជើញចូលរួមពីព្រះមង្គលសីលវ័ន្ត លីម វុឌ្ឍី ព្រះអនុគណស្រុកតាំងគោក ព្រះគ្រូមុនីសីលវង្ស តុន ពិសី ព្រះចៅអធិការវត្តគុហនគរ ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំនិងស្រុកតាំងគោក ក្រុមប្រឹក្សាខេត្តកំពង់ធំ លោក ព្រឹម រដ្ឋា អភិបាលរងខេត្តកំពង់ធំលោក ហាក់ ម៉ុងហួត អភិបាលស្រុកតាំងគោក ក្រុមប្រឹក្សាឃុំពង្រ មេឃុំ មេភូមិ លោកគ្រូ អ្នកគ្រូ សិស្សានុសិស្ស លោកយាយ លោកតានិងប្រជាពលរដ្ឋយ៉ាងច្រើនកុះករ។

ក្នុងឱកាសនោះ  ឯកឧត្តមទេសរដ្ឋមន្រ្តី ថោង ខុន បានពាំនាំនូវការសាកសួរសុខទុក្ខ ដោយក្ដីនឹករឮកពីសម្ដេចតេជោ ហ៊ុន សែន ប្រធានព្រឹទ្ធសភានិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនិងលោកជំទាវបណ្ឌិត ពេជ ចន្ទមុនី្ន ហ៊ុន ម៉ាណែតនិងឯកឧត្តម វង្សី វិស្សុតជូនដល់លោកយាយ លោកតា អ៊ុំ ពូ មីង និងប្រជាពលរដ្ឋនៅឃុំពង្រ  ស្រុកតាំងគោក ខេត្តកំពង់ធំ។

ឯកឧត្តមទេសរដ្ឋមន្រ្តីថោង ខុនបានបញ្ជាក់ថា ការកសាងសមិទ្ធផលទាំងនេះមិនគ្រាន់តែជាបុណ្យកុសលដ៏ធំធេងក្នុងការលើកស្ទួយវិស័យព្រះពុទ្ធសាសនានៅកម្ពុជាប៉ុណ្ណោះទេប៉ុន្តែថែមទាំងជួយដល់ការអភិវឌ្ឍនៅមូលដ្ឋានផងដែរ ហើយការចូលរួមបរិច្ចាគធនធានសម្រាប់កសាងសមិទ្ធផលទាំងនេះបានជួយទៅដល់សង្គមជាតិផងនិងបានផល្លានិសង្ឃដល់ខ្លួនឯងសម្រាប់ជាតិនេះនិងជាតិក្រោយៗទៀត។ផ្នែកពុទ្ធចក្រនិងអាណាចក្រគឺត្រូវដើរទន្ទឹមគ្នា ពឹងគ្នាទៅវិញទៅមកនិងជួយទំនុកបម្រុងគ្នាទៅវិញទៅមក។

ឯកឧត្តមទេសរដ្ឋមន្ត្រីបានបន្ថែមថា វត្តអារាមមានតួនាទីយ៉ាងសំខាន់ណាស់នៅក្នុងព្រះពុទ្ធសាសនាជាទីស្នាក់ អាស្រ័យរបស់ព្រះសង្ឃជាទីកន្លែងសិក្សាធម៌វិន័យធ្វើវិបស្សនានិងសម្តែងធម្មទេសនាអប់រំឧបាសក ឧបាសិកា និងពុទ្ធបរិស័ទ។ 

ដោយឡែកនៅក្នុងវត្តគុហនគរនេះគឺមានប្រាសាទបុរាណដ៏ចំណាស់ហៅថា "ប្រាសាទគុហនគរ"គឺជារមណីយដ្ឋានវប្បធម៌ ប្រវត្តិសាស្ត្រដ៏សំខាន់មួយស្ថិតនៅក្នុងឃុំពង្រស្រុកតាំងគោក ខេត្តកំពង់ធំ។ ប្រាសាទនេះត្រូវបានកសាងឡើងដោយព្រះបាទសូរ្យវរ្ម័នទី១ឧទ្ទិសដល់ព្រហ្មញ្ញសាសនា ហើយក្រោយមកបានប្រែក្លាយជាទីវត្តអារាមសម្រាប់ព្រះពុទ្ធសាសនារហូតមកដល់បច្ចុប្បន្ននេះ។ក្នុងផែនការយុទ្ធសាស្រ្តអភិវឌ្ឍន៍ទេសចរណ៍ខេត្តកំពង់ធំក៏មានផែនការរៀបចំវត្តគុហនគរនេះជាវត្តទេសចរណ៍គំរូសម្រាប់ទាក់ទាញទេសចរជាតិនិងអន្តរជាតិផងដែរ។ 

ឯកឧត្តម ថោង ខុនបានផ្តាំផ្ញើដល់ពុទ្ធបរិស័ទ្ទនិងប្រជាពលរដ្ឋនូវ៥ចំនុចរួមមាន៖ទី១.ត្រូវមានជំនឿជឿជាក់លើការដឹកនាំរបស់រាជរដ្ឋាភិបាល ដែលមានសម្តេចតេជោ ប្រធានព្រឹទ្ធសភានិងសម្តេចមហាបវរធិបតីនាយករដ្ឋមន្រ្តី ក្នុងការដោះស្រាយបញ្ហា ព្រំដែនជាមួយប្រទេសថៃដោយសន្តិវិធីនិងផ្អែកលើច្បាប់អន្តរជាតិ។ទី២.ត្រូវរួមកម្លាំងសាមគ្គីជាធ្លុងមួយដើម្បីចូលរួមចំណែកការពារប្រទេសពីការឈ្លានពានពីបរទេសនិងរួមកម្លាំងគ្នាក្នុងការកសាងអភិវឌ្ឍន៍ប្រទេសជាតិដោយត្រូវប្រឹងឈរខ្លួនឯងខិតខំខ្លួនឯងនិងម្ចាស់ការខ្លួនឯង។ទី៣.យុវជនជំនាន់ក្រោយ ត្រូវសិក្សារៀនសូត្រនិងយល់ដឹងច្បាស់អំពីប្រវត្តិសាស្ត្រ ភូមិសាស្រ្តនយោបាយនិងច្បាប់អន្តរជាតិនានាដើម្បីចូលរួមការពារអធិបតេយ្យភាពនិងបូរណភាពទឹកដីខ្មែរ។ទី៤.ត្រូវចេះរៀនរស់នៅក្នុងសភាពការណ៍ ដោយត្រូវចេះសន្សំសំចៃកាត់បន្ថយការចំណាយដែលមិនចាំបាច់និងរកវិធីដាំដុះបន្លែបង្កានិងចិញ្ចឹមសត្វដើម្បីផ្គត់ផ្គង់ជីវភាពគ្រួសារនិងទី៥.សូមចូលរួមថែរក្សាសមិទ្ធផលថ្មីៗទាំងនេះឱ្យបានគង់វង្សទុកជាទ្រព្យសម្បត្តិរួមនិងជាទីសក្ការៈគោរពបូជារបស់ពុទ្ធសាសនិកជនទាំងអស់៕

ដោយ។ ស៊ុម វណ្ណា