AKP ភ្នំពេញ ថ្ងៃទី៤ ខែមេសា ឆ្នាំ២០២៦--
ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ: នៃអាជ្ញាធរជាតិប្រយុទ្ធប្រឆាំងគ្រឿងញៀនបាត់ទុកព្រឹត្តិការណ៍ប្រកួតវោហាកោសល គឺបានផ្ដល់ចំណេះដឹងដល់និស្សិតពីបញ្ហាគ្រឿងញៀន App NoDrug និងបារីអេឡិចត្រូនិក។ ការលើកឡើងរបស់ឯកឧត្ដម ឧត្តមសេនីយ៍ឯក បែបនេះ ក្រោយការប្រកួតវោហាកោសល្យរបស់និស្សិតវិទ្យាស្ថានជាតិកសិកម្មព្រែកលៀប ដែលមានអ្នកចូលរួមជាង២០០នាក់ បានបញ្ចប់កាលពីថ្ងៃទី៣ ខែមេសា ឆ្នាំ២០២៦ ។ 

ឯកឧត្ដម ឧត្តមសេនីយ៍ឯក លឹម តុងហួត បានពាំនាំនូវប្រសាសន៍ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ថ្លែងអំណរគុណ និងកោតសសើរដល់ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ព្រមទាំងអ្នកពាក់ព័ន្ធដែលបានផ្តល់កិច្ចសហការរៀបចំការប្រកួតឱ្យទទួលបានជោគជ័យហើយនិស្សិតទាំងអស់ទទួលបានចំណេះដឹងពីបញ្ហាគ្រឿងញៀន និងអត្ថប្រយោជន៍ពីការប្រើប្រាស់ App NoDrug និងបារីអេឡិចត្រូនិក ហើយពួកគាត់អាចជាសកម្មជនថ្មី ក្នុងការចូលរួមជួយដល់ការងារផ្សព្វផ្សាយ អប់រំ “ខ្ញុំនិងអ្នក  មិត្តខ្ញុំ និងមិត្តអ្នក មិនប្រើគ្រឿងញៀន សហគមន៍យើង នឹងមានសុវត្ថិភាព”។ 

ជាមួយគ្នានេះដែរ ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានកោតសសើរដល់គ្រប់ភាគីពាក់ព័ន្ធ ពិសេស និស្សិតវិទ្យាស្ថានជាតិកសិកម្មព្រែកលៀប ដែលបានខិតខំប្រកបដោយមនសិកាស្នេហាជាតិ ស្រឡាញ់សង្គម ជួយសង្គម តាមរយ:ការចូលរួមយ៉ាងស្រួចស្រាល សហការគ្នា សាមគ្គីគ្នា ធ្វើការងារជាក្រុម និងចូលរួមឆ្លើយតបនៅប្រធានបទចំនួន៣ រួមមាន៖ ១. តួនាទីយុវជនក្នុងការងារយុទ្ធប្រឆាំងគ្រឿងញៀន ២. អត្ថប្រយោជន៍ App NoDrug និង ៣.ផលវិបាកនៃបារីអេឡិចត្រូនិក បានយ៉ាងល្អ។

ក្នុងឱកាសនោះ ឯកឧត្ដមអនុរដ្ឋលេខាធិការក៏បានណែនាំដល់និស្សិតទាំងអស់ សូមឱ្យយកចំណេះដឹងដែលទទួលបាននេះទៅផ្សព្វផ្សាយបន្តបន្ថែមទៀតដើម្បីរួមគ្នាកសាងបាននូវសហគមន៍មួយមានសុវត្ថិភាពពីគ្រឿងញៀន មានការអភិវឌ្ឍរីកចម្រើនបន្ថែមទៀត៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន