AKP បន្ទាយមានជ័យ ថ្ងៃទី០៤ ខែមេសា ឆ្នាំ២០២៦ --  ក្នុងស្មារតីយកចិត្តទុកដាក់ខ្ពស់ចំពោះសុខទុក្ខ និងការលះបង់ដ៏ខ្ពង់ខ្ពស់របស់កងទ័ពដែលកំពុងឈរជើងការពារបូរណភាពទឹកដី នៅថ្ងៃទី0៤ ខែមេសា ឆ្នាំ ២០២៦ នេះ ឯកឧត្ដម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញចុះសួរសុខទុក្ខដោយផ្ទាល់ដល់យោធិននៅសមរភូមិមុខតាមបណ្តោយព្រំដែនកម្ពុជា-ថៃ ក្នុងភូមិសាស្ត្រខេត្តបន្ទាយមានជ័យ និងខេត្តបាត់ដំបង។

ការអញ្ជើញចុះបំពេញបេសកកម្មរបស់ឯកឧត្តមឧបនាយករដ្ឋមន្ត្រី នាឱកាសនេះ គឺចំពេលដែលប្រទេសជាតិទាំងមូលត្រៀមអបអរសាទរបុណ្យចូលឆ្នាំថ្មី ប្រពៃណីជាតិ ឆ្នាំមមី អដ្ឋស័ក ព.ស. ២៥៧០។ ក្នុងជំនួបសំណេះសំណាលយ៉ាងស្និទ្ធស្នាលជាមួយមេបញ្ជាការ មេបញ្ជាការរង និងពលទាហានទាំងអស់ ឯកឧត្ដម នាយឧត្តមសេនីយ៍ បានសម្តែងនូវការកោតសរសើរ និងវាយតម្លៃខ្ពស់ចំពោះវីរភាព និងការតាំងចិត្តដ៏មោះមុតរបស់យោធិនក្នុងទិសយោធភូមិភាគទី៥ ដែលបានលះបង់ក្តីសុខផ្ទាល់ខ្លួន ដើម្បីយាមល្បាត និងការពារសន្តិសុខតាមបន្ទាត់ព្រំដែនយ៉ាងរឹងមាំ។ ឯកឧត្ដម នាយឧត្តមសេនីយ៍ បានមានប្រសាសន៍ថា ឮ«បេសកកម្មរបស់បងប្អូន គឺជាបេសកកម្មដ៏ឧត្តុង្គឧត្តមបំផុតសម្រាប់ជាតិមាតុភូមិ។ ទោះក្នុងកាលៈទេសៈណាក៏ដោយ កងយោធពលខេមរភូមិន្ទនៅតែជាបង្អែកដ៏រឹងមាំរបស់រាជរដ្ឋាភិបាល និងប្រជាជន»។

ក្នុងឱកាសដ៏វិសេសវិសាលនេះ ឯកឧត្ដមឧបនាយករដ្ឋមន្ត្រី  ទៀ សីហា ក៏បាននាំយកនូវការផ្ដាំផ្ញើសួរសុខទុក្ខ និងពរជ័យសិរីសួស្តីពីសំណាក់ប្រមុខរាជរដ្ឋាភិបាល ជូនដល់យោធិនគ្រប់ជាន់ថ្នាក់ផងដែរ។ ឯកឧត្ដមបានប្រសិទ្ធពរជ័យជូនដល់មេបញ្ជាការ មេបញ្ជាការរង នាយទាហាន នាយទាហានរង និងពលទាហានទាំងអស់ សូមឱ្យជួបតែពុទ្ធពរទាំង ៤ ប្រការ គឺអាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ។

ក្រៅពីការសួរសុខទុក្ខ ឯកឧត្ដមរដ្ឋមន្ត្រីក៏បានសង្កត់ធ្ងន់លើការបន្តពង្រឹងសមត្ថភាព និងការត្រៀមលក្ខណៈជានិច្ច ដើម្បីឆ្លើយតបទៅនឹងរាល់ស្ថានភាពដែលកើតឡើងជាយថាហេតុ។ ឯកឧត្ដមបានជំរុញឱ្យកងកម្លាំងទាំងអស់បន្តបេសកកម្មដ៏ឧត្តុង្គឧត្តមនេះដោយមនសិការស្នេហាជាតិខ្ពស់ ដើម្បីធានាបាននូវសុខសន្តិភាព និងស្ថិរភាពតាមបណ្តោយព្រំដែនយូរអង្វែង។

សកម្មភាពចុះសួរសុខទុក្ខនេះ មិនត្រឹមតែជាការនាំយកនូវអំណោយ និងពរជ័យប៉ុណ្ណោះទេ ប៉ុន្តែគឺជាការផ្ដល់នូវកម្លាំងចិត្តយ៉ាងធំធេងដល់យោធិនជួរមុខឱ្យកាន់តែមានស្មារតីរឹងមាំក្នុងការបំពេញភារកិច្ចការពារជាតិមាតុភូមិឱ្យបានគង់វង្សស្ថិតស្ថេរតរៀងទៅ៕

ដោយ៖ ឈុន សារ៉ាត