AKP ព្រះវិហារ ថ្ងៃទី០៤ ខែមេសា ឆ្នាំ២០២៦-- នៅសាលប្រជុំសាលាខេត្តព្រះវិហារ មានរៀបចំសិក្ខាសាលាផ្សព្វផ្សាយអំពីបេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក) និងពិធីចុះហត្ថលេខាលើអនុស្សរណៈនៃការយោគយល់គ្នាលើកិច្ចសហប្រតិបត្តិការសម្រុះសម្រួលផ្សះផ្សារវិវាទ ជាមួយរដ្ឋបាលខេត្តព្រះវិហារ ក្រោមអធិបតីភាពឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងឯកឧត្តម គីម រិទ្ធី អភិបាលខេត្តព្រះវិហារ កាលពីថ្ងៃទី០៣ ខែមេសា ឆ្នាំ២០២៦។

ឯកឧត្តម គីម រិទ្ធី បានសម្ដែងនូវកិច្ចគោរពស្វាគមន៍ និងថ្លែងអំណរគុណយ៉ាងជ្រាលជ្រៅចំពោះអាជ្ញាធរជាតិដោះស្រាយទំនាស់ក្រៅប្រព័ន្ធតុលាការ ដែលបានរៀបចំសិក្ខាសាលាដ៏មានសារៈសំខាន់ ក្នុងគោលបំណងដើម្បីផ្សព្វផ្សាយដល់រដ្ឋបាលថ្នាក់ក្រោមជាតិនិងមន្ទីរអង្គភាពពាក់ព័ន្ធ ឲ្យស្វែងយល់អំពីបេសកម្មនិងយន្តការនៃការដោះស្រាយបញ្ចប់ជាស្ថាពរ និងវិវាទក្រៅប្រព័ន្ធតុលាការសំដៅពង្រឹងនិងលើកកម្ពស់ប្រព័ន្ធយុត្តិធម៌និងការសម្របសម្រួលដោះស្រាយវិវាទជូនប្រជាពលរដ្ឋនៅមូលដ្ឋានឱ្យបានឆាប់រហ័ស និងមានប្រសិទ្ធភាព។

ឯកឧត្តម ជិន ម៉ាលីន បានគូសបញ្ជាក់ថា សិក្ខាសាលាផ្សព្វផ្សាយ និងពិធីចុះហត្ថលេខាលើអនុស្សរណៈនាពេលនេះ ធ្វើឡើងក្នុងគោលបំណងដើម្បីពង្រឹង និងពង្រីកកិច្ចសហប្រតិបត្តិការក្នុងភាពជាដៃគូសំដៅរួមគ្នាលើកកម្ពស់គុណភាព ប្រសិទ្ធភាព និងភាពឆាប់រហ័សនៃការដោះស្រាយវិវាទតាមរយៈការសម្របសម្រួលដោះស្រាយវិវាទក្រៅប្រព័ន្ធតុលាការ។

ឯកឧត្តមបណ្ឌិតបានបន្តថា រាជរដ្ឋាភិបាល នីតិកាលទី៧នៃរដ្ឋសភាក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានដាក់ចេញនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ដល់លើការកែទម្រង់ការពង្រឹងអភិបាលកិច្ចនិងការធ្វើទំនើបគឺស្ថាប័នរដ្ឋជាស្នូល នៃយុទ្ធសាស្ត្រដើម្បីរៀបចំផែនការសកម្មភាពជាក់ស្ដែងសំដៅសម្រេចឲ្យបាននូវការងារជាអាទិភាពគឺការបង្កើតយន្តការដោះស្រាយវិវាទក្រៅប្រព័ន្ធតុលាការបន្ថែមលើយន្តការដែលមានស្រាប់ដើម្បីជួយសម្របសម្រួលដោះស្រាយវិវាទឲ្យបានឆាប់រហ័ស ជាពិសេសវិវាទរបស់ប្រជាពលរដ្ឋនៅក្នុងមូលដ្ឋាន។

ឯកឧត្តមបណ្ឌិតក៏បានធ្វើការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងក្រុមការងារបច្ចេកទេសនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ និងរដ្ឋបាលខេត្តព្រះវិហារ ដែលបានខិតខំប្រឹងប្រែងយកអស់កម្លាំងកាយចិត្តសហការគ្នាយ៉ាងជិតស្និទ្ធក្នុងការចរចាពិភាក្សា និងរៀបចំឡើងដោយជោគជ័យនៃអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការក្នុងការសម្របសម្រួលផ្សះផ្សារវិវាទរហូតឈានដល់ការចុះហត្ថលេខានាឱកាសនេះ៕

ដោយ ទិត ស្រ៊