AKP ភ្នំពេញ ថ្ងៃទី០៤ ខែមេសា ឆ្នាំ២០២៦-- វីរកណ្តុរ Magawa បានរកឃើញគ្រាប់មីនជាង១០០គ្រាប់ លើផ្ទៃដី ១៤១.០០០ម៉ែត្រក្រឡា ចាប់ពីឆ្នាំ២០១៦-២០២០ នៅលើទឹកដីកម្ពុជា។ ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន បានបញ្ជាក់ឱ្យដឹងបែបនេះ ក្នុងពីធីសម្ពោធរូបសំណាកវីរកណ្តុរហិតមីន Magawa នៃអង្គការដោះមីន APOPO។ វីរកណ្តុរ Magawa បានទទួលមេដាយមាស PDSA (People’s Dispensary for Sick Animals) សម្រាប់ភាពក្លាហានក្នុងការជួយសង្រ្គោះជីវិតមនុស្ស ជាជំនួយរបស់ចក្រភពអង់គ្លេស ក្នុងខែកញ្ញា ឆ្នាំ២០០០ ដោយបានរកឃើញគ្រាប់មីន និងសំណល់ជាតិផ្ទុះពីសង្រ្គាមចំនួនជាង១០០គ្រាប់លើផ្ទៃដីចំនួន១៤១.០០០ម៉ែត្រក្រឡា ចាប់ពីឆ្នាំ២០១៦-២០២០។ ពិធីសម្ពោធនេះបានប្រព្រឹត្ដទៅកាលពីថ្ងៃទី០៣ ខែមេសា ឆ្នាំ២០២៦ នៅខេត្តសៀមរាប ខេត្តព្រះវិហារ តំណាងអង្គភាពស៊ីម៉ាក់ អង្គការ APOPO ប្រតិបត្តិករដោះមីន។

ឯកឧត្តមទេសរដ្ឋមន្រ្តី លី ធុជ បានថ្លែងថា អស់រយៈពេលជាច្រើនឆ្នាំ ប្រជាជនកម្ពុជាមួយចំនួនរស់នៅលើដីដែលមិនជឿទុកចិត្ត មានហានិភ័យខ្ពស់ និងអាចមានគ្រោះថ្នាក់គ្រប់ជំហាន ប៉ុន្តែកណ្តុរហិតមីន Magawa បានរួមចំណែកក្នុងការលុបបំបាត់ហានិភ័យ និងស្តារឡើងវិញនូវទំនុកចិត្តជូនប្រជាជនកម្ពុជា។ គ្រាប់មីន និងសំណល់ជាតិផ្ទុះពីសង្រ្គាមចំនួនជាង១០០គ្រាប់ ត្រូវបានរកឃើញតាមរយៈការងាររបស់កណ្តុរ Magawa និងបានធ្វើឱ្យកុមារដើរលេងប្រកបដោយសុវត្ថិភាព កសិករធ្វើស្រែដោយសេរី ហើយសហគមន៍កសាងឡើងវិញដោយមិនស្ទាក់ស្ទើរ។ កណ្តុរ Magawa បន្សល់ទុកច្រើនជាងកំណត់ត្រានៃការរកឃើញ ព្រមទាំងបានបង្កើតនូវស្តង់ដារមួយ គឺស្តង់ដារនៃការអត់ធ្មត់ និងស្តង់ដារនៃការជឿទុកចិត្តលើការងារ។

ឯកឧត្តមទេសរដ្ឋមន្រ្តីបានបន្តទៀតថា កេរដំណែលរបស់កណ្តុរ Magawa បានឆ្លុះបញ្ចាំងពីការលះបង់របស់អង្គការ APOPO ដែលបាននាំមកនូវវិធីសាស្រ្តថ្មីៗទៅក្នុងវិស័យសកម្មភាពមីននៅកម្ពុជា ហើយវាក៏ឆ្លុះបញ្ចាំងពីការខិតខំប្រឹងប្រែងរួមគ្នានៅទូទាំងប្រទេសកម្ពុជាពីគ្រប់ប្រតិបត្តិករដោះមីន ស្ថាប័នជាតិ ប្រទេសជាមិត្ត រហូតដល់ដៃគូអភិវឌ្ឍន៍ ដែលបានឈរនៅជាមួយកម្ពុជាអស់រយៈពេលជាច្រើនឆ្នាំមកនេះ។

ឯកឧត្ដមបានបញ្ជាក់ទៀតថា វឌ្ឍនភាពសកម្មភាពមីនរបស់កម្ពុជាមិនបានកើតឡើងដោយចៃដន្យទេ គឺកើតឡើងចេញពីចក្ខុវិស័យដឹកនាំ និងការប្តេជ្ញាចិត្តយ៉ាងមុតមាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានកសាងនូវមូលដ្ឋានគ្រឹះយ៉ាងរឹងមាំ ដើម្បីការពារប្រជាជន និងស្ដារទឹកដីកម្ពុជាឱ្យមានសុវត្ថិភាពឡើងវិញ។ ប៉ុន្តែទោះបីយ៉ាងណា បេសកកម្មរុករកគ្រាប់មីននៅតែបន្តនៅតាមតំបន់ដែលអតីតកាលបន្សល់ទុក ហើយសហគមន៍ជាច្រើនកំពុងរង់ចាំសុវត្ថិភាព។

ឯកឧត្តមបានរំលឹកថា ថ្ងៃស្អែកទី០៤ ខែមេសា គឺជាការប្រារព្ធទិវាអន្តរជាតិយល់ដឹងអំពីមីន និងជំនួយក្នុងសកម្មភាពមីន ក្រោមប្រធានបទ “វិនិយោគលើសន្តិភាព វិនិយោគលើសកម្មភាពមីន-Invest in Peace; Invest in Mine Action” ដែលជាសារដ៏មានឥទ្ធិពល និងរំឭកឱ្យយើងដឹងថា ការបោសសម្អាតមីនមិនត្រឹមតែជាការងារបច្ចេកទេសប៉ុណ្ណោះទេ គឺជាមូលដ្ឋានគ្រឹះសម្រាប់សន្តិភាព ការជួយសង្រ្គោះជីវិតមនុស្ស ការស្ដារឡើងវិញនូវសេចក្តីថ្លៃថ្នូរ និងការបើកចំហដោយសុវត្ថិភាពសម្រាប់ការអភិវឌ្ឍ។ លទ្ធផលទាំងនេះបានបង្កើតនូវលក្ខខណ្ឌសម្រាប់ស្ថិរភាព និងវិបុលភាពយូរអង្វែង ដូចអ្វីដែលយើងបានឃើញយ៉ាងច្បាស់សម្រាប់ការផ្លាស់ប្តូរនៅក្នុងប្រទេសកម្ពុជាដោយផ្ទាល់៕

ដោយ សួស សំរិត