AKP កំពង់ធំ ថ្ងៃទី២ ខែមេសា ឆ្នាំ២០២៦--លោក សាយ គឹមឡម អភិបាល នៃគណៈអភិបាលស្រុកស្ទោង និងសហការីនារសៀលថ្ងៃទី០២ ខែមេសា ឆ្នាំ២០២៦ បានអញ្ជើញជួបសំណេះសំណាល សាកសួរសុខទុក្ខ និងចែកអំណោយជូនដល់ក្រុមគ្រួសារ យុទ្ធជនផ្នែកសឹករងស្ទោង ចំនួន៨គ្រួសារដែលកំពុងតែបំពេញបេសកកម្មការពារខ្សែបន្ទាត់ព្រំដែនកម្ពុជា-ថៃ នៅបញ្ជាការដ្ឋានផ្នែកសឹករងស្ទោងខេត្តកំពង់ធំ។

នៅក្នុងឱកាសនោះលោកសាយ គឹមឡមបានថ្លែងកោតសរសើរដល់ពលទាហាន នាយទាហាន និងនាយទាហានរងទាំងអស់ នៅផ្នែកសឹករងស្ទោង ដែលបានលះបង់កម្លាំងកាយចិត្ត និងពេលវេលា ប្រកបដោយឆន្ទៈមោះមុតក្នុងភារកិច្ចការពារបូរណភាពទឹកដី ដែលបង្ហាញពីស្មារតីស្នេហាជាតិ មាតុភូមិ។

លោកអភិបាលស្រុកបានអំពាវនាវយ៉ាងទទួចដល់ក្រុមគ្រួសារយុទ្ធជនទាំងអស់ឱ្យថែរក្សាសុខភាពផ្លូវកាយ និងផ្លូវចិត្តឱ្យបានល្អ ចៀសវាងការបារម្ភពីកូន ឬប្តីដែលកំពុងបំពេញបេសកកម្ម ដែលបណ្ដាលឱ្យមានបញ្ហាសុខភាពផ្សេងៗជាយថាហេតុ ហើយនៅកំឡុងពេលដែលបែកពីកូន ឬប្តីដែលជាពំនាក់គ្រួសារសូមបងប្អូនទាក់ទងមករដ្ឋបាលស្រុក ប្រសិនបើមានជំងឺដង្កាត់ផ្សេងៗ ដើម្បីបានសម្រាកព្យាបាលនៅមន្ទីរពេទ្យបង្អែកស្រុកស្ទោង ដោយឥតគិតថ្លៃ ដែលបង្ហាញពីភាពកក់ក្តៅ និងការយកចិត្តទុក្ខដាក់ដល់ក្រុមគ្រួសារយុទ្ធជន ដើម្បីតបស្នងដល់ការលះបង់របស់គាត់។

ទន្ទឹមនឹងនេះ លោក សាយ គឹមឡម អភិបាលស្រុកស្ទោង ក៏បានណែនាំទៅដល់ លោកមេបញ្ជាការស្ដីទី និងកម្លាំងដែលនៅប្រចាំបញ្ជាទាំងអស់ ត្រូវគិតគូរ មើលថែរក្សាក្រុមគ្រួសាយុទ្ធជនដែលកំពុងបំពេញបេសកកម្ម មិនត្រូវឱ្យគាត់ខ្វះខាតស្បៀងអាហារហូបចុក ឬមានជំងឺដង្កាត់អ្វីមួយដោយមិនបានដឹងនោះឡើយ ពោលគឺត្រូវផ្តល់ភាពកក់ក្តៅដល់ពួកគាត់ជានិច្ច។
សូមបញ្ជាក់ផងដែរថា គ្រួសារយុទ្ធជនទាំង០៨គ្រួសារក្នុងមួយគ្រួសារៗទទួលបានអង្ករ០២បេ,មី០១កេសនិងត្រីខ០១យួរ៕

ដោយ ស៊ុម វណ្ណា