AKP ‎កំពង់ស្ពឺ ថ្ងៃទី0២ ខែមេសា ឆ្នាំ២០២៦--ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានអនុញ្ញាតឱ្យ ឯកឧត្តម LAI XUAN CHIEN អគ្គកុងស៊ុលនៃសាធារណរដ្ឋសង្គមនិយមវៀតណាម ប្រចាំខេត្តព្រះសីហនុ ចូលជួបសម្តែងការគួរសម និងពិភាក្សាការងារ នៅសាលាខេត្តកំពង់ស្ពឺ។ ជំនួបនេះក៏មានបំណងអបអរសាទរក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ដែលនឹងឈានចូលមកដល់នាពេលឆាប់ៗខាងមុខនេះផងដែរ។
‎
‎ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត មានប្រសាសន៍ថា ខេត្តកំពង់ស្ពឺគឺជាតំបន់យុទ្ធសាស្ត្រដ៏សំខាន់ ដែលស្ថិតនៅចន្លោះរាជធានីភ្នំពេញ និងកំពង់ផែសមុទ្រទឹកជ្រៅខេត្តព្រះសីហនុ។ បច្ចុប្បន្ន ខេត្តកំពង់ស្ពឺបាន និងកំពុងប្រែក្លាយទៅជាប៉ូលសេដ្ឋកិច្ចដ៏ទាក់ទាញបំផុតមួយក្នុងប្រទេសកម្ពុជា តាមរយៈការរីកដុះដាលនៃរោងចក្រ សហគ្រាស កសិដ្ឋានធំៗ និងតំបន់សេដ្ឋកិច្ចពិសេសជាច្រើន។
‎
‎ឯកឧត្តមបានបញ្ជាក់បន្ថែមថា រដ្ឋបាលខេត្តតែងតែបើកចំហ និងស្វាគមន៍ជានិច្ចចំពោះវិនិយោគិនបរទេស ជាពិសេសអ្នកវិនិយោគពីប្រទេសវៀតណាម។ ឯកឧត្តមបានស្នើដល់លោកអគ្គកុងស៊ុល ជួយបន្តផ្សព្វផ្សាយពីឱកាសវិនិយោគក្នុងខេត្តកំពង់ស្ពឺ លើវិស័យសក្តានុពលដូចជា វិស័យឧស្សាហកម្មកែច្នៃ វិស័យកសិ-ឧស្សាហកម្ម និងវិស័យទេសចរណ៍។ជាមួយគ្នានោះ ឯកឧត្តម ក៏បានវាយតម្លៃខ្ពស់ចំពោះទំនាក់ទំនងមិត្តភាពជាប្រពៃណី និងសាមគ្គីភាពរវាងកម្ពុជា-វៀតណាម។  

ឯកឧត្តមបណ្ឌិតក៍បានថ្លែងអំណរគុណដល់ឯកឧត្តមអគ្គកុងស៊ុល ដែលបានអញ្ជើញមកសួរសុខទុក្ខ និងជូនពរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនេះសបញ្ជាក់ឱ្យឃើញពីការយកចិត្តទុកដាក់ និងការពង្រឹងកិច្ចសហប្រតិបត្តិការរវាងខេត្តកំពង់ស្ពឺ និងភាគីវៀតណាមឱ្យកាន់តែជិតស្និទ្ធថែមទៀត។
‎

‎ថ្លែងក្នុងឱកាសនោះដែរ ឯកឧត្តម LAI XUAN CHIEN បានថ្លែងនូវការកោតសរសើរចំពោះការដឹកនាំរបស់រដ្ឋបាលខេត្ត ដែលធ្វើឱ្យខេត្តកំពង់ស្ពឺមានការប្រែមុខមាត់យ៉ាងលឿន។ ពាក់ព័ន្ធនឹងបញ្ហាសន្តិសុខ ឯកឧត្តមអគ្គកុងស៊ុលបានមានប្រសាសន៍ថា ការលើកឡើងមួយចំនួនដែលថា កម្ពុជាមានបញ្ហាសន្តិសុខមិនល្អ ឬល្បែងស៊ីសងច្រើននោះ គឺជារឿងមិនពិតឡើយ ព្រោះជាក់ស្តែងរាជរដ្ឋាភិបាលកម្ពុជាបានយកចិត្តទុកដាក់ខ្ពស់ក្នុងការបង្ក្រាប និងរក្សាសណ្តាប់ធ្នាប់បានយ៉ាងល្អប្រសើរ ដែលផ្ដល់ទំនុកចិត្តដល់អ្នកវិនិយោគ។

‎‎ឯកឧត្តម LAI XUAN CHIEN អគ្គកុងស៊ុលវៀតណាម បានថ្លែងអំណរគុណយ៉ាងជ្រាលជ្រៅចំពោះការទទួលស្វាគមន៍យ៉ាងកក់ក្តៅ និងបានសន្យាថា នឹងខិតខំផ្សព្វផ្សាយព័ត៌មានពីការរីកចម្រើនរបស់ខេត្តកំពង់ស្ពឺ ទៅកាន់ធុរជនវៀតណាម ដើម្បីស្វែងរកឱកាសបណ្តាក់ទុនបន្ថែម ដែលនឹងជួយបង្កើតការងារ និងបង្កើនប្រាក់ចំណូលដល់ប្រជាពលរដ្ឋក្នុងខេត្តឱ្យកាន់តែប្រសើរឡើង។

ដោយ ម៉ែន ប៊ុនធីម