AKPភ្នំពេញថ្ងៃទី០២ ខែមេសា ឆ្នាំ ២០២៦– ក្រុមប្រឹក្សាអភិវឌ្ឍន៍កម្ពុជា(ក.អ.ក.) ទទួលទានអាហារពេលព្រឹកធុរកិច្ចលើកទី១ រវាងស្ថាប័នរដ្ឋនិងវិស័យឯកជន ដោយមាន ក.អ.ក. ក្នុងនាមស្ថាប័នរដ្ឋ ជាម្ចាស់ផ្ទះរៀបចំកម្មវិធី។

ក្រុមប្រឹក្សាអភិវឌ្ឍន៍កម្ពុជា នាព្រឹកថ្ងៃព្រហស្បតិ៍ ទី២ ខែមេសា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(ក.អ.ក.) បានអញ្ជើញជាអធិបតីក្នុងពិធីទទួលទានអាហារពេលព្រឹកធុរកិច្ចលើកទី១ រវាងស្ថាប័នរដ្ឋនិងវិស័យឯកជន ដោយមាន ក.អ.ក. ក្នុងនាមស្ថាប័នរដ្ឋ ជាម្ចាស់ផ្ទះរៀបចំកម្មវិធី។ វេទិកាដ៏មានសារៈសំខាន់នេះ ត្រូវបានរៀបចំឡើងដោយក្រុមប្រឹក្សាអភិវឌ្ឍន៍កម្ពុជា ក្នុងគោលបំណងបើកទំព័រថ្មីនៃកិច្ចសន្ទនាដោយត្រង់ទៅត្រង់មក និងស៊ីជម្រៅ ដើម្បីជំរុញបរិយាកាសវិនិយោគនៅកម្ពុជាឱ្យកាន់តែមានភាពទាក់ទាញ និងប្រកបដោយបរិយាបន្ន។

ពិធីនេះក៏មានការអញ្ជើញចូលរួមពី ឯកឧត្តមរដ្ឋមន្ត្រីក្រសួងរ៉ែ និងថាមពល អនុប្រធានទី៣ នៃ ក.អ.ក. រួមជាមួយវត្តមានអង្គទូតនានាប្រចាំព្រះរាជាណាចក្រកម្ពុជា រួមមាន៖ ឯកឧត្តមឯកអគ្គរាជទូតជប៉ុន, ឯកឧត្តមឯកអគ្គរដ្ឋទូតសហភាពអឺរ៉ុប, លោកស្រីភារធារីនៃស្ថានទូតសហរដ្ឋអាម៉េរិក, លោកស្រីទីប្រឹក្សាកិច្ចការសេដ្ឋកិច្ច និងពាណិជ្ជកម្មនៃស្ថានទូតចិន, និងលោកលេខាធិការទី២ នៃស្ថានទូតសាធារណរដ្ឋកូរ៉េ។ ក្រៅពីថ្នាក់ដឹកនាំជាន់ខ្ពស់ និងតំណាងអង្គទូត វេទិកានេះក៏មានការចូលរួមពី ថ្នាក់ដឹកនាំសភាពាណិជ្ជកម្ម និងសមាគមធុរកិច្ចអន្តរជាតិឈានមុខ ដែលជាតួអង្គសេដ្ឋកិច្ចដ៏សំខាន់ រួមមាន ប្រធានសភាពាណិជ្ជកម្មអាម៉េរិក (AmCham), អឺរ៉ុប (EuroCham), ចិន (CCCC), កូរ៉េ (KOCHAM) និងសមាគមធុរកិច្ចជប៉ុន (JBAC) ព្រមទាំងសមាជិក សមាជិកា នៃស្ថាប័នពាក់ព័ន្ធជាច្រើនរូបទៀត។

ថ្លែងនៅក្នុងឱកាសដ៏មនោរម្យនាព្រឹកនេះ ឯកឧត្តមឧបនាយករដ្ឋមន្ត្រី បានបង្ហាញពីផែនការសកម្មភាពដ៏មមាញឹករបស់ ក.អ.ក. ក្នុងការចុះបំពេញបេសកកម្មផ្សព្វផ្សាយសក្តានុពលវិនិយោគនៅតាមបណ្តាប្រទេសគោលដៅសំខាន់ៗជុំវិញពិភពលោកក្នុងឆ្នាំ២០២៦។ បេសកកម្មនេះ ធ្វើឡើងក្នុងគោលបំណងបង្ហាញពីកាលានុវត្តភាពថ្មីៗ ច្បាប់វិនិយោគដ៏មានភាពអនុគ្រោះ និងការវិវឌ្ឍនៃហេដ្ឋារចនាសម្ព័ន្ធរូបវន្តរបស់កម្ពុជា ទៅកាន់វិនិយោគិនអន្តរជាតិដោយផ្ទាល់ ដើម្បីទាក់ទាញគម្រោងវិនិយោគដែលមានតម្លៃបន្ថែមខ្ពស់មកកាន់កម្ពុជា។

ឯកឧត្តមឧបនាយករដ្ឋមន្ត្រី ក៏បានផ្តល់នូវសេចក្តីទុកចិត្ត និងលើកទឹកចិត្តយ៉ាងមុតមាំដល់តំណាងវិស័យឯកជនទាំងអស់ "កុំមានការស្ទាក់ស្ទើរ" ក្នុងការលើកឡើងនូវរាល់បញ្ហាប្រឈម ឧបសគ្គ ឬកង្វល់នានាដែលកំពុងជួបប្រទះក្នុងការធ្វើធុរកិច្ចនៅកម្ពុជា។ ឯកឧត្តមបានសង្កត់ធ្ងន់ថា រាជរដ្ឋាភិបាលចាត់ទុកវិស័យឯកជនជាដៃគូអភិវឌ្ឍន៍ដ៏ពិតប្រាកដ ដូច្នេះការជជែកពិភាក្សាដោយស្មោះត្រង់ គឺជាគន្លឹះតែមួយគត់ក្នុងការស្វែងរកដំណោះស្រាយរួមប្រកបដោយប្រសិទ្ធភាព ដើម្បីពង្រឹងជំនឿទុកចិត្ត និងធានានូវភាពជោគជ័យនៃគម្រោងវិនិយោគទាំងឡាយ។

ជាមួយគ្នានេះ តំណាងអង្គទូត និងសភាពាណិជ្ជកម្មនានាបានសម្តែងនូវការអបអរសាទរ និងការវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាល ក៏ដូចជាក្រុមប្រឹក្សាអភិវឌ្ឍន៍កម្ពុជា ក្នុងការសម្របសម្រួល និងបង្កលក្ខណៈងាយស្រួលដល់ធុរកិច្ចជនបរទេស។ តាមរយៈវត្តមានដ៏កុះករនៃតំណាងអង្គទូត និងសហគមន៍ធុរកិច្ចអន្តរជាតិរបស់តំណាងប្រទេសមហាអំណាចសេដ្ឋកិច្ចទាំងក្នុងតំបន់ និងសកលលោក ក្នុងកម្មវិធីតែមួយនេះ បានបង្ហាញយ៉ាងច្បាស់ពីទំនុកចិត្តយ៉ាងរឹងមាំមកលើស្ថិរភាពនយោបាយ និងសក្តានុពលសេដ្ឋកិច្ចរបស់កម្ពុជា ក្រោមការដឹកនាំដ៏ឈ្លាសវៃរបស់រាជរដ្ឋាភិបាល និងបានឆ្លុះឱ្យឃើញអំពី "សហថាមពល" រវាងរដ្ឋ និងឯកជន ក្នុងការរួមគ្នាកសាងប្រព័ន្ធអេកូឡូស៊ីសេដ្ឋកិច្ចមួយដែលរឹងមាំ និងមានតម្លាភាព។

ជំនួបអាហារពេលព្រឹកធុរកិច្ចលើកទី១ នេះ បានបញ្ចប់ទៅប្រកបដោយផ្លែផ្កា និងបរិយាកាសការទូតដ៏ស្និទ្ធស្នាលបំផុត ដែលជាសញ្ញាណវិជ្ជមានថ្មីមួយទៀតក្នុងការប្តេជ្ញាចិត្តសម្រេចឱ្យបាននូវចក្ខុវិស័យសេដ្ឋកិច្ចកម្ពុជា ឱ្យកាន់តែរុងរឿង និងមានភាពធន់ក្នុងតំបន់ និងសកលលោក៕

ដោយ៖ ចរិយា ប្រភព៖ CDC