AKP ភ្នំពេញ ថ្ងៃទី០២ ខែមេសា ឆ្នាំ២០២៦ -- អ្នកស្រី Angelina Jolie តារាហូលីវូដដ៏ល្បីល្បាញ បានអញ្ជើញចុះពិនិត្យអគារមហោស្រពប្រាសាទមាស និងរោងភាពយន្តបាត់ដំបង ស្ថិតនៅក្នុងក្រុងបាត់ដំបង នាថ្ងៃទី០២ ខែមេសា ឆ្នាំ២០២៦ តបតាមការអញ្ជើញរបស់តំណាងសមាគមហ្វារពន្លឺសិល្បៈ ដើម្បីស្នើឱ្យអ្នកស្រីជួយជួសជុលកែលម្អរោងកុនចាស់ទាំងពីរនេះ។ 

ដំណើរទស្សនកិច្ចនេះក៏មានការអញ្ជើញចូលរួមពីសំណាក់ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង អភិបាលរងខេត្ត ប្រធានមន្ទីរវប្បធម៌ និងវិចិត្រសិល្បៈខេត្ត និងអាជ្ញាធរក្រុងបាត់ដំបងផងដែរ។

គួរបញ្ជាក់ផងដែរ មហោស្រពប្រាសាទមាស និងរោងភាពយន្តបាត់ដំបង ដ៏ល្បីល្បាញនេះ ត្រូវបានសាងសង់ឡើងក្នុងអំឡុងទសវត្សឆ្នាំ៦០។ អគារទាំងពីរនេះ ត្រូវបានចាត់ទុកថាជាទីតាំងវប្បធម៌ដ៏សំខាន់របស់ខេត្តបាត់ដំបង និងឆ្លុះបញ្ចាំងពីបេតិកភណ្ឌសិល្បៈដ៏សម្បូរបែបរបស់ខេត្ត។

កាលពីថ្ងៃទី០១ ខែមេសា ម្សិលមិញ អ្នកស្រី Angelina Jolie បានអញ្ជើញធ្វើទស្សនកិច្ចនៅវិទ្យាល័យសំឡូត ខេត្តបាត់ដំបង ក្នុងគោលបំណងស្វែងយល់ពីការសិក្សារបស់សិស្ស និងវឌ្ឍនភាពនៃការស្នាក់នៅអន្តេវាសិកដ្ឋាន។

គួរបញ្ជាក់ថា អ្នកស្រី Angelina Jolie មានចំណងយ៉ាងជិតស្និទជាមួយប្រទេសកម្ពុជា។ អ្នកស្រីបានទទួលចិញ្ចឹមកុមារកម្ពុជាម្នាក់ ឈ្មោះ Maddox Jolie-Pitt នៅឆ្នាំ២០២២។ អ្នកស្រីបានទទួលសញ្ជាតិកម្ពុជាក្នុងឆ្នាំ២០០៥។

មួយឆ្នាំក្រោយមក អ្នកស្រីបានបង្កើតមូលនិធិ ដោយដាក់ឈ្មោះតាមកូនប្រុស Maddox Jolie-Pitt នៅស្រុកសំឡូត ដែលមូលនិធិនេះផ្តោតជាសំខាន់លើកិច្ចការពារបរិស្ថាន ការការពារសត្វព្រៃ សុខភាពសាធារណៈ និងការលើកកម្ពស់ជីវភាពប្រជាពលរដ្ឋមូលដា្ឋន។

អ្នកស្រី Angelina Jolie បានមកដល់ប្រទេសកម្ពុជាជាលើកដំបូង ក្នុងឆ្នាំ២០០០ ដើម្បីថតរឿង Lara Croft: Tom Raider នៅប្រាសាទបុរាណខ្មែរ ក្នុងខេត្តសៀមរាប ដែលរឿងនេះ បានទាក់ទាញការចាប់អារម្មណ៍ពីអន្តរជាតិចំពោះបេតិកភណ្ឌវប្បធម៌ខ្មែរ៕

ដោយ នីកា (រូបថត៖ រដ្ឋបាលខេត្តបាត់ដំបង)