AKP ភ្នំពេញ ថ្ងៃទី0២ ខែមេសា ឆ្នាំ២០២៦--ឯកឧត្តម នាយឧត្តមសេនីយ៍ សាស្ត្រាចារ្យ សេង ផល្លី អគ្គនាយក នៃអគ្គនាយកដ្ឋានធនធានមនុស្សនៃក្រសួងមហាផ្ទៃ បានលើកឡើងថា ក្រសួងមហាផ្ទៃ បាន និងកំពុងធ្វើកំណែទម្រង់ធនធានមនុស្សយ៉ាងស៊ីជម្រៅដល់មន្ត្រីរាជការទាំង៣ក្របខ័ណ្ឌ រួមមាន មន្ត្រីនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារ។

ការលើកឡើងរបស់នាយឧត្តមសេនីយ៍ សាស្ត្រាចារ្យ សេង ផល្លី បែបនេះធ្វើឡើងក្នុងកិច្ចប្រជុំស្តីពីការពង្រឹងវិន័យ ដើម្បីលើកកម្ពស់ប្រសិទ្ធភាពការងារមន្ត្រីរាជការក្រសួងមហាផ្ទៃ នាព្រឹកថ្ងៃទី០២ ខែមេសា ឆ្នាំ២០២៦ ក្រោមអធិបតីភាព ឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

ឯកឧត្តម នាយឧត្តមសេនីយ៍ សាស្ត្រាចារ្យ សេង ផល្លី បានឱ្យដឹងថា កំណែទម្រង់ធនធានមនុស្សស៊ីជម្រៅដល់មន្ត្រីរាជការទាំង៣ក្របខ័ណ្ឌកំពុងទទួលបានលទ្ធផលវិជ្ជមានគួរឱ្យកត់សម្គាល់ ជាអាទិ៍៖ ១. មន្ត្រីរាជការមានវិន័យ និងស្មារតីទទួលខុសត្រូវកាន់តែប្រសើរឡើង ២. ការជ្រើសរើសក្របខ័ណ្ឌមន្ត្រីរាជការត្រូវបានអនុវត្តតាមនិយាមនីតិវិធីប្រតិបត្តិ(SOP) តាមតម្រូវការអង្គភាពសាមីនីមួយៗ និងទទួលបានការបណ្តុះបណ្តាលជំនាញត្រឹមត្រូវ ៣.ការគ្រប់គ្រងវត្តមាន និងការសុំច្បាប់ឈប់សម្រាកត្រូវបានអនុវត្តយ៉ាងមានប្រសិទ្ធភាព និង ៤. ការអនុវត្តទណ្ឌកម្មខាងវិន័យត្រូវបានអនុវត្តស្របតាមច្បាប់ និងលិខិតបទដ្ឋានគតិយុត្ត។ តែទោះបីទទួលបានលទ្ធផលគួរឱ្យកត់សម្គាល់យ៉ាងនេះក្តី ឯកឧត្តម នាយឧត្តមសេនីយ៍ សាស្ត្រាចារ្យ ក៏បានលើកឡើងថា នៅតែមានមន្ត្រីរាជការមួយចំនួនតូចមិនទាន់បានគោរពវិន័យបានម៉ឺងម៉ាត់ ដូចជា អវត្តមាន អាកប្បកិរិយាមិនសមរម្យក្នុងម៉ោងការងារ និងតាមបណ្តាញទំនាក់ទំនងសង្គម និងការស្លៀកពាក់ឯកសណ្ឋានមិនបានត្រឹមត្រូវជាដើម។

ក្នុងកិច្ចប្រជុំនេះ ឯកឧត្តមសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការបានសម្តែងនូវការកោតសរសើរចំពោះអគ្គនាយកដ្ឋានធនធានមនុស្ស និងអង្គភាពពាក់ព័ន្ធទាំងអស់ដែលបានសហការ ខិតខំប្រឹងប្រែងក្នុងការពង្រឹងវិន័យ និងគ្រប់គ្រងធនធានមនុស្សទទួលបានលទ្ធផលគួរឱ្យកត់សម្គាល់។ ទន្ទឹមនឹងលទ្ធផលនេះ ថ្នាក់ដឹកនាំក្រសួងមហាផ្ទៃបានឯកភាពគាំទ្រ និងបន្តជំរុញការងារកំណែទម្រង់ធនធានមនុស្សក្រសួងមហាផ្ទៃឱ្យកាន់តែប្រសើរឡើងថែមទៀត ដើម្បីឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានកំណត់យក «មនុស្ស» ជាអាទិភាពគន្លឹះទី១ ដែលមន្ត្រីរាជការជាតួអង្គស្នូលដ៏សំខាន់ក្នុងការអនុវត្តច្បាប់ គោលនយោបាយ និងការផ្តល់សេវាសាធារណៈជូនប្រជាពលរដ្ឋ និងប្រទេសជាតិ៕

ដោយ ចាន់ សុភឿន (ប្រភព៖ ក្រសួងមហាផ្ទៃ)