AKP សៀមរាប ថ្ងៃទី៣០ ខែមីនា ឆ្នាំ២០២៦-- ព្រះសង្ឃ អាចារ្យ គណៈកម្មការ និង ពុទ្ធបរិស័ទចំណុះជើងវត្តដំណាក់ ក្រុងសៀមរាបខេត្តសៀមរាប ព្រមទាំងពុទ្ធបរិស័ទជិតឆ្ងាយ ដឹកនាំដោយព្រះគ្រូធម្មវិសុទ្ធិរង្សី ឡាច ចន្ថា ជាព្រះចៅអធិការវត្តដំណាក់ អគ្គមហាឧបាសក ធម្មចរិយញ្ញាណ កែវ វិមុត្តិ ព្រឹទ្ធមហាឧបាសក ង៉ែត យ៉ិន បានផ្តួចផ្តើមទឹបមាសសុទ្ធព្រះពុទ្ធបដិមាស្ពាន់កម្ពស់៩ម៉ែត្រដែលបានតម្កល់ នៅមុខព្រះវិហារ ក្នុងបំណងដើម្បីរក្សានូវគុណភាពស្ពាន់ និង សម្រស់ពណ៌ទឹកមាសឱ្យបានយូរឆ្នាំសម្រាប់ជាទីសក្ការដល់ពុទ្ធបរិស័ទ និងពួកជនដែលមានសទ្ធាជ្រះថ្លាគ្រប់ទិសទីចូលមកគោរពបូជាថ្វាយបង្គំ រឭកនឹកដល់គុណរបស់ព្រះសម្មាសម្ពុទ្ធជាបរមគ្រូ និង ជាទីពឹងទីរឭកនៃចិត្ត។

ក្នុងពិធីនេះផងដែរក៏មានការនិមន្តប្រទានធម៌ទេសនាពីសម្តេចព្រះព្រហ្មរតនមុនី ពិន សែម សិរីសុវណ្ណោ ព្រះប្រធានថេរសភាពុទ្ធសាសនាកម្ពុជា និងមានការនិមន្តចូលរួមពីព្រះមន្រ្តីសង្ឃខេត្ត ព្រះរាជាគណៈ ព្រះគ្រូ ព្រះថេរានុត្ថេរៈជាច្រើនរូប និងមានការអញ្ជើញពីសំណាក់មហាឧបាសក មហាឧបាសិកា ឧបាសក ឧបាសិកាយ៉ាងឱឡារឹកផងដែរ ។

ពិធិនេះគឺជាពិធីបូជាគុណរបស់ព្រះសម្មាសម្ពុទ្ធផង ជាពិធិដើម្បីរក្សានូវគុណភាពព្រះបដិមា និង រក្សាមាសនៃព្រះពុទ្ធបិដមាស្ពាន់ឱ្យស្ថិតស្ថេរនៅបានយូរជាសម្បត្តិរបស់វត្តដំណាក់ របស់ពុទ្ធសាសនា និង ជាសម្បត្តិវប្បធម៌របស់ជាតិខ្មែរយើងផងដែរ ។ ការបូជាព្រះពុទ្ធរមែងបានអានិសង្សពោលគឺនឹងក្លាយជាអ្នកដែលមានតេជានុភាពខ្លាំងក្លាអង់អាចលើសអ្នកដទៃនៅក្នុងជំនំចំណោម ពោលគឺទៅណាមកណា រមែងមានគេគោរពកោតខ្លាចជានិច្ច ។

ព្រះគ្រូធម្មវិសុទ្ធិរង្សី ឡាច ចន្ថា ជាព្រះចៅអធិការវត្តដំណាក់ មានសង្ឃដីកាថា ព្រះពុទ្ធបដិមា ទ្រង់អភ័យអង្គនេះ នឹងក្លាយជាទីសក្ការបូជាថ្មីមួយបន្ថែមទៀតសម្រាប់ពុទ្ធបរិស័ទជិតឆ្ងាយអញ្ជើញមកនមស្ការថ្វាយបង្គំ និងបូជាតាមកម្លាំងសទ្ធា។

ជាពិសេស នេះគឺជាការបន្សល់ទុកនូវមរតកដ៏កម្រក្នុងព្រះពុទ្ធសាសនា ដែលមិនសូវមានការកសាងពីស្ពាន់ក្នុងទំហំធំបែបនេះឡើយ និងដើម្បីទុកជាទីគោរពសក្ការសម្រាប់បរិស័ទជំនាន់ក្រោយ និងជាចំណែកមួយដ៏សំខាន់ក្នុងការទាក់ទាញ់ភ្ញៀវទេសចរវត្តអារាមផងដែរ។ សម្រាប់បរិស័ទជំនាន់ក្រោយ និងជាចំណែកមួយដ៏សំខាន់ក្នុងការទាក់ទាញ់ភ្ញៀវទេសចរវត្តអារាមផងដែរ៕

ដោយ ឃុត សៅ