AKP បន្ទាយមានជ័យ ថ្ងៃទី៣០ ខែមីនា ឆ្នាំ២០២៦-- ក្នុងស្មារតីសាមគ្គីភាព និងការយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋ ពិសេសក្នុងឱកាសត្រៀមអបអរសាទរបុណ្យចូលឆ្នាំថ្មីប្រពៃណីជាតិខ្មែរ ឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានដាក់បទបញ្ជាឱ្យរៀបចំកម្មវិធី «សង្ក្រាន្ត» ដ៏អធិកអធមមួយជូនដល់បងប្អូនពលរដ្ឋភៀសសឹក ដើម្បីបង្កបរិយាកាសសប្បាយរីករាយ និងថែរក្សាទំនៀមទម្លាប់ដូនតា។

នៅព្រឹកថ្ងៃទី៣០ ខែមីនា ឆ្នាំ២០២៦ ឯកឧត្ដម អ៊ុំ រាត្រី បានដឹកនាំកិច្ចប្រជុំបន្ទាន់មួយជាមួយក្រុមការងារចម្រុះ រួមមានអាជ្ញាធរខេត្ត-ស្រុក កងកម្លាំងប្រដាប់អាវុធ និងក្រុមការងារយុវជន។ កិច្ចប្រជុំនេះធ្វើឡើងក្នុងគោលបំណងរៀបចំផែនការលម្អិតសម្រាប់ព្រឹត្តិការណ៍សង្ក្រាន្ត ដែលនឹងត្រូវប្រារព្ធឡើងនៅថ្ងៃទី៣១ ខែមីនា ឆ្នាំ២០២៦ នេះ នៅបរិវេណវត្តច័ន្ទស៊ីសាមគ្គីរតនារាម ក្នុងឃុំកូប ស្រុកអូរជ្រៅ។

ឯកឧត្ដមអភិបាលខេត្តបានសង្កត់ធ្ងន់ថា ការរៀបចំត្រូវតែមានភាពទាក់ទាញបំផុតការតុបតែងលម្អ រៀបចំបរិស្ថានឱ្យមានសណ្ដាប់ធ្នាប់ រំលេចដោយបដា ពាក្យស្លោក ទង់ជាតិ ទង់ជ្វាលា និងការដំឡើងភ្លើងពណ៌ចម្រុះដើម្បីបង្កើនសោភ័ណភាពនាពេលរាត្រី។ ល្បែងប្រជាប្រិយកម្មវិធីនឹងរស់រវើកទៅបានដោយសារការលេងល្បែងប្រជាប្រិយខ្មែរគ្រប់ប្រភេទដូចជា ចោលឈូង បោះអង្គុញ ទាញព្រ័ត្រ និងលាក់កន្សែង ដើម្បីរំលឹក និងអភិរក្សវប្បធម៌។ សិល្បៈ និងកីឡា ក្រៅពីការរាំលេងកម្សាន្ត ក៏មានការសម្ដែងសិល្បៈវប្បធម៌ និងការប្រកួតកីឡាប្រដាល់គុនខ្មែរដែលជាអត្តសញ្ញាណជាតិដ៏រឹងមាំ ដើម្បីបម្រើអារម្មណ៍ពលរដ្ឋឱ្យបានសប្បាយរីករាយបំផុត។

ទន្ទឹមនឹងភាពសប្បាយរីករាយ ឯកឧត្ដម អ៊ុំ រាត្រី បានដាក់បទបញ្ជាយ៉ាងម៉ឺងម៉ាត់ដល់កងកម្លាំងសមត្ថកិច្ច និងរដ្ឋបាលស្រុកអូរជ្រៅ ត្រូវយាមកាម និងល្បាត ២៤ម៉ោងលើ២៤ម៉ោង ក្នុងបរិវេណពិធី និងតំបន់ជុំវិញ។សហការស្អិតរមួតរវាងគ្រប់អង្គភាព ដើម្បីបង្ការរាល់បាតុភាពអសកម្ម និងរក្សាសណ្ដាប់ធ្នាប់សង្គម។ ធានាសុវត្ថិភាពទ្វេដង ជូនដល់បងប្អូនពលរដ្ឋភៀសសឹក និងអ្នកចូលរួមទាំងអស់ ឱ្យទទួលបាននូវភាពកក់ក្ដៅបំផុត។

ការសម្រេចចិត្តរៀបចំសង្ក្រាន្តនៅវត្តច័ន្ទស៊ីសាមគ្គីរតនារាម មិនត្រឹមតែជាការកម្សាន្តប៉ុណ្ណោះទេ ប៉ុន្តែគឺជាសារនយោបាយ និងមនុស្សធម៌ដ៏មានអត្ថន័យរបស់រដ្ឋបាលខេត្តបន្ទាយមានជ័យ ដែលបង្ហាញថា «មិនទុកឱ្យបងប្អូនពលរដ្ឋភៀសសឹកណាម្នាក់ឯកោ ក្នុងឱកាសបុណ្យចូលឆ្នាំថ្មីនោះឡើយ»។ នេះក៏ជាយុទ្ធនាការដ៏សំខាន់ក្នុងការបណ្ដុះស្មារតីស្រឡាញ់វប្បធម៌ដូនតា ឱ្យស្ថិតស្ថេរគង់វង្សសម្រាប់កូនចៅជំនាន់ក្រោយ៕

ដោយ ឈុន សារ៉ាត