AKP តាកែវ ថ្ងៃទី៣០ ខែមីនា ឆ្នាំ២០២៦--ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ រួមជាមួយ ឯកឧត្តម សរ ភមរ៉ា អគ្គនាយករងនៃអគ្គនាយកដ្ឋានធនធានមនុស្សក្រសួងមហាផ្ទៃ បានអញ្ជើញចូលរួមជាអធិបតីបើកកញ្ចប់វិញ្ញាសា ប្រឡងប្រជែងជ្រើសរើសក្របខ័ណ្ឌមន្ត្រីពន្ធនាគារ ក្រសួងមហាផ្ទៃសម្រាប់ឆ្នាំ២០២៦ ឱ្យចូលបម្រើការងារនៅពន្ធនាគារខេត្តតាកែវ ខេត្តកណ្តាល​ និងខេត្តកំពង់ស្ពឺ។ក្នុងពិធីនោះដែរក៏មានការអញ្ជើញចូលរួម ពីមន្ត្រីពាក់ព័ន្ធ និងគណៈកម្មការមេប្រយោគផងដែរ។ការប្រឡងជ្រើសរើសមន្ត្រីពន្ធនាគារនេះ ត្រូវបានរៀបចំឡើងនៅមណ្ឌលប្រឡងវិទ្យាល័យជាស៊ីមតាកែវ ស្ថិតនៅក្នុងក្រុងដូនកែវខេត្តតាកែវ កាលពីព្រឹកថ្ងៃអាទិត្យ១១កើតខែចេត្រឆ្នាំម្សាញ់សប្ដស័កព.ស២៥៦៩ ត្រូវនឹងថ្ងៃទី២៩ខែមីនាឆ្នាំ២០២៦។សម្រាប់មណ្ឌលប្រឡងវិទ្យាល័យជាស៊ីមតាកែវ មានបន្ទប់ប្រឡងចំនួន១៧បន្ទប់ មានបេក្ខជនសរុបចំនួន៣៩៦នាក់ស្រីចំនួន២២៤នាក់។បេក្ខជនទាំងនោះមកពីខេត្តចំនួនបី ក្នុងនោះខេត្តតាកែវមានបេក្ខជនចំនួន១៥១នាក់ស្រីចំនួន៧១នាក់ ខេត្តកណ្ដាលមានបេក្ខជនចំនួន៩២នាក់ស្រីចំនួន៤៥នាក់ និងខេត្តកំពង់ស្ពឺមានបេក្ខជនចំនួន១៥៣នាក់ស្រីចំនួន១០៨នាក់។

មានប្រសាសន៍សំណេះសំណាលក្នុងឱកាសនោះ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានផ្តាំផ្ញើដល់បេក្ខជនទាំងអស់ ត្រូវខិតខំប្រឹងប្រែងយកចិត្តទុកដាក់ បញ្ចេញសមត្ថភាព ចំណេះដឹង និងតាំងស្មារតីឱ្យរឹងមាំនៅក្នុងពេលប្រឡង។ហើយក្មួយៗត្រូវបញ្ចេញឱ្យអស់ពីសមត្ថភាពរបស់ខ្លួន នូវចំណេះដឹងដែលបានសិក្សាកន្លងមក។ម្យ៉ាងទៀតក្មួយៗត្រូវគោរពឲ្យបានល្អ នូវបទបញ្ជាផ្ទៃក្នុង វិន័យក្នុងពេលប្រឡង និងស្តាប់នូវការណែនាំរបស់គណៈមេប្រយោគឱ្យបានខ្ជាប់ខ្ជួន។

ឯកឧត្តម វ៉ី សំណាង បានមានប្រសាសន៍បន្តថា ការប្រឡងជ្រើសរើសក្របខ័ណ្ឌមន្ត្រីពន្ធនាគារនៃក្រសួងមហាផ្ទៃ នាពេលនេះ គឺជាឱកាសដ៏ប្រសើរសម្រាប់ក្មួយៗជាបេក្ខជនទាំងអស់ ក្នុងការវាស់ស្ទង់នូវគំនិតយល់ដឹង ចំណេះដឹង និងសមត្ថភាពរបស់ក្មួយៗ ដើមី្បយកទៅបម្រើការងារនៅក្នុងក្របខ័ណ្ឌមន្ត្រីពន្ធនាគារ នៃក្រសួងមហាផ្ទៃ សម្រាប់ទៅថ្ងៃអនាគត ។

ឯកឧត្តម វ៉ី សំណាង បានមានប្រសាសន៍បន្ថែមថា ដំណើរការប្រឡងនេះត្រូវបានរៀបចំឡើងយ៉ាងម៉ត់ចត់បំផុត ក្រោមគោលការណ៍"អ្នកចេះគឺជាប់" ដើម្បីធានាបាននូវតម្លាភាព យុត្តិធម៌ និងប្រសិទ្ធខ្ពស់បំផុត ក្នុងការជ្រើសរើសធនធានមនុស្សដែលមានសមត្ថភាពពិប្រាកដ ទៅបម្រើការងារក្នុងវិស័យពន្ធនាគារនៃក្រសួងមហាផ្ទៃ។

អភិបាលខេត្តតាកែវ ក៏បានជូនពរដល់បេក្ខជនទាំងអស់ សូមឱ្យទទួលបានជោគជ័យ ក្នុងការប្រឡងប្រជែងជ្រើសរើសក្របខ័ណ្ឌមន្ត្រីពន្ធនាគារសម្រាប់ឆ្នាំ២០២៦នេះ។ហើយដំណើរការប្រឡងក្នុងថ្ងៃនេះ បានប្រព្រឹត្តទៅក្នុងភាពស្ងប់ស្ងាត់ មានសណ្ដាប់ធ្នាប់ល្អ និងការត្រួតពិនិត្យយ៉ាងតឹងរ៉ឹង ពីសំណាក់អនុរក្សនិងមន្ត្រីមានសមត្ថកិច្ច៕

តាកែវ៖ អ៊ុច សៀង