AKP បន្ទាយមានជ័យ ថ្ងៃទី២៩ ខែមីនា ឆ្នាំ២០២៦ — ស្ថិតក្រោមបរិយាកាសដ៏ជ្រះថ្លានៃជំនឿសាសនា និងសាមគ្គីភាពរបស់ពុទ្ធបរិស័ទ សាលាធម្មសភា និងសមិទ្ធិផលនានានៅក្នុងវត្តគិរីពោធិវង្ស (ភ្នំទ្រលោក) ត្រូវបានប្រារព្ធពិធីសម្ពោធឆ្លងដាក់ឱ្យប្រើប្រាស់ជាផ្លូវការ ដើម្បីបម្រើដល់វិស័យពុទ្ធចក្រ និងការជួបជុំធ្វើបុណ្យទានរបស់ប្រជាពលរដ្ឋក្នុងមូលដ្ឋាន។

ពិធីនេះបានប្រព្រឹត្តទៅនៅព្រឹកថ្ងៃទី២៩ ខែមីនា ឆ្នាំ២០២៦ នេះ ស្ថិតក្នុងភូមិទ្រលោកលិច ឃុំភ្នំលៀប ស្រុកព្រះនេត្រព្រះ ក្រោមអធិបតីភាពលោក កែ សួនសុភាព អភិបាលរងនៃគណៈអភិបាលខេត្តបន្ទាយមានជ័យ ដែលជាតំណាងដ៏ខ្ពង់ខ្ពស់ ឯកឧត្តមនាយឧត្តមសេនីយ៍ កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្ត្រមណ្ឌលខេត្តបន្ទាយមានជ័យ។

ថ្លែងក្នុងឱកាសនោះ លោក កែ សួនសុភាព បានពាំនាំនូវការសួរសុខទុក្ខពីសំណាក់ឯកឧត្តមនាយឧត្តមសេនីយ៍ កែ គឹមយ៉ាន ជូនចំពោះបងប្អូនប្រជាពលរដ្ឋ និងពុទ្ធបរិស័ទទាំងអស់។ លោកបានគូសបញ្ជាក់ថា សមិទ្ធិផលថ្មីៗដែលលេចចេញរូបរាងឡើងនៅលើកំពូលភ្នំទ្រលោកនាពេលនេះ គឺជាសក្ខីភាពបង្ហាញឱ្យឃើញយ៉ាងច្បាស់ពីការរីកចម្រើននៃវិស័យសាសនា ឮនៅក្រោមម្លប់នៃសុខសន្តិភាព។

 
លោកអភិបាលរងខេត្ត បានលើកឡើងនូវចំណុចសំខាន់ៗរួមមាន ការយកចិត្តទុកដាក់របស់រាជរដ្ឋាភិបាលរាជកម្ពុជាដែលតែងតែផ្តល់តម្លៃខ្ពស់ដល់វិស័យសាសនា ដោយចាត់ទុកថាជាគ្រឹះនៃសីលធម៌សង្គម និងជាផ្នែកមួយមិនអាចខ្វះបាននៃការអភិវឌ្ឍជាតិ។ ការរីកចម្រើននៃវិស័យពុទ្ធសាសនា បច្ចុប្បន្ន វត្តអារាមមិនត្រឹមតែជាទីកន្លែងសក្ការបូជាប៉ុណ្ណោះទេ ប៉ុន្តែក៏ជាមជ្ឈមណ្ឌលបណ្តុះបណ្តាលចំណេះដឹង និងការរក្សាអត្តសញ្ញាណវប្បធម៌ជាតិផងដែរ។ សាលាធម្មសភានេះ កើតឡើងបានដោយសារការរួបរួមកម្លាំងគ្នារវាងសប្បុរសជន ពុទ្ធបរិស័ទជិតឆ្ងាយ និងអាជ្ញាធរគ្រប់លំដាប់ថ្នាក់ ដែលឆ្លុះបញ្ចាំងពីសេដ្ឋកិច្ចគ្រួសាររបស់ប្រជាពលរដ្ឋមានការប្រសើរឡើង ទើបមានលទ្ធភាពចូលរួមចំណែកកសាងហេដ្ឋារចនាសម្ព័ន្ធសង្គម។

ក្រៅពីវិស័យសាសនា លោក កែ សួនសុភាព ក៏បានរំលឹកផងដែរថា រាជរដ្ឋាភិបាលបាននិងកំពុងជំរុញការអភិវឌ្ឍលើគ្រប់វិស័យ ទាំងផ្នែកពុទ្ធចក្រ និងអាណាចក្រ ជាពិសេសការកសាងផ្លូវ ស្ពាន សាលារៀន និងមន្ទីរពេទ្យ ដើម្បីបម្រើផលប្រយោជន៍សាធារណៈ។ លោកបានដាស់តឿនដល់បងប្អូនប្រជាពលរដ្ឋឱ្យបន្តចូលរួមថែរក្សាសុខសន្តិភាព ដែលជាលក្ខខណ្ឌចាំបាច់បំផុតសម្រាប់ការបន្តកសាងសមិទ្ធិផលថ្មីៗបន្ថែមទៀត។

ពិធីសម្ពោធឆ្លងនាព្រឹកនេះ បានបញ្ចប់ទៅដោយភាពស្និទ្ធស្នាល និងរីករាយ ជាមួយការវេរប្រគេននូវសមិទ្ធិផលនានាដល់ព្រះសង្ឃ និងការចែកអំណោយសប្បុរសធម៌មួយចំនួនជូនដល់ចាស់ជរា និងប្រជាពលរដ្ឋដែលមានជីវភាពខ្វះខាតក្នុងមូលដ្ឋានឃុំភ្នំលៀបផងដែរ៕

ដោយ: ឈុន សារ៉ាត