AKP ភ្នំពេញ ថ្ងៃទី២៧ ខែមីនា ឆ្នាំ២០២៦ -- ឯកឧត្តមបណ្ឌិតសភាចារ្យ ហង់ជួន ណារ៉ុន បានវាយតម្លៃខ្ពស់ចំពោះកិច្ចសហប្រតិបត្តិការរវាងទីភ្នាក់ងារឧត្ដមសិក្សាប្រើប្រាស់ភាសាបារាំង ជាមួយក្រសួងអប់រំ យុវជន និងកីឡា ដែលបានបង្កើតសមិទ្ធផល និងវឌ្ឍនភាពក្នុងការលើកកម្ពស់ការអប់រំនៅកម្ពុជា ជាពិសេសការបណ្តុះបណ្តាលភាសាបារាំងនៅកម្រិតឧត្ដមសិក្សាឱ្យកាន់តែមានភាពល្អប្រសើរ។

ក្នុងជំនួបពិភាក្សាការងារជាមួយលោកសាស្ត្រាចារ្យ Nicolas MAÏNETTI នាយកទីភ្នាក់ងារឧត្ដមសិក្សាប្រើប្រាស់ភាសាបារាំង ប្រចាំតំបន់អាស៊ីប៉ាស៊ីហ្វិកនៅទីស្តីការក្រសួង នាព្រឹកថ្ងៃទី២៧ ខែមីនា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងពីបច្ចុប្បន្នភាព នៃកិច្ចសហប្រតិបត្តិការលើវិស័យអប់រំជាមួយទីភ្នាក់ងារឧត្ដមសិក្សាប្រើប្រាស់ភាសាបារាំងពាក់ព័ន្ធនឹងការកម្ពស់ការអប់រំនៅឧត្តមសិក្សា។ ក្នុងនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រីបានជំរុញលើកទឹកចិត្តបន្ថែមទៀតក្នុងការបង្កើនចំនួនវគ្គបណ្ដុះបណ្ដាល ការរៀបចំសិក្ខាសាលា និងការបង្កើតឱ្យមានជំនួបផ្លាស់ប្ដូរបទពិសោធន៍តាមប្រព័ន្ធអនឡាញដើម្បីជំរុញ និងលើកកម្ពស់ការចូលរួមសិក្សាស្រាវជ្រាវរបស់និស្សិតផងដែរ។

ក្នុងឱកាសនេះ លោកសាស្រ្តាចារ្យ Nicolas MAÏNETTI បានលើកឡើងពីការបន្តកិច្ចសហប្រតិបត្តិការក្នុងការលើកកម្ពស់វិស័យអប់រំនៅឧត្តមសិក្សា ការផ្លាស់ប្ដូរការិយាល័យរបស់ទីភ្នាក់ងារឧត្ដមសិក្សាប្រើប្រាស់ភាសាបារាំង (AUF) ប្រចាំតំបន់អាស៊ីប៉ាស៊ីហ្វិកមកកាន់ប្រទេសកម្ពុជា ការបន្តពង្រឹងកិច្ចសហប្រតិបត្តិការគាំទ្របន្ថែមទៀត និងការត្រៀមលក្ខណៈរបស់ AUF រួមជាមួយក្រសួងអប់រំ យុវជន និងកីឡា ដើម្បីត្រៀមរៀបចំសកម្មភាពសម្រាប់អមកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦ នៅព្រះរាជាណាចក្រកម្ពុជា៕

ដោយ ចាន់ សុភឿន (ប្រភព៖ ក្រសួងអប់រំ)