AKP ភ្នំពេញ ថ្ងៃទី២៧ ខែ មីនា ឆ្នាំ ២០២៦ -- ក្រសួងបរិស្ថាន និងរដ្ឋបាលខេត្តកោះកុង បានចុះពិនិត្យ និងពិភាក្សាលើការគ្រប់គ្រងទីលានទុកដាក់សំរាម ដើម្បីធ្វើការរៀបចំ និងសាងសង់ប្រកបដោយប្រសិទ្ធភាព ជាពិសេសចៀសវាងផលប៉ះពាល់បរិស្ថាន។ 

ការចុះពិនិត្យ និងពិភាក្សាលើទីតាំងទុកដាក់សំរាម ក្នុងភូមិសាស្រ្តខេត្តកោះកុង នាពេលនេះបានធ្វើឡើងស្របនឹងស្មារតីនៃការអនុវត្តលិខិតលេខ ៣៣១សជណ.កបច ចុះថ្ងៃទី៩ ខែមីនា ឆ្នាំ២០២៦ របស់ទីស្តីការគណៈរដ្ឋមន្ត្រី។ ក្រុមការងារបានពិភាក្សា ដើម្បីពិនិត្យលើពីគ្រប់ភាគីពាក់ព័ន្ធ ក្នុងការសហការកែលម្អទីលានដែលមានស្រាប់ និងការសិក្សាវាយតម្លៃផល ប៉ះពាល់បរិស្ថាន នៅលើទីតាំងស្នើសុំ ២ទីតាំងផ្សេងទៀត។

សូមបញ្ជាក់ថា ប្រតិភូមន្រ្តីជំនាញក្រសួងបរិស្ថាន និងអាជ្ញាធរខេត្តកោះកុង នារសៀលថ្ងៃទី២៦ ខែមីនា ឆ្នាំ២០២៦ ក្រសួងបរិស្ថាន មកពីអគ្គនាយកដ្ឋានតំបន់ការពារធម្មជាតិ អគ្គនាយកដ្ឋានសហគមន៍មូលដ្ឋាន និង ស.ទ.ស. ចុះសិក្សាពិនិត្យដើម្បីកែលម្អទីលានចាក់សំរាម សម្រាប់ក្រុងខេមរភូមិន្ទ និងស្រុកមណ្ឌលសីមា ដែលស្ថិតនៅភូមិសាស្ត្រឃុំទួលគគី ស្រុកមណ្ឌលសីមា ក្រោមកិច្ចសហការចូលរួមពីតំណាងរដ្ឋបាលខេត្តកោះកុង អាជ្ញាធរពាក់ព័ន្ធ មន្ទីរបរិស្ថាន មន្ទីរពាក់ព័ន្ធ និងក្រុមហ៊ុនផ្តល់សេវាប្រមូលសំរាម។

ដើម្បីជំរុញភាពស្អាតនៅកម្ពុជា ទាំងនៅលើដី ក្នុងទឹក និងលើមេឃ ក្រសួងបរិស្ថានបានដាក់ចេញយុទ្ធនាការជាច្រើន ដែលចាប់ផ្តើមពីការអប់រំផ្សព្វផ្សាយ ឈានទៅការអនុវត្តសកម្មភាព កាត់បន្ថយការប្រើប្រាស់ប្លាស្ទិក ការរើសសំរាម សំអាតបរិស្ថានតាមលំនៅដ្ឋាន មូលដ្ឋាន និងតាមដងផ្លូវជាតិជំរុញការញែក និងទុកដាក់សំរាមឱ្យបានត្រឹមត្រូវ។  

បន្ទាប់ពីការចែកធុងសំរាមដល់មូលដ្ឋានសាលារៀន មណ្ឌលសុខភាព និងវត្តអារាមនៅទូទាំងប្រទេស ការពង្រឹងការគ្រប់គ្រងទីលានទុកដាក់សំរាម នឹងជាយុទ្ធសាស្រ្តចម្បងមួយបន្ថែមទៀត ដែលក្រសួងបរិស្ថាន ផ្តោតលើការអនុវត្តគោលការណ៍ប្រតិបត្តិបច្ចេកទេស (SOP) យ៉ាងម៉ឺងម៉ាត់ ដើម្បីកាត់បន្ថយផលប៉ះពាល់បរិស្ថាន។សកម្មភាពគន្លឹះមួយចំនួន ដែលត្រូវអនុវត្ត រួមមានការកែលម្អហេដ្ឋារចនាសម្ព័ន្ធទីលាន, ការគ្រប់គ្រងទឹកកខ្វក់, ការរៀបចំដីកប់ខ្ទប់ឱ្យស្របស្តង់ដារ, និងការពង្រឹងសមត្ថភាពរដ្ឋបាលថ្នាក់ក្រោមជាតិក្នុងការប្រមូល ដឹកជញ្ជូន និងទុកដាក់ឱ្យបានត្រឹមត្រូវ៕

ដោយ មករា