AKP កំពង់ធំ ថ្ងៃទី២៧ ខែមីនា ឆ្នាំ២០២៦ -- លោក ហាន កុសល អភិបាលរងខេត្តកំពង់ធំ លើកទឹកចិត្តដល់យុវជនត្រូវខិតខំរៀនសូត្រអភិវឌ្ឍសមត្ថភាព និងគោរពតម្លៃប្រពៃណីជាតិឱ្យបានខ្ពស់ ព្រោះវប្បធម៌ជាដើមកំណើតនៃអត្តសញ្ញាណជាតិ។ លោកអភិបាលរងខេត្តបានថ្លែងលើកទឹកចិត្តដូច្នេះក្នុងពិធីអបអរសាទរទិវាវប្បធម៌ជាតិ៣ មីនា លើកទី២៨ ឆ្នាំ២០២៦ក្រោមប្រធានបទ "យុវជនដើម្បីវប្បធម៌ជាតិ" កាលពីរសៀលថ្ងៃទី២៦ ខែមីនា ឆ្នាំ២០១៦នៅសាលប្រជុំប្រាសាទសំបូរព្រៃគុកនៃរដ្ឋបាលខេត្តកំពង់ធំ។

លោកអភិបាលរងខេត្តបានបញ្ជាក់ថា ក្នុងការសិក្សារៀនសូត្រឱ្យទទួលបានជោគជ័យមនុស្សម្នាក់ៗត្រូវតែមានកត្តាធំៗ៤សំខាន់ ដើម្បីសម្រេចគោលដៅក្នុងជីវិតគឺ៖ ១.ចំណេះដឹងដើម្បីឱ្យខ្លួនឯងមានសមត្ថភាព បទពិសោធន៍ និងជំនាញពិតប្រាកដនៅក្នុងជីវិត។ការខិតខំប្រឹងប្រែងរៀនសូត្រ ត្រូវអភិវឌ្ឍខ្លួនឯងឱ្យមានអាជីពពិតប្រាកដ ក្នុងការកសាងអនាគតឱ្យបានភ្លឺស្វាង។ ២.ជំនាញត្រូវតែមានសីលធម៌ ជីវធម៌ គុណធម៌ ដើម្បីដឹកនាំប្រកបដោយយុត្តិធម៌ត្រឹមត្រូវ និងតម្លាភាព ជាគុណតម្លៃរបស់មនុស្ស។ ៣.សុខភាព ដើម្បីឱ្យការងារមួយសម្រេចទៅបានសំខាន់ត្រូវមានសុខភាពល្អ បរិភោគអាហារឱ្យបានត្រឹមត្រូវ ឧស្សាហាត់ប្រាណ កាត់បន្ថយគ្រឿងស្រវឹងនិងគ្រឿងកំប៉ុងផ្សេងៗ និង៤.មូលធនមនុស្ស ប្រជាជនខ្មែរយើងត្រូវមានភាពធន់ ចូលរួមចំណែកសាមគ្គីគ្នា ធ្វើការអភិវឌ្ឍសង្គមជាតិប្រកបដោយនិរន្តរភាព។

លោក ហាន កុសល បានផ្ដាំផ្ញើ និងលើកទឹកចិត្តដល់អ្នកចូលរួមទាំងអស់បន្តខិតខំរៀនសូត្រអភិវឌ្ឍសមត្ថភាព និងគោរពតម្លៃប្រពៃណីជាតិឱ្យបានខ្ពស់ព្រោះវប្បធម៌ជាដើមកំណើតនៃអត្តសញ្ញាណជាតិ ហើយសិល្បៈជាកញ្ចក់បង្ហាញពីអរិយធម៌របស់សង្គមយើង។ បង្ហាញភាពទំនួលខុសត្រូវ ខិតខំស្រាវជ្រាវ និងច្នៃប្រឌិតដើម្បីថែរក្សានិងលើកតម្កើងបេតិកភណ្ឌវប្បធម៌ជាតិឱ្យកាន់តែរីកចម្រើន។ ការងារដែលអ្នកកំពុងធ្វើមិនត្រឹមតែជាការសិក្សាទេប៉ុន្តែជាការចូលរួមក្នុងការអភិរក្សអត្តសញ្ញាណនិងកេរ្តិ៍ឈ្មោះរបស់ជាតិផងដែរ។ សូមជូនពរឱ្យអ្នកទាំងអស់គ្នា ជាពិសេសក្មួយៗដែលជាសិស្សានុសិស្សទទួលបានជោគជ័យក្នុងការសិក្សា និងអាជីពការងារនាពេលអនាគត។

លោក ហ៊ិន សោភ័ណ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ធំ បានឱ្យដឹងថាចំពោះសម្បត្តិវប្បធម៌អរូបី មកទល់បច្ចុប្បន្នមន្ទីរបានដំឡើងស្នាដៃសិល្បៈទស្សនីយភាពថ្មីចំនួន៣៤ស្នាដៃ រាល់ពេលដែលស្នាដៃទាំងនោះ ចូលរួមប្រកួតប្រជែងពានរង្វាន់ថ្នាក់ជាតិគឺតែងតែទទួលបាននូវលទ្ធផលគួរជាទីគាប់ប្រសើរក្នុងនោះរួមមាន៖ របាំកួយស្លដែកត្រឡែកកំពង់ធំ និងល្ខោនបាសាក់រឿងដាវដែកកំពង់ស្វាយ ទទួលបានចំណាត់ថ្នាក់លេខ១ ទូទាំងប្រទេស។

លោកប្រធានមន្ទីរបានបញ្ជាក់ថាដើម្បីផ្សព្វផ្សាយសិល្បៈវប្បធម៌ខ្មែរឱ្យកាន់តែទូលំទូលាយ ក្រុមសិល្បៈរបស់មន្ទីរបានចេញសំដែងនៅសួនច្បារស្ទឹងសែន ចំនួន៤លើក ជូនសាធារណជនទូទៅទស្សនាហើយមន្ទីរបានធ្វើការបណ្តុះបណ្តាលសិល្បៈជូនដល់អ្នកជំនាន់ក្រោយជារៀងរាល់ឆ្នាំនិងបានបញ្ជូនមន្ត្រីជំនាញសិល្បៈចុះបង្ហាត់សិល្បៈរបាំ និងតន្ត្រីនៅតាមគ្រឹះស្ថានសិក្សា និងសហគមន៍ថែមទៀតផង៕

ដោយ ស៊ុម វណ្ណា