AKP បន្ទាយមានជ័យ ថ្ងៃទី២៧ ខែមីនាឆ្នាំ២០២៦​ -- ក្នុងស្មារតីយកចិត្តទុកដាក់ខ្ពស់បំផុតចំពោះសុខទុក្ខ និងសុវត្ថិភាពរបស់ប្រជាពលរដ្ឋដែលរងផលប៉ះពាល់ដោយសារជម្លោះព្រំដែន ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ បានចុះជួបសំណេះសំណាល និងដឹកនាំកិច្ចប្រជុំត្រួតពិនិត្យការរៀបចំការរស់នៅរបស់បងប្អូនប្រជាពលរដ្ឋភៀសសឹក ស្ថិតនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ នារសៀលថ្ងៃទី២៦ ខែមីនា ឆ្នាំ២០២៦។

ក្នុងឱកាសចុះពិនិត្យផ្ទាល់ដល់ទីតាំងសាងសង់ ឯកឧត្តមទេសរដ្ឋមន្ត្រី បានជំរុញយ៉ាងម៉ឺងម៉ាត់ដល់ក្រុមការងារកងវិស្វកម្ម សម្តេចតេជោ ហ៊ុន សែន សៀមរាប ឱ្យពន្លឿនការស្ថាបនាផ្លូវក្នុងតំបន់ស្នាក់នៅបណ្ដោះអាសន្ននេះឱ្យបានឆាប់រហ័សបំផុត ដើម្បីសម្រួលដល់ការធ្វើដំណើរ និងការដឹកជញ្ជូនស្បៀងអាហារ ក៏ដូចជាសម្ភារប្រើប្រាស់ប្រចាំថ្ងៃរបស់ពលរដ្ឋ។

លើផ្ទៃដីទំហំ ៤០០ ហិកតា ក្នុងភូមិស្លក្រាម រាជរដ្ឋាភិបាលបាននិងកំពុងប្រែក្លាយផ្ទះអតីតយុទ្ធជនចំនួន ៣,០០០ ខ្នង ឱ្យទៅជាជម្រកប្រកបដោយសុវត្ថិភាពសម្រាប់ពលរដ្ឋភៀសសឹក។ គិតត្រឹមពេលនេះ ការសាងសង់សម្រេចបានប្រមាណ ៧០% ហើយ ខណៈដែលហេដ្ឋារចនាសម្ព័ន្ធចាំបាច់ផ្សេងៗកំពុងត្រូវបានរៀបចំជាបន្តបន្ទាប់។

ស្របពេលជាមួយគ្នានេះ រដ្ឋបាលខេត្តបន្ទាយមានជ័យ ក៏បានបន្តដំណើរការរៀបចំពិធីចាប់ឆ្នោតរើសក្បាលដី និងផ្ទះក្នុងជំហានទី២ ជូនដល់គ្រួសារភៀសសឹកចំនួន ៧៨៨ គ្រួសារ បន្ថែមទៀត ដែលមកពីភូមិផ្លូវបំបែក (៣៨៦ គ្រួសារ) និងភូមិត្រពាំងសំរោង (៤០២ គ្រួសារ) ក្នុងឃុំគោករមៀត។

គួររំលឹកថា កាលពីថ្ងៃទី១៨ ខែមីនា កន្លងទៅ ពលរដ្ឋជាង ៨០០ គ្រួសារ បានចាប់ឆ្នោតក្នុងជំហានទី១ រួចរាល់ និងបានចូលមករស់នៅជាបន្តបន្ទាប់តាំងពីថ្ងៃទី២០ ខែមីនា ឆ្នាំ២០២៦ មកម្ល៉េះ។

ឯកឧត្តមទេសរដ្ឋមន្ត្រី គន់ គីម បានបញ្ជាក់យ៉ាងច្បាស់ថា ការរៀបចំជម្រកបណ្ដោះអាសន្ននេះ គឺជាកិច្ចអន្តរាគមន៍បន្ទាន់ និងចាំបាច់បំផុតក្រោមការដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីឆ្លើយតបទៅនឹងស្ថានភាពដែលបងប្អូនមិនទាន់អាចត្រឡប់ទៅលំនៅឋានដើមវិញបាន។ មូលហេតុដែលនាំឱ្យមានការភៀសសឹកនេះ គឺដោយសារសកម្មភាពរំលោភបំពានដែនអធិបតេយ្យពីសំណាក់ភាគីថៃ ដែលបានដាក់បន្លាលួស និងទូកុងតឺន័របិទខ្ទប់មិនឱ្យប្រជាពលរដ្ឋខ្មែរចូលទៅរស់នៅ និងអាស្រ័យផលលើដីធ្លីផ្ទាល់ខ្លួន បើទោះបីជាបទឈប់បាញ់បានចូលជាធរមានកាលពីថ្ងៃទី២៧ ខែធ្នូ ឆ្នាំ២០២៥ ក៏ដោយ។

«រាជរដ្ឋាភិបាលនឹងបន្តឈរនៅក្បែរប្រជាពលរដ្ឋជានិច្ច ហើយយើងនឹងបន្តកិច្ចខិតខំប្រឹងប្រែងផ្នែកការទូត និងច្បាប់ដើម្បីទាមទារដីធ្លី និងផ្ទះសម្បែងរបស់បងប្អូនមកវិញ ខណៈពេលដែលការរស់នៅទីនេះត្រូវបានធានាថានឹងមានភាពសមរម្យ និងសុវត្ថិភាពបំផុត»។ នេះជាប្រសាសន៍បន្ថែមរបស់ឯកឧត្តមទេសរដ្ឋមន្ត្រី។

តាមរយៈសកម្មភាពចុះផ្ទាល់នេះ បានបង្ហាញឱ្យឃើញកាន់តែច្បាស់ពីការយកចិត្តទុកដាក់របស់ថ្នាក់ដឹកនាំកម្ពុជា ដែលមិនត្រឹមតែដោះស្រាយបញ្ហាអធិបតេយ្យភាពជាតិប៉ុណ្ណោះទេ ប៉ុន្តែថែមទាំងមិនទុកឱ្យពលរដ្ឋណាម្នាក់ត្រូវរស់នៅដោយឯកោក្នុងស្ថានភាពលំបាកនៃសង្គ្រាមឈ្លានពានឡើយ៕

ដោយ ឈុន សារ៉ាត