AKP ភ្នំពេញ៖ថ្ងៃទី២៦ ខែ មីនា ឆ្នាំ ២០២៦– យុវជន និងប្រជាសហគមន៍ ជាកម្លាំងចលករ និងជាភ្នាក់ងារនៃការផ្លាស់ប្តូរ ជួយជំរុញការផ្លាស់ប្តូរវិជ្ជមាន ការកែប្រែទម្លាប់ល្អក្នុងកិច្ចគាំពារបរិស្ថាន និងការការពារប្រព័ន្ធអេកូឡូស៊ីទន្លេមេគង្គ ដែលជាសរសៃឈាមជីវិតរបស់សហគមន៍ ការលើកកម្ពស់សុខភាពសាធារណៈ ការពង្រឹងភាពធន់នឹងការប្រែប្រួលអាកាសធាតុ និងការពង្រឹងឱកាសសេដ្ឋកិច្ច។

លោកជំទាវ ងិន លីណា រដ្ឋលេខាធិការ និងជាប្រធានក្រុមការងារបញ្ជ្រាបយេនឌ័រក្រសួងបរិស្ថាន នៅថ្ងៃទី២៤-២៥ ខែមីនា ឆ្នាំ២០២៦ បានដឹកនាំក្រុមការងារបញ្ជ្រាបយេនឌ័រ និងយុវជន ចូលរួមបោះជំរុំនៅលើកោះសាមសិប ស្ថិតក្នុងខេត្តក្រចេះ ដើម្បីអបអរសាទរទិវាអន្តរជាតិសកម្មភាពដើម្បីទន្លេ «បុណ្យទន្ល»  ដែលបានសហការរៀបចំឡើងរវាងក្រសួងបរិស្ថាន និងអង្គការអុកស្វាមប្រចាំប្រទេសកម្ពុជា (Oxfam)។

លោកជំទាវ ងិន លីណា បានថ្លែងថាព្រឹត្តិការណ៍នេះបង្កើតឡើងក្នុងគោលបំណង ជំរុញការយល់ដឹងពីសក្តានុពលធនធាន ជាពិសេសធនធានទឹក ដោយឆ្លុះបញ្ចាំងជាមួយនឹងសិល្បៈវប្បធម៌ ប្រពៃណី របស់ប្រជាសហគមន៍ និងជនជាតិដើមភាគតិច ដែលរស់នៅ និងអាស្រ័យផលនៅតាមតាមដងទន្លេមេគង្គ ព្រមទាំងការបំផុសស្មារតី និងភាពជាអ្នកដឹកនាំដល់ យុវជន សហគមន៍ ជនងាយរងគ្រោះ ជនជាតិភាគតិច ទាក់ទងនឹង «ទន្លេ សមភាពយេនឌ័រ ពិការភាព និងបរិយាប័ន្នសង្គម»។

លោកជំទាវរដ្ឋលេខាធិការ បានមានប្រសាសន៍ថា «ការការពារប្រព័ន្ធអេកូឡូស៊ីទន្លេមេគង្គ មានន័យថា ការការពារសរសៃឈាមជីវិតរបស់សហគមន៍ ការលើកកម្ពស់សុខភាពសាធារណៈ ការពង្រឹងភាពធន់នឹងការប្រែប្រួលអាកាសធាតុ និងការពង្រឹងឱកាសសេដ្ឋកិ្ចច។ តាមរយៈសកម្មភាពទាំងឡាយនៅលើកោះ គឺបង្ហាញពីភាពសាមគ្គី និងការទទួលខុសត្រូវរួមរបស់យើងក្នុងការការពារជីវៈចម្រុះ បេតិកភណ្ឌវប្បធម៌ សុខមាលភាព និងជីវភាពរស់នៅនាពេលអនាគតរបស់មនុស្សរាប់លាននាក់ដែលពឹងផ្អែកលើទន្លេ»។ 

លោកជំទាវបានបន្ថែមថា «ការរៀបចំគម្រោងអភិវឌ្ឍន៍ណាមួយត្រូវពិគ្រោះយោបល់ប្រកបដោយបរិយាបន្ន និងតម្លាភាពជាមួយសហគមន៍ អង្គការសង្គមស៊ីវិល និងស្ថាប័នពាក់ព័ន្ធ ដើម្បីធានាថាគម្រោងអភិវឌ្ឍន៍មានទំនួលខុសត្រូវខាងសង្គមសេដ្ឋកិច្ច និងបរិស្ថាន ហើយយុវជន និងសហគមន៍ គឺជាកម្លាំងចលករក្នុងការផ្លាស់ប្តូវិជ្ជមាន និងរួមចំណែកទទួលខុសត្រូវ»។ 

ជាមួយគ្នានេះដែរ ក្រុមការងារក៏បានជំរុញ យុទ្ធនាការ«កម្ពុជាស្អាត ខ្មែរធ្វើបាន» និងបង្កើតសកម្មភាព ការសម្អាតបរិស្ថានតាមដងទន្លេ នៅលើកោះ៕

ដោយ៖ មករា