AKP កំពង់ធំ ថ្ងៃទី២៦ ខែមីនា ឆ្នាំ២០២៦ -- លោក ហាន កុសល អភិបាលរងខេត្តកំពង់ធំ បានដាក់គោលការណ៍ ៣ចំណុចដល់នាយកសាលា លោកគ្រូ អ្នកគ្រូវិទ្យាល័យ ដើម្បីយកទៅអនុវត្តតាមសាលារៀនប្រកបដោយគុណភាព និងប្រសិទ្ធភាពខ្ពស់ឱ្យវិស័យអប់រំមានការរីកចម្រើន។
លោក ហាន កុសល បានដាក់គោលការណ៍ដូច្នេះក្នុងកម្មវិធីសំណេះសំណាលជាមួយប្រធានការិយាល័យអប់រំក្រុង-ស្រុក នាយកសាលា លោកគ្រូ អ្នកគ្រូវិទ្យាល័យ និងដឹកនាំកិច្ចប្រជុំប្រចាំត្រីមាសទី១ និងលើកទិសដៅការងារត្រីមាសទី២ ឆ្នាំ២០២៦ របស់មន្ទីរអប់រំ យុវជន និងកីឡាខេត្តកំពង់ធំ នៅសាលប្រជុំមន្ទីរអប់រំ យុវជន និងកីឡាខេត្តកំពង់ធំ នាព្រឹកថ្ងៃទី២៦ ខែមីនា ឆ្នាំ២០២៦ នេះ។

លោក តាន់ ប៊ុនហុង ប្រធានមន្ទីរអប់រំ យុវជន និងកីឡាខេត្តកំពង់ធំ បានមានប្រសាសន៍ថា លោកគ្រូអ្នកគ្រូត្រូវតែពង្រឹងការដាំដើមឈើ និងកែលម្អបរិស្ថានសាលារៀនឱ្យមានភាពស្រស់បំព្រង។ យកចិត្តទុកដាក់ក្នុងការបង្រៀន និងរៀន អភិបាលកិច្ចល្អនៅតាមសាលារៀន ដើម្បីឱ្យមានគុណភាពក្នុងការអប់រំ។ យកចិត្តដាក់ទៅនឹងគ្រោះថ្នាក់សង្គមពាក់ព័ន្ធទៅនឹងគ្រោះថ្នាក់ចរាចរណ៍ផ្លូវគោក។ លោកគ្រូអ្នកគ្រូត្រូវតែអប់រំឱ្យសិស្សានុសិស្សចូលរួមគោរពច្បាប់ចរាចរណ៍បានគ្រប់ៗគ្នា។ ផ្សព្វផ្សាយ និងការកាត់បន្ថយពីការគ្រោះថ្នាក់នៃការលង់ទឹកនៅតាមសាលារៀន នៅតាមមូលដ្ឋាន។ តាមដានរាល់សកម្មភាពរបស់លោកគ្រូអ្នកគ្រូក្នុងការបង្រៀននិងរៀន ដើម្បីជ្រើសរើសយកគ្រូល្អក្នុងការប្រកួតទូទាំងប្រទេស។

លោក ហាន កុសល បានលើកឡើងថា ដើម្បីលើកកម្ពស់ប្រសិទ្ធភាពក្នុងវិស័យអប់រំទទួលបានជោគជ័យត្រូវឆ្លងកាត់នៅគោលការណ៍ ៣ចំណុចគឺ ១.ការគ្រប់គ្រងកម្មវិធី រួមមានកម្មវិធីអាហារតាមសាលារៀន កម្មវិធីការអប់រំកុមារតូច កម្មវិធីបំណឹងជីវិតនិងកម្មវិធីផ្សេងៗទៀត។ លោកគ្រូអ្នកគ្រូត្រូវតែមានការអភិវឌ្ឍធនធានមនុស្ស ការគ្រប់គ្រងធនធាន និងហេដ្ឋារចនាសម្ព័ន្ធតាមសាលារៀនត្រូវតែមានបរិយាកាសសុខភាព និងអនាម័យ មានការចូលរួម និងសហការ ពីអ្នកពាក់ព័ន្ធ។ ២.ការលើកកម្ពស់សមត្ថភាពខ្លួនឯង សូមឱ្យលោកគ្រូអ្នកគ្រូទាំងអស់យកចិត្តទុកដាក់ក្នុងការអានសៀវភៅឱ្យបានច្រើនស្រាវជ្រាវទាក់ទងទៅនឹងមេរៀនដែលត្រូវបង្រៀនសិស្ស។ ចូលរួមវគ្គបណ្ដុះបណ្ដាលឱ្យត្រូវជំនាញរបស់ខ្លួន។ ៣.ថ្នាក់ដឹកនាំខេត្តកំពង់ធំ ខិតខំស្វែងរកសប្បុរសជន អង្គការដៃគូ ដើម្បីមកអភិវឌ្ឍន៍នៅតាមសាលារៀនឱ្យមានលក្ខណៈល្អប្រសើរ។ 

លោក ហាន កុសល អភិបាលរងខេត្តកំពង់ធំ បានលើកទឹកចិត្តដល់លោកគ្រូអ្នកគ្រូទាំងអស់ គឺរដ្ឋបាលខេត្តកំពង់ធំផ្ដល់ឱកាសឱ្យមន្ទីរអប់រំ យុវជន និងកីឡា ការិយាល័យអប់រំក្រុង-ស្រុក ប្រសិនបើមានគំនិតច្នៃប្រឌិតក្នុងការអប់រំនៅតាមសាលារៀន ដើម្បីឱ្យតាមសាលារៀនក្លាយទៅជាសាលាមានការរីកចម្រើន សូមលោកនាយកសាលា លោកគ្រូអ្នកគ្រូ និងសិស្សានុសិស្សត្រូវតែទៅសិក្សាស្រាវជ្រាវពីប្រវត្តិសាស្ត្រ និងរមណីយដ្ឋានតំបន់ទេសចរណ៍នានាក្នុងខេត្តកំពង់ធំក្នុងការផ្សារភ្ជាប់ទ្រឹស្ដី និងការអនុវត្តជាក់ស្ដែង ដោយផ្ដល់ឱកាសឱ្យសិស្សានុសិស្សបានស្គាល់ និងជួបជាមួយថ្នាក់ដឹកនាំ។ រដ្ឋបាលខេត្តកំពង់ធំសហការជាមួយសាលាភូមិន្ទភ្នំពេញ ដើម្បីឱ្យសិស្សានុសិស្ស និងលោកគ្រូអ្នកគ្រូមានឱកាសក្នុងការសិក្សារៀនសូត្រ៕

ដោយ៖ ស៊ុម វណ្ណា