AKP បន្ទាយមានជ័យ ថ្ងៃទី២៦ ខែមីនា ឆ្នាំ២០២៦ -- អភិបាលខេត្តបន្ទាយមានជ័យ បានចេញមុខអះអាងយ៉ាងម៉ឺងម៉ាត់ ដើម្បីរំលាយរាល់ក្តីបារម្ភរបស់ប្រជាពលរដ្ឋ ដោយបញ្ជាក់ថា ការរៀបចំដី និងផ្ទះសម្បែងថ្មីនៅក្នុងស្រុកស្វាយចេក គឺជាវិធានការសង្គ្រោះបន្ទាន់ និងជាជម្រកបណ្ដោះអាសន្នប៉ុណ្ណោះ ហើយវាមិនមែនជាការដោះដូរថ្នូរនឹងដីធ្លីនៅតំបន់ព្រំដែន ដែលត្រូវបានទាហានថៃរំលោភបំពាននោះឡើយ។
ក្នុងពិធីចាប់ឆ្នោតជ្រើសរើសក្បាលដី និងផ្ទះជំហានទី២ ជូនដល់គ្រួសារភៀសសឹកជិត ៨០០គ្រួសារ នៅព្រឹកថ្ងៃទី២៦ ខែមីនា ឆ្នាំ២០២៦ នេះ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានសង្កត់ធ្ងន់ពីគោលជំហរច្បាស់លាស់របស់រាជរដ្ឋាភិបាលក្នុងការគិតគូរពីសុខទុក្ខពលរដ្ឋជាធំ។

ឯកឧត្តមអភិបាលខេត្តបានថ្លែងទៅកាន់បងប្អូនប្រជាពលរដ្ឋ ដែលមកពីតំបន់បឹងត្រកួន ឃុំគោករមៀត ស្រុកថ្មពួក យ៉ាងដូច្នេះថា «ការរៀបចំដី និងផ្ទះជូនបងប្អូននាពេលនេះ មិនមែនជាថ្នូរនៃការដោះដូរជាមួយដីរបស់បងប្អូនដែលបានបាត់បង់ដោយសារការទន្ទ្រានឈ្លានពាន និងហ៊ុព័ទ្ធបន្លាលួសពីសំណាក់ទាហានថៃនោះឡើយ។ វាគឺជាការផ្ដល់ជម្រកបណ្ដោះអាសន្ន ដើម្បីធានាថា បងប្អូនមានកន្លែងស្នាក់នៅសមរម្យក្នុងកំឡុងពេលរង់ចាំរាជរដ្ឋាភិបាលដោះស្រាយជាមួយភាគីថៃឱ្យបានចប់សព្វគ្រប់តាមផ្លូវការទូត»។

ឯកឧត្តមបានបន្ថែមថា ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋាភិបាលមិនទុកឱ្យពលរដ្ឋរងគ្រោះដោយគ្មានទីជម្រកនោះទេ។ ការរៀបចំទីតាំងថ្មីលើផ្ទៃដី ៤០០ហិកតាក្នុងភូមិស្លក្រាម ឃុំស្លក្រាម ស្រុកស្វាយចេកនេះ គឺជាការគិតគូរពីសុវត្ថិភាពជាចម្បង ខណៈដែលផ្ទះចំនួន ៣.០០០ខ្នងកំពុងសម្រេចការសាងសង់បានប្រមាណ ៧០% ហើយ។

នៅក្នុងពិធីចាប់ឆ្នោតជំហានទី២ នេះ រួមមានពលរដ្ឋមកពីភូមិផ្លូវបំបែក ៣៨៦គ្រួសារ ភូមិត្រពាំងសំរោង ៤០២គ្រួសារ ឃុំគោករមៀត   (សរុបទាំង ២ជំហាន មានពលរដ្ឋមកពីភូមិចំនួន៦ ក្នុងស្រុកអូរជ្រៅ និងស្រុកថ្មពួក ដែលទទួលបានការគាំពារនេះ)។
សូមបញ្ជាក់ថា ជំហានដំបូងនៃការចាប់ឆ្នោតជ្រើសរើសក្បាលដីផ្ទះនេះ ត្រូវបានជ្រើសរើសយកពីរភូមិក្នុងឃុំគោករមៀត ដោយក្នុងនោះមានភូមិបន្ទាយមានរិទ្ធចំនួន ៥០៤គ្រួសារ និងភូមិសាមគ្គី ៣១៨គ្រួសារ។

ងាកមកមើលទឹកមុខរបស់បងប្អូនប្រជាពលរដ្ឋដែលចូលរួមចាប់ឆ្នោតវិញ ពួកគាត់បានសម្ដែងនូវក្ដីរំភើបរីករាយ និងភាពធូរស្រាលក្នុងចិត្ត បន្ទាប់ពីបានស្ដាប់ការបកស្រាយផ្ទាល់ពីអភិបាលខេត្ត។ ពលរដ្ឋម្នាក់ដែលមកពីភូមិត្រពាំងសំរោង បានលើកឡើងទាំងក្ដុកក្ដួលថា កន្លងមកពួកគាត់ហាក់មានក្ដីបារម្ភថា បើមកនៅផ្ទះថ្មី ខ្លាចគេដកហូតដីចាស់នៅជាប់ព្រំដែនចោល ប៉ុន្តែនៅពេលដែលឯកឧត្តមអភិបាលខេត្តអះអាងថានឹងត្រូវវិលត្រឡប់ទៅវិញនៅពេលដោះស្រាយបញ្ហាព្រំដែនរួច ធ្វើឱ្យពួកគាត់មានទំនុកចិត្តយ៉ាងខ្លាំងលើការដឹកនាំរបស់រាជរដ្ឋាភិបាលជាមួយគ្នានោះដែរ ។

ឯកឧត្តម អ៊ុ រាត្រី បានសន្យាចំពោះមុខពលរដ្ឋថា នៅពេលដែលកិច្ចចរចារវាងរដ្ឋាភិបាលកម្ពុជា និងថៃត្រូវបានដោះស្រាយរួចរាល់ ប្រជាពលរដ្ឋទាំងអស់នឹងត្រូវវិលត្រឡប់ទៅរស់នៅលើទីតាំងលំនៅឋានដើមរបស់ខ្លួនវិញជាដាច់ខាត។ ទីតាំងនៅស្រុកស្វាយចេកនាពេលនេះ គឺជា «ចំណងដៃសន្តិសុខ» ដើម្បីផ្ដល់ភាពកក់ក្ដៅជូនពលរដ្ឋដែលកំពុងជួបការលំបាកខ្លាំងតែប៉ុណ្ណោះ៕

ដោយ៖ ឈុន សារ៉ាត