AKP ត្បូងឃ្មុំ ថ្ងៃទី២៦ ខែមីនា ឆ្នាំ២០២៦ --ក្រសួងកសិកម្ម រុក្ខាប្រមាញ់ និងនេសាទ បានអភិវឌ្ឍន៍ពូជពោតអ៊ីប៊្រីដថ្មីចំនួនពីរប្រភេទដែលធន់នឹងអាកាសធាតុ និងផ្តល់ទិន្នផលខ្ពស់ ហើយត្រៀមនឹងដាក់ប្រើប្រាស់នាពេលដ៏ខ្លីខាងមុខ។
ក្នុងឱកាសចុះពិនិត្យ និងវាយតម្លៃប្រភេទពូជពោតអ៊ីប៊្រីដថ្មី កាលពីថ្ងៃទី២៥ ខែមីនា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារគណៈកម្មាធិការបញ្ចេញពូជដំណាំ ដែលអភិវឌ្ឍន៍ដោយក្រុមអ្នកបច្ចេកទេសរបស់អគ្គនាយកដ្ឋានក្សេត្រសាស្ត្រ ក្រោមការដឹកនាំដោយលោក នៅ ថុង នៅចម្ការបង្ហាញរបស់កសិករ ស្ថិតនៅភូមិជីរោក្រោម១ ឃុំជីរោ១ ស្រុកត្បូងឃ្មុំ ខេត្តត្បូងឃ្មុំ។ 

ឯកឧត្តម តូច ប៊ុនហួរ បានមានប្រសាសន៍ថា ក្រុមការងារ បានចុះពិនិត្យ និងវាយតម្លៃប្រភេទពូជពោតអ៊ីប៊្រីដថ្មីនេះ ធ្វើឡើងក្នុងគោលបំណង ពិនិត្យការសម្តែងកម្មនៃប្រភេទពូជពោតអ៊ីប៊្រីដថ្មីទាំងពីរ ដើម្បីវាយតម្លៃបញ្ចេញឱ្យប្រើប្រាស់ជាផ្លូវការ។ ឯកឧត្ដមរដ្ឋលេខាធិការ បានគូសបញ្ជាក់ថា ក្រសួងកសិកម្ម បានត្រៀមបញ្ចេញពូជពោតអ៊ីប្រ៊ីដ BH-3577 និង BH-4187 ឱ្យប្រើប្រាស់នាពេលដ៏ខ្លីខាងមុខ ដែលវាគឺជាចម្លើយដ៏សមស្របបំផុត ព្រោះពូជទាំងនេះត្រូវបានសម្រិតសម្រាំង ឡើងដើម្បីធន់នឹងការប្រែប្រួលអាកាសធាតុ និងកាត់បន្ថយការប្រើប្រាស់ធាតុចូលដើម្បីជួយសម្រាលបន្ទុក និងបង្កើនប្រាក់ចំណូលជូនបងប្អូនកសិករក្នុងស្ថានភាពដ៏លំបាក។

ឯកឧត្ដមរដ្ឋលេខាធិការបានលើកឡើងថា ឆ្លងកាត់ការបង្កាត់ និងបន្សុទ្ធយ៉ាងហ្មត់ចត់ អស់រយៈពេល ៦ឆ្នាំ គឺក្រុមការងារជំនាញបានចម្រាញ់យកគ្រាប់ពូជល្អបំផុត ចំនួនពីរប្រភេទនេះ ដែលឆ្លុះបញ្ចាំងយ៉ាងច្បាស់ថា "ខ្មែរអាចធ្វើបាន" និងមានសមត្ថភាពម្ចាស់ការលើផលិតកម្មគ្រាប់ពូជដោយខ្លួនឯង ដោយមិនពឹងផ្អែកទាំងស្រុងលើការនាំចូល។

ជាមួយគ្នានេះ ឯកឧត្តមរដ្ឋលេខាធិការក៏បានថ្លែងបញ្ជាក់ផងដែរថា ក្នុងនាមរាជរដ្ឋាភិបាលកម្ពុជា ក្រសួងកសិកម្ម រុក្ខាប្រមាញ់ និងនេសាទ ប្តេជ្ញាបន្តជំរុញការស្រាវជ្រាវ និងអភិវឌ្ឍន៍ឱ្យកាន់តែខ្លាំងក្លាថែមទៀត ដើម្បីធានាថា កសិករគ្រប់រូប នឹងមានជីវភាពកាន់តែប្រសើរ និងអាចឈរជើងបានយ៉ាងរឹងមាំក្នុងគ្រប់កាលៈទេសៈនៃវិបត្តិសកល៕

ដោយ៖ រិទ្ធី ប្រភព៖ ក្រសួងកសិកម្ម រុក្ខាប្រមាញ់ និងនេសាទ